ამ ადამიანებს ყოველდღიურად ვხვდებით, ვესაუბრებით, ზოგიერთთან ვმეგობრობთ, მაგრამ ძალიან ცოტამ თუ იცის, რა პირობებში ცხოვრობენ ისინი.
ე. წ. "ჩოხატაურის სპორტკომპლექსი" კომუნისტურ პერიოდში აიგო, თუმცა, მას შემდეგ ფუნქციონირება ვერ დაიწყო. უფუნქციო შენობაში უსახლკარო ოჯახი პირველად 22 წლის წინ შევიდა. დღეს იქ 7 ოჯახი ცხოვრობს. ყველა მათგანი, სახელმწიფოსეული გაგებით, სოციალურად დაუცველია, ადამიანური ენით კი _ ღატაკი.
_ 22 წლის წინ შემოვედით აქ. ერთ ოთახში ოთხი სული ვცხოვრობთ. მეუღლე ერთი წლის წინ გარდამეცვალა. ჩვენი შემოსავალი პენსია და სოციალური დახმარებაა, _ გვეუბნება ყარაჯაშვილების ოჯახის დიასახლისი, რომელიც ჩვენთან საუბრისას ცრემლებს ვერ მალავს.
_ ჩემი შვილი სპორტსმენი იყო. საქართველოს ნაკრებშიც თამაშობდა, თუმცა, ავარიის შედეგად სპორტს თავი დაანება, _ გვაცნობს ახალგაზრდა ქალიშვილს, რომელიც დედასთან ერთად, ავარიულ სახლი უმამოდ ზრდის ორ პატარას.
_ ამას თუ ცხოვრება ჰქვია, ვცხოვრობთ _ არავინ ყურადღებას არ გვაქცევს. სამი წლის წინ, როცა სახურავის ნაწილი სტიქიისგან დაზიანდა, გუბერნატორის ჩათვლით, ყველას შევეხმიანეთ, მაგრამ არაფრად ჩაგვაგდეს. ალბათ, აქ მცხოვრებლები ადამიანებად არ მივაჩნივართ, _ გვიყვება ლუიზა ყარაჯაშვილი, რომელსაც უამრავი დიპლომი და სიგელი საგულდაგულოდ აქვს შენახული _ ცდილობს, წვიმამ არ დაუსველოს.
_ აქ გაჭირვების გამო ვცხოვრობთ _ სხვაგან არ გვაქვს წასასვლელი, თორემ აქ როგორ იცხოვრება?! შუაფარცხმაში გვქონდა სახლი, რომელიც სტიქიამ დაგვიზიანა და მას შემდეგ აქ ვართ შემოხიზნულები. არაფერს ვითხოვთ, გარდა იმისა, რომ სახურავი მაინც შეაკეთონ, _ დასძინა ლუიზამ.
აქ მცხოვრები ოჯახები გასათბობ შეშას მდინარის პირზე ან ახლო-მახლო ტერიტორიაზე ეძებენ: _ გასულ წელს, გამგეობას ვთხოვეთ და არ დაგვეხმარა. წელს აღარ მოგვითხოვია _ რა აზრი აქვს? _ გვითხრეს ყარაჯაშვილებმა.
ამავე ბინაში ორ მცირეწლოვან შვილთან ერთად ცხოვრობს ნარგიზ ჩხაიძე. ორივე შვილი აქ გაზარდა, ოთახში, რომელსაც არც იატაკი აქვს და არც ფანჯარა. ქარის და წვიმისაგან დაცვას ფანჯრის რაფაზე გაკრული ტომრის ნაგლეჯით ცდილობს, თუმცა, ვერ ახერხებს. ოთახში, სადაც სამი ადამიანისთვის მხოლოდ ერთი საწოლი დგას, წვიმა ჩამოდის. აქ მცხოვრები ოჯახები თანხმდებიან, რომ ყველაზე ცუდ პირობებში ჩხაიძეების ოჯახია. არადა, ყველა მათგანი გაუსაძლის პირობებში ცხოვრობს.
ქალბატონო ნარგიზს უფროს ვაჟს ბევრი ნატვრა აქვს, ყველაზე მეტად კი ფერადი ტელევიზორი უნდა.
_ ეს არ უჩვენებს. მეც მინდა, ჩემი კლასელებივით ფერად ტელევიზორში ვუყურო მულტფილმებს, _ ამბობს პატარა.
ნარგიზი დასუფთავების სამსახურში მუშაობს. ყოველთვიური ანაზღაურება _ 140 ლარი და სოციალური დახმარება საკვებისთვის ძლივს ყოფნით.
სოციალური დახმარების იმედადაა მეგრელიძეების ოჯახი _ დედა და არასრულწლოვანი შვილი, მეზობლების მსგავსად გაუსაძლის მდგომარეობაში, შეძლებისდაგვარად, ცდილობს თავის გატანას. ოჯახის დიასახლისი, იმისთვის, რომ 15 წლის შვილს არაფერი მოაკლდეს, სხვადასხვა ოჯახში დამხმარედ მუშაობს:
_ ხან რას მაძლევენ და ხან _ რას. გაჭირვებით გაგვაქვს თავი. ჩემი დაც მეხმარება _ ყოველ თვე ერთ ტომარა პურის ფქვილს მაძლევს. ეს დიდი შეღავათია ჩემთვის. სოციალური დახმარება ბავშვს რვეულისთვის და სხვა სასკოლო ინვენტარისთვის ყოფნის, _ ამბობს მეგრელიძეების ოჯახის დიასახლისი.
ვარდოსანიძეების 7-სულიანი ოჯახის ერთადერთი შემოსავალიც სოციალური დახმარებაა: _ ამ შენობაში არც წყალია და არც გაზი. წასასვლელიც არსად გვაქვს. 22 წელია, აქ ვცხოვრობთ. ცოტა ხნის წინ მეუღლე დამეღუპა და, შესაბამისად, შემოსავალიც მოგვაკლდა, _ გვითხრა ნუნუ ვარდოსანიძემ.
უფროსებთან საუბარში პატარებიც ჩაერთვნენ და სურვილები გაგვიმხილეს _ სათამაშოები, წიგნები, ბურთი, თოჯინა _ ეს არასრული ჩამონათვალია იმ ნივთებისა, რომლებიც პატარებს ძალიან უნდათ.
_ ბავშვები არიან და არ ესმით, _ პატარების გაჩერებას ეცადნენ უფროსები, რომლებსაც იმ ყოფიდან გამომდინარე, რომელშიაც ცხოვრობენ, სხვა სურვილები აქვთ: _ თავშესაფარი, სადაც არ წვიმს; შემოსავალი, რომლითაც ოჯახს არჩენენ, წყალი და გაზი, მით უმეტეს, რომ იქვე მეზობლად ცენტრალური გაზსადენიც გადის.
აქ მცხოვრები ადამიანების თქმით, დაბის რწმუნებული, გოჩა ჯინჭარაძე ერთადერთი ადამიანია, ვინც მათი ამბით ინტერესდება: _ ბევრჯერ ჯიბის ფულით დაგვხმარებია, _ ამბობენ შენობაში მცხოვრები ადამიანები და იმ იმედით გვაცილებენ, რომ იქ "ზემოთ", თბილ სავარძელში მოკალათებული ადამიანი ან ადამიანები ერთ დღეს მათი ბედითაც დაინტერესდებიან და მათ დროებით საცხოვრებელში, ყოველი წვიმის დროს, საწოლების გადაადგილება, დასველების თავიდან ასაცილებლად მაინც აღარ გახდება საჭირო.
