საკურორტო სეზონის პიკზე, ბორჯომი დამსვენებლებს არასაკმარისად დასუფთავებული ხვდება. ცენტრალურ უბნებში ნაგვის ურნები სავსეა; მოსახლეობას საყოფაცხოვრებო ნარჩენების დატოვება ქუჩაში უწევს. მუნიციპალიტეტში კი, პრობლემის მოუგვარებლობას არასაკმარისი დაფინანსებით და მწირი რესურსებით ხსნიან.
ბორჯომის მცხოვრები ლალა ნინუა "გურია ნიუსთან" საუბრისას ამბობს, რომ დასუფთავების მანქანა მის უბანში კვირაში ერთხელ მოდის.
"პოლიციის შენობასთან ახლოს ვცხოვრობ და იქ დამონტაჟებული ურნებით ვსარგებლობთ. საკმაოდ დიდი მანძილის გავლა მიწევს, სანამ ნაგავს ამ ურნებამდე მივიტან. ზაფხულობით, დამსვენებლები როცა არიან, ქალაქი ორჯერ მაინც გაწმინდონ. ალტერნატიული ადგილიც არ არის, სადაც ამ ნაგავს მოვაგროვებთ. ქუჩაში დაყრილ ნაგავს კი ცხოველები ახვევია", _ ამბობს ნინუა.
ქალაქის დასუფთავების საკითხი ტურისტებისთვისაც მნიშვნელოვანია. როგორც ჩვენთან საუბრისას უკრაინიდან ჩამოსული ევგენია ამბობს, სასურველია კურორტი მეტად დასუფთავებული იყოს, ვიდრე არის.
"ასეთ წვრილმანებს ყურადღებას ნაკლებად ვაქვცევ, თუმცა, სასურველია, უფრო მოწესრიგებული და დასუფთავებული იყოს ქალაქი, ვიდრე არის", _ ამბობს ევგენია.
ბორჯომის "დასუფთავებისა და კეთილმოწყობის სამსახურის" უფროსი მერაბ იობაშვილი "გურია ნიუსთან" საუბრისას მოსახლეობის და ტურისტების პრეტენზიებს უსაფუძვლოს უწოდებს და ამბობს, რომ ქალაქის ცენტრალური უბნები ნაგვისგან დღეში ორჯერ იწმინდება.
"ქალაქს 4-5 სპეციალური მანქანა ემსახურება, გარეუბნები კი კვირაში ერთხელ სუფთავდება. 30-მდე მეეზოვე ასუფთავებს ცენტრალურ უბნებს. ვიცით, რომ ეს საკმარისი არ არის, მაგრამ ქალაქის ბიუჯეტი მეტს ვერ წვდება. ურნებს შორის დაშორება მაქსიმუმ 50-დან 100 მეტრამდეა ცენტრალურ ქუჩებზე. მოსახლეობას შეუძლია ამ ურნებით ისარგებლოს. ყოველდღიურად მოსახლეობის დაახლოებით 80%-ს ვემსახურებით დანარჩენებს კი, კვირაში ერთხელ", _ ამბობს იობაშვილი.
მისივე თქმით, მუნიციპალიტეტის დაფინანსებით, "დასუფთავების და კეთილმოწყობის სამსახურმა" 23 ივნისს 86 ახალი ნაგვის ურნა შეიძინა, მანამდე კი, 50 ახალი ნაგავშემკრები კონტეინერი დადგეს ქალაქში.
აღსანიშნავია, რომ ბორჯომის ქუჩების მსგავსად, დაუსუფთავებელია მდინარე ბორჯომულას კალაპოტიც. ქალაქის დასუფთავების სამსახურის უფროსი ამბობს, რომ ყოველკვირეულად მისი დასუფთავება ვერ მოხერხდება. ის ვერც, დასუფთავების პერიოდულობას ამბობს.
"მოსახლეობა თავად აბინძურებს მდინარის კალაპოტს, ჩვენ კი ამის რესურსი არ გვაქვს ყოველკვირეულად გავწმინდოთ. თუ ბიუჯეტს გაგვიზრდიან, ვეცდებით უფრო მოვაწესრიგოთ მუნიციპალიტეტი", _ ამბობს იობაშვილი.
მუნიციპალიტეტი პრობლემის გადაჭრას მომავალი საკურორტო სეზონისთვის გეგმავს, თუმცა კონკრეტულად რა ღონისძიებებს გაატარებენ ისინი ქალაქის დასასუფთავებლად, ვერ აკონკრეტებენ.
