მაშინ, როცა ქვეყანა წინასაარჩევნო ისტერიის მოლოდინშია, ბუნებრივია, ყველა უმნიშვნელო საკითხიც კი მეტად ყურადსაღებია და კითხვის ნიშნებიც უფრო ხშირად ისმის, ვიდრე სხვა დროს.
საქმე ის გახლავთ, რომ სამოქალაქო რეესტრმა ოზურგეთის მუნიციპალიტეტის რამდენიმე სოფელში ქუჩების და სახლების დანომვრა დაიწყო. კონკრეტულად, ეს ეხება ნარუჯას, სოფელ ოზურგეთს, გურიანთას და ბახვს, თუმცა, სოფელ ოზურგეთში პროცესი უკვე დასრულებულია და ამჟამად სამოქალაქო რეესტრის დაქირავებული პირები დანარჩენ სამ სოფელში მუშაობენ.
ფაქტში, თითქოს, საგანგაშო არაფერია, რომ არა ერთი ნიუანსი _ მოსახლეობასთან გასაუბრებისას ეს ადამიანები არა მხოლოდ ქუჩის თუ სახლის ნომერს აცნობენ მათ, არამედ პირად მონაცემებსაც ითხოვენ (სახელი, გვარი, დაბადების თარიღი და ასაკი). მოქალაქეების არაერთგვაროვანი რეაქცია იმან გამოიწვია, რომ სამოქალაქო რეესტრი ხელახლა აგროვებს იმ მონაცემებს, რომლებიც რეალურად მას უკვე აქვს.
როგორც სამოქალაქო რეესტრის ოზურგეთის ოფისის ხელმძღვანელი, ვანო მენაბდე ჩვენთან საუბრისას ამბობს, პირადი მონაცემების შეგროვება მიზნად მხოლოდ და მხოლოდ კონკრეტული ადამიანების კონკრეტულ მისამართზე დაფიქსირებას ისახავს. მან ასევე უარყო ინფორმაცია ქუჩების სახელდების შესახებ და აღნიშნა, რომ მათი მოვალეობა მხოლოდ ქუჩებისთვის და სახლებისთვის ნომრების მინიჭებაა, რაც შეეხება სახელდებას, ეს საკრებულოს კომპეტენციაა, რაც, თავის მხრივ, სოფელ ბახვის რწმუნებულმა, გოჩა შარაშენიძემაც დაადასტურა.
“გურია ნიუსი” “საერთაშორისო გამჭვირვალობა _ საქართველოს” იურისტს, ირინე ურუშაძეს ესაუბრა: “ეს მთელ საქართველოში მიმდინარე პროცესია და ამაში არაფერია განსაკუთრებული. უბრალოდ, ადამიანებს, რომლებიც ამ კონკრეტულ სამუშაოს ასრულებენ, უნდა ჰქონდეთ საშვი დასტურად იმისა, რომ ნამდვილად არიან სამოქალაქო რეესტრის მიერ დაქირავებულნი. ასევე, სავარაუდოდ, უნდა ჰქონდეთ შესაბამისი ბრძანება, რომლის საფუძველზეც გახორციელდება სამუშაოები,” _ გვითხრა იურისტმა.
“თუ გავითვალისწინებთ, რომ საჯარო რეესტრში საკმაოდ კარგად არის აღრიცხვიანობა მოწესრიგებული, მაშინ შეიძლება ითქვას, რომ პირადი მონაცემების ხელახალი შეგროვება საჭირო არაა და მით უმეტეს, ამ კონკრეტული მიზნისთვის. თუ სამოქალაქო რეესტრი ყველა კითხვის ნიშანს არ გააქრობს, ბუნებრივია, იარსებებს ეჭვები იმის შესახებ, ხომ არ არის ეს რაიმე სახით არჩევნებთან დაკავშირებული”, _ აღნიშნა ჩვენთან საუბრისას “ახალი მემარჯვენეების” გურიის რეგიონის კურატორმა, ლევან კალანდაძემ.
მან ასევე ისაუბრა ნორმატიული აქტის აუცილებლობაზე (რომელზეც იურისტმაც გაამახვილა ყურადღება), როგორც ერთგვარ სამოქმედო ინსტრუქციაზე.
ბრძანების შესახებ ინფორმაციის მისაღებად ჩვენ ისევ დავუკავშირდით ვანო მენაბდეს და მივიღეთ დაპირება, რომ შესაბამის ბრძანებას ორშაბათს მოგვაწვდის. “გურია ნიუსი” ამ თემას ბრძანების მიღებისთანავე დაუბრუნდება.
