მიუხედავად სავაჭრო ობიექტების სიმრავლისა, ლანჩხუთში გარევაჭრობა მაინც "პრესტიჟულად" ითვლება, რაც, პირველ რიგში, იმ ადამიანების უკმაყოფილების საბაბია, რომლებიც ბაზარში ვაჭრობენ. მათი თქმით, აუცილებელია ადგილობრივმა ხელისუფლებამ შესაბამისი, კანონით გათვალისწინებულ ღონისძიებები გაატაროს და ყველა მოვაჭრე თანაბარ პირობებში ჩააყენოს.
_ რატომღაც გარევაჭრობა მხოლოდ რამდენიმე ადამიანისთვისაა ნებადართული. თუ კანონია და გარევაჭრობა დაუშვებელია, მაშინ ყველა თანაბარ პირობებში ჩაგვაყენონ. ქუჩის ერთ მხარეს ზამთარ-ზაფხულ ყველაფერი ღია ცის ქვეშ იყიდება, არ აქვს მნიშვნელობა, რძის ნაწარმია თუ თევზი. ჩვენ კი ვსხედვართ მთელი დღე ტყუილად _ ბაზარში დღის განმავლობაში თითო-ოროლა კაცი თუ შემოვა. გარემოვაჭრეები დღეში ათასობით ლარის საქონელს ყიდიან, ჩვენ კი თითო კაპიკის შემყურენი ვართ. ერთეულები "გაკეთდა" გარევაჭრობის ხარჯზე, ჩვენ კი, ვინც კანონს ვემორჩილებით, ადგილში გადასახადსაც ვიხდით, ბანკის ვალებში ვიხრჩობით.
ბოლოს, როცა ხმამაღლა პროტესტი გამოვთქვით, ადგილობრივმა ხელისუფლებამ ვითომ თავი შეიწუხა და რაღაც ღონისძიებების გატარება დაიწყო გარევაჭრობის წინააღმდეგ, თუმცა, შედეგი არც არაფერია. ჯოხი თხილის ჩამბარებლებზე გადატყდა _ ისინი აყარეს ადგილებიდან, დანარჩენი კი დარჩა ძველებურად _ პროდუქტი ისევ ქუჩაში, ანტისანიტარიასა და ნაგავში იყიდება, _ ამბობენ ბაზარში მოვაჭრეები.
აღსანიშნავია, რომ ჯერ კიდევ სექტემბრის დასაწყისში, გამგეობის ზედამხედველობის სამსახურმა მასშტაბური მონიტორინგი განახორციელა და გარემოვაჭრეებს კუთვნილ ფართებში შესვლისკენ მოუწოდა. გააფრთხილეს, რომ წინააღმდეგ შემთხვევაში, დაჯარიმდებოდნენ. აღნიშნულ ქმედებას, გარევაჭრობის აკრძალვის მოთხოვნით, "ქსენოვიჩის" ბაზრის თანამშრომელთა საპროტესტო აქცია უძღოდა. მაშინ, ერთი შეხედვით, ქალაქში წესრიგი დამყარდა, თუმცა, კანონმორჩილება მხოლოდ თხილის მიმღებებმა გამოიჩინეს _ პროტესტის გრძნობის მიუხედავად, ისინი გამგეობის მხრიდან მიღებულ გადაწყვეტილებას დაემორჩილნენ და დატოვეს საცურაო აუზის წინ მდებარე ფართი და იმავე შენობის უკან გადავიდნენ. თუმცა, რამდენიმე დღეში თხილით მოვაჭრეები სხვებმა ჩაანაცვლეს _ აქაურობა ქართლიდან შემოტანილი ხორბლით დატვირთული მიკროსატვირთო მანქანებით გადაივსო, ახლა კი კახური ყურძნით მოვაჭრეები დგანან.
_ ჩვენ მაშინ ვითხოვეთ, რომ თხილის სეზონის დამთავრებამდე მოეცათ ვადა, მომდევნო წლიდან კი, სადაც გვეტყოდნენ, იქ გადავიდოდით, მაგრამ რატომღაც არავინ გაითვალისწინა ჩვენი თხოვნა. დაგვატოვებინეს ადგილი, უცხო თვალისთვის ლამაზად არ ჩანს აქაურობაო და რა მივიღეთ?! ჩვენ შენობის უკან გადაგვიყვანეს, თვალს მიეფარეთო და უცხოებს მისცეს იქ ვაჭრობის უფლება, _ ამბობენ თხილის რეალიზატორები.
ლანჩხუთის ცენტრში არსებული მდგომარეობა რიგითი მოქალაქეების უკმაყოფილებასაც იწვევს: "ისეთი მდგომარეობაა ქალაქის ცენტრში, რომ ფეხის გადადგმა ჭირს. ბაზარი, მაღაზიები, ავტობუსებისა თუ ტაქსების გაჩერება და ქუჩაში მოვაჭრეები _ ყველაფერი ერთმანეთშია არეული. აქვე პირველი საჯარო სკოლა და "ავერსის" კლინიკაცაა. ასი თვალი და ყურია საჭირო გზის გასაკვლევად, რომ რამე ხიფათს არ გადაეყარო. ბავშვი სკოლიდან რომ გამომყავს, ხელი მაგრად მაქვს ჩაჭიდებული, მანქანა არ დაეჯახოს. ამ საკითხს როგორღაც უნდა მოევლოს და ვიღაცამ უნდა იზრუნოს წესრიგის დამყარებაზე," _ ამბობს ერთ-ერთი მოქალაქე.
გარე ვაჭრობის პრობლემებთან დაკავშირებით კომენტარისთვის გამგეობის ზედამხედველობის სამსახურის უფროსს თენგიზ ხელაძეს მივმართეთ: "კარგი რა, ნუ ხართ ეს ჟურნალისტები ჩასაფრებულის პოზიციაში. ახლა არ მცალია, მალე თავად დაგირეკავთ და კომენტარსაც გავაკეთებ", _ გვითხრა სატელეფონო საუბარში ხელაძემ. მოგვიანებით ის თავად შეგვეხმიანა: "მაქსიმალურად ვცდილობთ, გარევაჭრობას ვებრძოლოთ, ყოველდღიურად ვაწარმოებთ შემოვლას, პოლიციაც გაფრთხილებული გვყავს. ძირითადად, გარემოვაჭრეები ქალაქის ქუჩებში საღამოს საათებში გამოდიან. რაც შეეხება თხილის ჩამბარებლების ერთი ადგილიდან მეორეზე გადაყვანას, ვფიქრობ, ძალიან კარგი საქმე გავაკეთეთ ამით. ადრე ვერ გაივლიდი იქ, ახლა ვერ ამჩნევთ, რომ თავისუფლად გადაადგილებაა შესაძლებელი?! კი, დროდადრო დგებიან მანქანები და ვაჭრობენ, მაგრამ ფაქტია, რომ ადრე თუ ათი მანქანა იდგა, ახლა ორი კინკილაა. სასიკეთო ცვლილებები ნამდვილად არის და ეს უნდა დაინახოს ყველამ", _ გვითხრა ხელაძემ.
