გასულ სამშაბათს, ლანჩხუთის მუნიციპალიტეტის საკრებულოს თავმჯდომარის სამუშაო ოთახში, სამტრედია-გრიგოლეთის მონაკვეთზე საავტომობილო გზის მეოთხე ლოტის მშენებლობასთან დაკავშირებით, ადგილობრივი მოსახლეობის პრობლემის შესწავლის მიზნით, ლანჩხუთის საკრებულოში შექმნილი დროებითი სამუშაო ჯგუფის სხდომა გაიმართა, რომელსაც ჯგუფის წევრების გარდა, ადგილობრივი განსახლების პროგრამის კონსულტანტები _ სარდიონ ჩხაიძე და ვასილ ბაზაძე ესწრებოდნენ, ხოლო სუფსის მოსახლეობას ალეკო ევგენიძე და ზვიად სალარიძე წარმოადგენდნენ.
თავდაპირველად, სამუშაო ჯგუფის ხელმძღვანელმა გიორგი ჩახვაძემ ჯგუფის მიერ გაწეულ სამუშაოზე ინფორმაცია გააკეთა, სადაც გარკვეული მონაცემების შეჯერება მოხერხდა მხოლოდ მოსავლის შეფასების კუთხით: "ჯგუფის წევრებმა რამდენიმე სოფელში ადგილზე შეისწავლეს სიტუაცია და დაადგინეს, რომ 1 კვ. მეტრზე სუფსის საყანე ფართობებში 1 ჰექტარზე საშუალოდ 35-40 ათასი ძირი სიმინდია დათესილი, რაც "აჯამეთისა" და "ქართული კრუგის" ჯიშის სიმინდის მოსავალს 8-10 ტონით განსაზღვრავს. სხვა სოფლებში, კერძოდ ნიგვზიანში, ჩიბათში და საკუთრივ ქალაქში, ეს მაჩვენებელი ოდნავ დაბალია და 1 ჰექტარზე 5-7 ტონა მოსავალს მოიცავს. ჯგუფმა საშუალოდ 7 ტონა სიმინდის მოსავალზე გააკეთა გათვლა და დაადგინა, რომ ოპტიმალურ, ანუ ხმობის პროცესში 1 ჰექტარზე სიმინდის სუფთა მარცვალი 4,6 ტონით განისაზღვროს და 1 კილოგრამის ლარად შეფასებისას მოსავლის ღირებულება 4 600 ლარით შეფასდეს. ამას გამოაკლდება ხარჯი, რომელიც სავარაუდოდ 1 000 ლარს შეადგენს და მივიღებთ სუფთა მოგებას 3 600 ლარს," _ განაცხადა ჩახვაძემ.
ეს მონაცემები მხოლოდ სიმინდის მოსავალს ეხებოდა და ჯგუფის მიერ ცალკე განისაზღვრა სხვა სახის სოფლის მეურნეობის პროდუქტების სავარაუდო ღირებულებები: "რაც შეეხება ჩალას, ერთი კონა საშუალოდ ლარი ღირს და ჰექტარზე 1000-1200 კონას მიიღებს გლეხი. ამას დაემატება 80-100 კგ ლობიო, 1,2-1,5 ტონა გოგრა, 200-300 კგ სოიო და მთლიანობაში შემოსავალი 5 000 ლარს მიაღწევს," _ დასძინა ჯგუფის ხელმძღვანელმა.
გამოდის, რომ მუშა ჯგუფის მიერ მოპოვებული მონაცემების შესაბამისად, მოსახლეობას მოსავლის კომპენსაციის სახით 1 ჰექტარზე სახელმწიფომ 5 ათასი ლარი უნდა გადაუხადოს, რაც აქამდე დაპირებულ თანხაზე მეტია. თუმცა, აქ აღინიშნა, რომ ეს მხოლოდ იმ ადამიანებზე ითქმის, რომლებიც მართლაც შრომობენ დღენიადაგ და ოჯახის შემოსავალიც ამ შრომაზეა დამოკიდებული.
ამ მონაცემებს კომისიის წევრებიც ეთანხმებიან, თუმცა, გარკვეული მოსაზრებები გააჩნიათ ადგილების მიხედვით. რაც შეეხება თავად სუფსის მოსახლეობის წარმომადგენელს ალეკო ევგენიძეს, ის ამ მონაცემებს არ ეთანხმება:
"მიმაჩნია, რომ აგროვადებისა და აგროტექნიკური მონაცემების ზედმიწევნით დაცვის შემთხვევაში, 1 ჰექტარზე ზე 5,2-5,3 ტონა სიმინდის სუფთა მარცვლის მიღებაა შესაძლებელი და შემოსავალი აქედან 6 ათას ლარს აღემატება. საერთოდ კი არსებობს მეცნიერების მიერ დასაბუთებული მონაცემები, რომელიც ნათლად ასახავს რეალურ სურათს ადგილების მიხედვით და ამას უნდა დავეყრდნოთ უპირველესად," _ თქვა მან.
რაც შეეხება მუშა ჯგუფის კიდევ ერთ ამოცანას _ მიწის რეალური ფასის განსაზღვრას, ჩახვაძის თქმით, ამ ეტაპზე ამის გარკვევა ვერ მოხერხდა: "ჩვენ წერილობით, ოფიციალურად მივმართეთ საჯარო რეესტრსა და ქონების მართვის სააგენტოს, მოგვაწოდონ მიწის ფასის შესახებ ინფორმაცია. პასუხი, ალბათ, პარასკევისთვის ან ორშაბათისთვის გვექნება და მომავალ სამშაბათს, სავარაუდოდ, ჯგუფი მორიგ სხდომას გამართავს და მიწის რეალურ ფასზეც იმსჯელებს".
ჯგუფის წევრებმა თავიანთ გამოსვლებში დააფიქსირეს, რომ მაქსიმალურად დაიცავენ მოსახლეობის ინტერესებს ისე, რომ არ დაზარალდეს სახელმწიფო ინტერესები. თუმცა, რამდენად მოხერხდება ამ ოქროს შუალედის გამოძებნა, ამას დრო გვიჩვენებს.
ალეკო ევგენიძემ გააჟღერა სუფსის მოსახლეობის მოთხოვნა, რომ ისინი უახლოეს დღეებში გამგეობის წინ გამაფრთხილებელი აქციის ჩატარებას აპირებენ: "საჯარო რეესტრი რატომღაც ბლოკავს ინფორმაციას 2010-14 წლების მიწის გაყიდვების მონაცემების შესახებ, რომელსაც დღემდე ვითხოვთ, მაგრამ ამაოდ. პარასკევს ვაპირებთ გამგეობასთან გამაფრთხილებელი აქციის ჩატარებას, სადაც პროტესტს სხვადასხვა ფორმით გამოვხატავთ".
აქციის ჩატარებას კატეგორიულად არ დაეთანხმა ჩახვაძე: " ჩვენ ხომ შეთანხმება გვქონდა, ამ ჯგუფს გარკვეული გადაწყვეტილების მისაღებად ერთი თვე მიეცემოდა და რატომ ვარღვევთ მას?" _ იკითხა მან.
"კონკრეტული ვადა არ თქმულა. კი, ბატონო, ცოტა ხანს კიდევ მოვიცდით, მაგრამ ასე თუ გაგრძელდა, აქციას მაინც ჩავატარებთ," _ უპასუხა ევგენიძემ.
აქცია კი გადაიდო, მაგრამ ორშაბათს ოზურგეთის სასამართლოში ექსპროპრიაციის თაობაზე პროცესია ჩანიშნული, სადაც ამ შეხვედრაზე მყოფი ზვიად სალარიძის მიწის ბედი უნდა გაირკვეს. ცხადია, რომ ამ გადაწყვეტილებაზე ბევრი რამ იქნება დამოკიდებული და მათ შორის, სუფსის მოსახლეობის შემდგომი ქმედებებიც.
