საქართველოს ენერგეტიკისა და წყალმომარაგების მარეგულირებელი ეროვნული კომისიის მიერ მიღებული გადაწყვეტილების თანახმად, თბილისში ელექტროენერგიის ტარიფი 4 თეთრით გაიზარდა.
როგორც ცნობილია, აღნიშნული გადაწყვეტილება კომპანიამ დოლართან მიმართებაში ეროვნული ვალუტის კურსის ცვლილებით, შესასყიდი ელექტროენერგიის გაზრდილი ფასისა და ელექტროენერგიის გადაცემის ტარიფის ზრდის გამო მიიღო.
მიუხედავად იმისა, რომ სოციალურად დაუცველ მოსახლეობას გაზრდილ ტარიფს თბილისის მერია დაუფარავს, თბილისის მცხოვრებთა უმრავლესობა ამბობს, რომ ტარიფის ზრდა მათი ოჯახის ბიუჯეტს მნიშვნელოვნად დააზარალებს.
რამდენად შეძლებენ თბილისელები გაზრდილი ელექტროენერგიის ტარიფის გადახდას, "გურია ნიუსმა" თბილისის ქუჩებში შემთხვევითი შერჩევის მეთოდით დედაქალაქის მაცხოვრებლები გამოკითხა.
გამოკითხვის შედეგების მიხედვით, ელექტროენერგიაზე ფასის ზრდას მოსახლეობის ნაწილი არასწორ გადაწყვეტილებად მიიჩნევს, ნაწილი კი ამბობს, რომ სხვა გზა არ ექნება და რაც არ უნდა მოიკლოს დახარჯული ელექტროენერგიის საფასურს მაინც გადაიხდის.
"ცუდია, დენზე ტარიფის მომატება, მაგრამ სხვა გზა არ ექნება მოსახლეობას, უშუქოდ ვერ დარჩებიან და გადაიხდიან, თუნდაც სხვა რამე მოიკლონ, "_ ამბობს 32 წლის ნადია.
ელექტროენერგიის გაძვირების გამო "გურია ნიუსთან" საუბრისას უკმაყოფილება გამოთქვა 47 წლის მარინამ:
"ჯერჯერობით არ ვიცი, ახალი ტარიფის მიხედვით რა თანხა მექნება გადასახდელი, ამიტომ ზეპირად ვერ გეტყვით მოვახერხებ თუ არა გადახდას. გაოგნებული ვარ… ქვეყანაში კრიზისია და მთავრობის წევრები ხალხზე არ ფიქრობენ. გამოვიდნენ ქუჩაში და ნახონ ხალხი საჭმელს ნაგვის ურნებში როგორ ეძებს. მეც ვმუშაობ და ჩემი ოჯახის წევრებიც, რამეს მოვიკლებ და გადავიხდი როგორღაც გაძვირებულ შუქის ფულს, მაგრამ გაჭირვებულმა ხალხმა, დაბალმა ფენამ რა უნდა ქნას, რითი უნდა გადაიხადონ?! მათზე ვფიქრობ ახლა და არა საკუთარ თავზე. ერთადერთ საშუალებას ადამიანებს ზამთარში რომ გათბენ, ართმევენ. რატომ არ ფიქრობენ ხალხზე არ მესმის. მართალია, პენსია 10 ლარით მოუმატეს, მაგრამ დოლარიც აწეულია და პურიც გაძვირებული", _ ამბობს 47 წლის მარინა.
26 წლის ეკას თქმით, როცა ახალი ქვითრები დარიგდება, მაშინ ეცოდინება რამდენად შეძლებს გაძვირებული ტარიფის გამო ელექტროენერგიის მოხმარებული კილოვატსაათების საფასურის გახდას.
"ძალიან ცუდია დენის გაძვირება, არ ვიცი რამდენად მოვახერხებ გადახდას, ეს, ალბათ, თვის ბოლოს გაირკვევა, როცა ახალი კომუნალური გადასახადების ქვითრები მოვა; მაგრამ შუქს ხომ არ გავათიშინებ, როგორც აქამდე ვიხდიდი, ისევ ისე გადავიხდი,"_ამბობს ეკა.
"- დიდი ოჯახი მაქვს და შესაბამისად მოხმარებული კილოვატსაათების რაოდენობაც დიდია. სახლში არსებული სხვადასხვა საოჯახო ტექნიკის გარდა, პატარა მაღაზიაც მაქვს და თვეში დენის გადასახადს 60 ლარზე მეტს ვიხდი, ალბათ ახალი ტარიფით 150 ლარიც არ მეყოფა, რაც ძალიან ცუდია. მთელი შემოსავალი კომუნალურ გადასახადებს დასჭირდება,"_ ამბობს 29 წლის გურამი.
"- ცუდია გაძვირება, მაგრამ გადახდა მაინც ყველას მოუწევს. აბა, ელექტროენერგიის გარეშე როგორ იქნებიან."_ამბობს 33 წლის ირინა.
35 წლის ნინოს თქმით, დენის ტარიფის გაძვირება ყველა მოქალაქის ოჯახის ბიუჯეტზე აისახება.
"რა თქმა უნდა, არასასიამოვნო ფაქტია. ეს არამარტო მე, არამედ ყველა ოჯახს დაეტყობა, განსაკუთრებით კი იმათზე აისახება, ვისაც უჭირს და აქამდე არსებულ ტარიფსაც ძლივს იხდიდა, "_ ამბობს 35 წლის ნინო.
როგორც "გურია ნიუსთან" საუბრისას 49 წლის ხათუნამ თქვა, მას არ სიამოვნებს არც პროდუქტებში და არც კომუნალურ გადასახადებში მომატებული ფასის გახდა, მაგრამ სხვა გაზა არ აქვს.
"ყველა გადასახადს ვიხდი მათ შორის ელექტროენერგიისასაც. ზოგადად, რა თქმა უნდა, არ მსურს არამარტო კომუნალურ, არამედ ყველა აუცილებელ პროდუქტზე გაძვირებული ფასის გადახდა," _ ამბობს 49 წლის ხათუნა.
52 წლის ნიკას თქმით, თბილისში და არამარტო აქ, ერთეულები ცხოვრობენ, ვისაც გაძვირებული კომუნალური გადასახადის გადახდა ყოველთვე შეუძლიათ.
"პირადად მე ცოტა გამიჭირდება ახალი ტარიფით გადახდა. ალბათ, ერთეულები ცხოვრობს თბილისში და სულაც საქართველოში, ვინც წესიერად გადაიხდის," _ ამბობს 52 წლის ნიკა.
"-ზუსტად არ ვიცი, რამდენად მოვახერხებ ყოველთვე ელექტროენერგია გაძვირებული ტარიფით გადავიხადო. დღევანდელ პირობებში ფასის გაზრდა სწორი არ არის, როდესაც ქვეყანაში უმუშევრობაა, ხელფასებიც მწირია და მითუმეტეს პენსიონერები როგორ შევძლებთ გადახდას არვიცი," _ ამბობს 68 წლის მარიამი.
.jpg_11783.jpg)
