ვაკე, საბურთალოს ნაწილი, წყნეთი, ბაგები, ახალდაბა სტიქიური უბედურების ეპიცენტრში აღმოჩნდა. ვაკის გამგეობამ სტიქიის დაწყებიდან ძალიან მალე საკუთარი ვებგვერდისა და სოციალური ქსელების დახმარებით დაგეგმა აქცია, რომელიც მიზნდ ისახავდა მოეზიდათ ჰუმანიტარული ტვირთები დაზარალებულთა დასახამარებლად.
მსგავსი ხასიათის აქცია დამოუკიდებლად დაგეგმა ასევე „წითელი ჯვრის საქართველოს ორგანიზაციამაც“. შემდეგ მათ ერთმანეთთან კოორდინირებულად გადაწყვიტეს ვაკის გამგეობის ეზოში დაედგათ კარვები, მოეხდინათ მოხალისეთა რეგისტრაცია და შემდეგ საჭირო მიმართულებებით გადანაწილება.
აქციაში უამრავმა მოხალისემ მიიღო მონაწილეობა. არც ჩვენი იქ ყოფნის დროს წყდებოდა დახმარების მსურველთა ნაკადი.
ვაკე-საბურთალოს გზაზე, გამგეობის ეზოში გაშლილია „წითელი ჯვრის“ კარვები. თითოეულ მათგანში ხდება კლასიფიკაციის მიხედვით დახარისხებული ტვირთის განთავსება. აქ ყველგან მოხალისეები მუშაობენ. განსაკუთრებით დიდია სტუდენტებისა და საჯარო სკოლების უფროსკლასელთა რაოდენობა.
ნინო ოსეფაიშვილი– „წითელი ჯვრის" ორგანიზაციის წარმომადგენელი „გურია ნიუსთან“ საუბარში აღნიშნავს, რო ეს აქცია სპონტანურად დაიგეგმა, სტიქიის შეტევიდან ძალიან სწრაფად. „ ჩვენ იმ ღამითვე შევქმენით შტაბი, ჩვენი თანამშრომლები მაშინვე გავიდნენ ადგილებზე, უშუალოდ სტიქიის ზონაში. შემდეგ „ფეისბუკის“ საკუთარი გვერდის საშუალებით დავგეგმეთ ეს აქცია . აღმოჩნდა, რომ ვაკის რაიონის გამგეობაც აპირებდა მსგავსი აქციის გაკეთებას და ჩვენი ძალები გავაერთიანეთ. კარვები ირანის „წითელი ჯვრის" ორგანიზაციამ გადმოგვცა. იმდენად დიდია დახმარების მსურველთა რაოდენობა, რომ ჩვენ დამოუკიდებლად ვერ ვახერხებთ მათ გადანაწილებას და ამ საქმეში მერიის და ადგილობრივი გამგეობის თანამშრომლებიც გვეხმარებიან. ჩვენ იმ ღამითვე გადავეცით ინფორმაცია თბილისში არსებულ მდგომარეობაზე საერთაშორისო ორგანიზაციებს. აქ ძირითადად ნაწილდება პროდუქტი, პირველადი საჭიროების ნივთები და ტანსაცმელი.“
ვისაც ფულადი დახმარების სურვილი აქვს, მათ შეუძლიათ თანხა გადარიცხონ „წითელი ჯვრის“ სპეციალურ ანგარიშზე რომელიც „საქართველოს ბანკშია“ გახსნილი.
ვაკის გამგებლის მოადგილე ზვიად ჭილაძე ჩვენთან საუბარში ამბობს, რომ მუშაობა მიმდინარეობს 24 საათის განმავლობაში. „ განსაკუთრებით რთული მდგომარეობაა სვანიძის ქუჩაზე, სადაც მაშველებთან ერთად ჩვენს მიერ მობილიზებული ჯგუფებიც მუშაობენ. ახლაც მიმდინარეობს გაწმენდითი სამუშაოები. ჩვენ ადგილზე ვახდენთ აქ მოგროვებული ჰუმანიტარული ტვირთების საჭიროებისამებრ გადანაწილებას.“
მერიის წარმომადგენლის თაკო ქანთარიას განცხადებით, მოხალისეთა რაოდენობა ამ ეტაპზე არსებულ მოთხოვნებს, მნიშვნელოვნად აჭარბებს.
ნინო ღლონტი და ეკა კალანდაძე – თბილისის სახელმწიფო უნივერსიტეტის სტუდენტები , ორი დღეა აქციაში იღებენ მონაწილეობას. ისინი სხვადასხვა კარვებში ახდენენ ტვირთების გადანაწილებას და შემდეგ დაზარალებულებზე ანაწილებენ. „ფეისბუკში ვნახეთ ინფორმაცია აქციის შესახებ და მაშინვე წამოვედით. გუშინაც აქ ვიყავით. ვახდენთ ტანსაცმლის, სისუფთავის საშუალებების და სხვა შემოწირულობების დახარისხებას და გადანაწილებას.
არ გვეგონა თუ ამდენ მოხალისეს ვნახავდით აქ. მათი რიცხვი ახლაც არ წყდება."
