იუსტიციის მინისტრის ყოფილი მოადგილის დავით ჯანდიერის განცხადებით, „იუსტიციის მინისტრის მიერ დღეს მთავარი პროკურორის პოსტზე სამი კანდიდატის წარდგენა (შერჩევა) ეწინააღმდეგება პროკურატურის შესახებ საქართველოს კანონის მოთხოვნებს“.
"კერძოდ:1. კანონის 9 პრიმა (1) მუხლის მიხედვით, იუსტიციის მინისტრი მთავარი პროკურორობის კანდიდატების შესარჩევად იწყებს კონსულტაციებს აკადემიურ წრეებთან, სამოქალაქო საზოგადოების წევრებთან და სამართლის დარგის სპეციალისტებთან. აღნიშნული კონსულტაციები 1 თვის განმავლობაში მიმდინარეობს.
მოცემულ შემთხვევაში, იუსტიციის მინისტრმა შეხვედრები გამართა კანდიდატებთან, რომელთა წარდგენის უფლება ამ კანონის 9.1 პრიმა მუხლის საფუძველზე აქვთ უმაღლესი სასწავლებლებს ან სამოქალაქო საზოგადოების ორგანიზაციებს, თუმცა იუსტიციის მინისტრს არ გაუმართავს კონსულტაციები აკადემიურ წრეებთან, სამოქალაქო საზოგადოების წევრებთან და სამართლის დარგის სპეციალისტებთან, როგორც ამას კანონი მოითხოვს (ამგვარი ინფომაცია არ არის განთავსებული საპროკურორო საბჭოს ვებგვერდზე და თუკი ამგვარი კონსულტაციები გაიმართა, პროცესი აბსოლუტურად გაუმჭვირვალეა, ვინაიდან საზოგადოებას არა აქვს ინფორმაცია ვინ არიან ის სპეციალისტები, ვისთან ერთადაც იმსჯელა მინისტრმა და მიიღო შესაბამისი წარდგენის შესახებ გადაწყვეტილება). შესაბამისად, მთავარი პროკურორის შერჩევის კანონით გათავლისწინებული პროცედურა დარღვეულია. იუსტიციის მინისტრს კანონი არ ანიჭებს ერთპირონულად თვითნებურად სხვა აქტორთა ჩართულობის გარეშე მიიღოს გადაწყვეტილება მთავარი პროკურორის კანდიდატების საპროკურორო საბჭოსთვის წარდგენის შესახებ, მით უფრო, რომ კანონი ითვალისწინებს მხოლოდ მთავარი პროკურორობის შერჩეული კანდიდატის წარდგინების (და არა სხვა კანდიდატთა უარყოფის) დასაბუთებას.
2. ვერავითარ კრიტიკას ვერ უძლებს სამივე შერჩეულ კანდიდატთან დაკავშირებული "დასაბუთება" იმის შესახებ, რომ სამივე კანდიდატი "იზიარებს იმ რეფორმატორულ კურსს სისხლის სამართლის სფეროში, რომელსაც ხელმძღვანელობს საქართველოს იუსტიციის მინისტრი" (იხ. წარდგინებაში კანდიდატის "ძლიერი მხარეები"). აღნიშნული ჩანაწერი მიანიშნებს იმას, რომ მთავარი პროკურორის კანდიდატის შერჩევა არ ეფუძნებოდა კანონით განსაზღვრულ ობიექტურ კრიტერიუმებს, როგორიც არის ზნეობრივი და პროფესიული თვისებები და ავტორიტეტი (იხ. კანონის 9.1 პრიმა მუხლით მთავარი პროკურორის კანდიდატისთვის დადგენილი კრიტერიუმები), არამედ სუბიექტური ფაქტორს – იუსიტიციის მინისტრის "რეფორმის" მიმართ ლოიალობას“, _ წერს ჯანდიერი საკუთარი "ფეისბუკის" გვერდზე და დასკვნის სახით დასძენს, რომ „მთავარი პროკურორის თანამდებობაზე კანდიდატთა წარდგინება არ შეესაბამება პროკურატურის შესახებ საქართველოს კანონის მოთხოვნებს“.
შეგახსენებთ, რომ იუსტიციის მინისტრმა თეა წულუკიანმა საპროკურორო საბჭოს მთავარი პროკურორობის კანდიდატებად ვლადიმერ გაბრიჩიძე, ნანა რევაზიშვილი და ირაკლი შოთაძე დღეს წარუდგინა.
ხვალ, 19 ნოემბერს, საპროკურორო საბჭოს ფორმატში სამივე კანდიდატს გაესაუბრებიან, რის შემდეგაც ფარული კენჭისყრის წესით არჩევნები გაიმართება. საპროკურორო საბჭო თითოეულ კანდიდატს ცალ-ცალკე უყრის კენჭს.
მთავარი პროკურორობის კანდიდატი გახდება ის, ვინც ხმათა 2/3-ს დააგროვებს. ამგვარად დამტკიცებულ კანდიდატს, საპროკურორო საბჭოს სახელით, იუსტიციის მინისტრი მთავრობას წარუდგენს. მთავრობის თანხმობის შემთხვევაში, კანდიდატი საბოლოო არჩევნებისთვის პარლამენტს წარედგინება
ცნობისთვის, არასამთავრობო ორგანიზაციებმა, ექსპერტებმა, აკადემიურმა წრეებმა პროკურორობის კანდიდატებად ვლადიმერ გაბრიჩიძე, ლაშა გოლუბიანი, ლენა კაპანაძე, ნანა რევაზიშვილი, პაატა შავაძე, ირაკლი შოთაძე და კოტე ჭილაია დაასახელეს. ერთმა კანდიდატმა კახა კახიშვილმა თავად მოხსნა საკუთარი კანდიდატურა.
