"საქართველო არის ერთგული, მყარი კანდიდატი ნატოს წევრობის," – განაცხადა ნატოს გენერალური მდივნის თანაშემწის მოადგილემ ჯეიმს აპატურაიმ სასტუმრო "ჰოლიდეი ინნში" სამხრეთ კავკასიის უსაფრთხოების III ფორუმსა და საქართველოს თავდაცვისა და უსაფრთხოების კონფერენციაზე. ღონისძიების I სესია ევროატლანტიკური უსაფრთხოების და ნატოში ინტეგრაციის თემას მიეძღვნა. გამომსვლელებს შორის იყვნენ საქართველოს თავდაცვის მინისტრი თინათინ ხიდაშელი, საქართველოს ევროპულ და ევრო-ატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე, ნატოს გენერალური მდივნის თანაშემწის მოადგილე ჯეიმს აპატურაი, ესტონეთის ელჩი ნატოში ლაური ლეპიკი და საქართველოში ევროკავშირის სადამკვირვებლო მისიის ხელმძღვანელი კესტუტის იანკაუსკასი.
სესიას "ევროატლანტიკური უსაფრთხოება: საქართველო – ნატოს ერთგული ასპირანტი აღმოსავლეთით" მოდერატორობას საქართველოს თავდაცვის მინისტრის ყოფილი მოადგილე, მიხეილ დარჩიაშვილი უწევდა. სესიაზე საქართველოს თავდაცვის მინისტრმა ნატოს ვარშავის სამიტისა და დეკემბრის მინისტერიალის მნიშვნელობაზე ისაუბრა, სადაც მისი განცხადებით, რუსეთის მიმართ მკაფიო, პირდაპირი და ძლიერი გზავნილები უნდა გაჟღერდეს: "თუ ვარშავის სამიტზე რუსეთს არ უთხრეს, რომ აღარ არსებობს გავლენის სფეროები, რომ ევროპა არ დაუშვებს ახალი რკინის ფარდის ჩამოშვებას, რომ რუსეთს ვერ ექნება ვეტოს უფლება იმ ქვეყნებზე, რომლებსაც ხმის უფლებაც კი არ აქვთ – ეს იქნება ჩვენი მხრიდან სისუსტის გამოვლინება და კრემლის გამარჯვება, რომელიც მას შემდგომი აგრესიისკენ უბიძგებს".
რუსეთის უარყოფით როლზე ბალტიისპირეთსა და შავი ზღვის აუზში ისაუბრა ნატოს გენერალური მდივნის თანაშემწის მოადგილემ ჯეიმს აპატურაიმაც. მან ნატოს გაფართოების პოლიტიკაზეც გაამახვილა ყურადღება და აღნიშნა, რომ ნატოს კარი ღია უნდა დარჩეს ასპირანტი ქვეყნებისთვის. "საქართველოს ადგილი ნატოში არის ნათელი და მზარდი. მისი ჩართულობა კი ყველაზე მაღლა დგას არაწევრ ქვეყნებთან მიმართებაში.“ აპატურაის განცხადებით, ნატო საქართველოში ყველაზე მასშტაბურადაა წარმოდგენილი, იქნება ეს განათლების თუ სხვა მიმართულებით.
კონფერენციის ფარგლებში დღეს კიდევ ორი სესიაა დაგეგმილი. მონაწილეები საინფორმაციო ომსა და მის სტრატეგიულ შედეგებზე, ასევე ვარშავის 2016 წლის სამიტამდე ნატოსა და მისი პარტნიორების შესახებ იმსჯელებენ.
