“რაკი რუსული გვარისაა ჩემი ოჯახის წევრი, ამის გამო უნდა ვიდევნებოდეთ? ჩავალ თბილისში, შვეიცარიის საკონსულოში მივალ და მოვითხოვ, მომცენ სხვა ქვეყნის მოქალაქეობა. აბა, რა ვქნათ, სად წავიდეთ, გეკითხებით!”
ოზურგეთის მუნიციპალიტეტის დაბა ნარუჯაში მცხოვრებ ტიავხიბია მუზიუკოვას საცხოვრებელი სახლის მეორე სართულზე ასასვლელი კიბე, ოზურგეთის მუნიციპალიტეტის გამგეობის ზედამხედველობის სამსახურს 23 თებერვალს უნდა მოეშალა. ტიავხიბია მუზიუკოვამ სარჩელით ოზურგეთის რაიონულ სასამართლოს უკვე მეორედ მიმართა.
_ მუზიუკოვა ოზურგეთის მუნიციპალიტეტის დაბა ნარუჯაში, ორსართულიან საერთო საცხოვრებელში ცხოვრობდა და ამ ბინით წლების განმავლობაში სარგებლობდა. საცხოვრებლის პირველი სართულზე, ნარუჯაში იმ დროს არსებული მეურნეობის მიერ გაცემული ორდერის საფუძველზე, სარგებლობის უფლება ჰქონდა მოქალაქე ირმა პაპიძეს. მუზიუკოვას სარგებლობის დამადასტურებელი დოკუმენტი დღესაც არ აქვს. მან ამ ბინაზე ყოველგვარი ნებართვის და პროექტის გარეშე კიბე მიაშენა. ზედამხედველობის სამსახურმა დაინტერესებული პირის, ირმა პაპიძის განცხადების საფუძველზე შეამოწმა ზემოხსენებული ბინა. მუზიუკოვამ განაცხადა, რომ კიბე მისი აშენებული იყო, თუმცა მშენებლობის დამადასტურებელი დოკუმენტი ვერ წარმოადგინა. ზედამხედველობის სამსახურმა დაიწყო ადმინისტრაციული წარმოება და მუზიუკოვას მისცა გაფრთხილება, რომლის ვადა 23 თებერვალს იწურებოდა. საქმე კვლავ სასამართლოშია და აქედან გამომდინარე, სანამ არ იქნება სასამართლო გადაწყვეტილება, კიბის მონგრევის უფლება არ აქვთ, _ აცხადებენ მუნიციპალიტეტის გამგეობაში.
_ პაპიძემ ბინის პრივატიზება ახლა, გარკვეული წლების შემდეგ მოითხოვა და კუთვნილი ბინიდან გამოასახლა მუზიუკოვას ოჯახი. ამ უკანასკნელმა კი სასამართლოში სარჩელი შეიტანა იმ მოტივით, რომ პაპიძეებს ბინის ყალბი ორდერი აქვთ და პრივატიზაციის გაუქმება მოითხოვა, _ მუზიუკოვას უფლებების დამცველის, სოფო არობელიძის თქმით, მოსამართლემ არ მოითხოვა ექსპერტიზის ჩატარება. თუმცა, როგორც იურისტები ამბობენ, სასამართლოს ადმინისტრაციული წარმოების დროს შეუძლია, თვითონ გამოითხოვოს მტკიცებულებები ან დაავალოს მხარეს მტკიცებულების უზრუნველყოფა. როცა მეორე მხარე დოკუმენტის სინამდვილეს ეჭვქვეშ აყენებს, მას უნდა გამოეყო ხარჯები და გაეგზავნა ექსპერტიზაზე, შემდეგ კი წარმოედგინა სასამართლოზე.
ამ ეტაპზე საქმე სასამართლოშია, რათა მუზიუკოვას კიბის დანგრევის პროცესი შეჩერდეს; მუზიუკოვა ბინის მოსარგებლედ ცნობას სააპელაციო სასამართლოში ითხოვს. ის, ამასთანავე, პაპიძის ბინის პრივატიზაციის გაუქმებასაც ითხოვს.
ტიავხიბია მუზიუკოვას რძალი “გურია ნიუსთან” საკუთარ პრობლემებზე საუბრობს: _ ჩემი დედამთილი, ტიავხიბია მუზიუკოვა წარმოშობით ულიანოვკიდანაა. იგი 1957 წელს ჩამოვიდა ნარუჯაში და მას მერე ამ ბინაში ცხოვრობს. ამის მოწმეები არიან მეზობლები, ნარუჯის მცხოვრებლები. ჩვენს ბინაში მეორე სართულზე ამოსასვლელი ხის კიბე, სიძველის გამო, დალპა და ჩაინგრა. პირველ სართულზე არავინ ცხოვრობდა და 1989 წლის შემდეგ ამ ფართსაც ჩვენ ვსარგებლობდით. ბინის მოდავე 1989 წელს კერძო სახლში გადავიდა, ჩვენს მოსაზღვრედ. პირველ სართულს ვსარგებლობდი, იქ ვინახავდი ზამთრის სანოვაგეს და ყველა სამეურნეო საშუალებას; იქ მქონდა საზაფხულო სამზარეულოც, ამიტომ დავშალეთ ის ძველი ხის კიბე და 2006 წელს ახალი ქვის კიბე ავაშენეთ სხვა მხარეს. მაშინ ცოცხალი იყო მოდავის მამა, რომელმაც გვითხრა, კიბე წინ არ წამოსწიოთ, სახლს დაგვიფარავსო. ამიტომ იძულებული გავხდით, პირველ სართულზე აშენებული კიბე სამჯერ მოგვეშალა. კიბის აშენება მაშინ 2500 ლარი დამიჯდა. ახლა სამუშაო არსად არის, ყველანი უმუშევრები ვართ. ჩვენი ბინა, სადაც 5 სული ვცხოვრობთ, ავარიულ მდგომარეობაშია. შვილები სეზონურ სამუშაოს ხანდახან შოულობენ; მე შრომისუუნარო ვარ; ჩემი მეუღლე, ვიტალი მუზიუკოვი აფხაზეთის ომის ვეტერანია და უკვე ოთხი-ხუთი წელია ვწვალობთ, რომ ვეტერანის საბუთი გავაკეთოთ, რათა 22-ლარიანი დახმარების მიღება შევძლოთ.
მეუბნებიან, კიბე უნდა დაანგრიოო. რა ვქნა, გეკითხებით?! კიბეს რომ მოშლიან, მეორე სართულზე საიდან ავიდე?! ჩემი მეუღლე დაბარებული ჰყავდათ და უთხრეს, ბინის “ორდერი” აქვს მოდავეს და ბინა დაუცალეთო. ასეც მოვიქეცით, გამოვიტანეთ ყველაფერი, მეზობლებში გვქონდა მიბარებული შესანახად. ერთი კვირის მერე კი გვითხრეს, ახლა კიბე დაშალეთო. პაპიძეს ყველანაირად ვუმტკიცებთ სასამართლოში, რომ ყალბი ორდერი აქვს. ზედ კანცელარიის ბეჭედი არის დასმული. მაშინ ბინის გაცემა კანცელარიის ბეჭდით არ ხდებოდა _ დირექტორის ბეჭდით უნდა ყოფილიყო დამოწმებული. ორდერის ნომრად მითითებულია რიცხვი 59, თუმცა ამავე ნომრით გაცემულია დირექტორის ბეჭდით დამოწმებული სხვა ორდერი. მერე რა მოხდა, მექანიკური შეცდომაა და განმეორდა ნომერიო, _ გვითხრა მოსამართლემ. _ ახლა სააპელაციოში მაქვს საქმე, არანაირ ყურადღებას არ გვაქცევენ. მოსამართლე გიორგი ზვიადაძემ გამამტყუნებელი განაჩენი გამოგვიტანა, კიბე უნდა მოშალოთო. 60 წელია, ჩემი დედამთილი ამ ბინაში ცხოვრობს, არავინ შემოგვდავებია, მაგრამ ახლა ჩვენზე ძალადობენ და გვეუბნებიან, არ გეკუთვნითო.პრაკი ჩემს დედამთილს რუსის გვარი აქვს, იმიტომ არ გვეკუთვნის? აბა, რა არის სხვა მიზეზი? _ საკუთარ ეჭვს გამოთქვამს მუზიუკოვას რძალი, მაყვალა მუზიუკოვამ, _ ჩემი დედამთილი 30 წლის განმავლობაში მუშაობდა ნარუჯის მეურნეობაში. აქვს უამრავი ორდენი, შრომის ვეტერანია. ჩავალ თბილისში, შვეიცარიის საკონსულოში მივალ და მოვითხოვ, მომცენ სხვა ქვეყნის მოქალაქეობა. რა ვქნათ, აბა?
ჩვენ დავუკავშირდით საქართველოს იურისტთა ასოციაციის წევრს, ტიავხიბია მუზიუკოვას ინტერესების დამცველს, ადვოკატ სოფო არობელიძეს, რომელიც მიიჩნევს, რომ მოსამართლე გიორგი ზვიადაძის მიერ მიღებული გადაწყვეტილება არაკანონიერია.
_ არასათანადოდაა შეფასებული გარკვეული მტკიცებულებები, რომლებიც მნიშვნელოვანი იყო საქმეზე ობიექტური გადაწყვეტილების მისაღებად. საერთოდ არ გამოიკვლიეს და უგულებელყვეს მტკიცებულებები. ჩვენი არაერთგზის მოთხოვნისა, არ არის გამოთხოვილი ორდერის დედანი, მიუხედავად იმისა, რომ დავის უშუალო საგანი ორდერის ბათილად ცნობა და ორდერზე აღმოცენებული სამართლებრივი აქტების ბათილად ცნობაა. შესაბამისად, საკითხავია, რის საფუძველზე გახდა ირმა პაპიძე სადავო ბინის მესაკუთრე და რეგისტრირებული საჯარო რეესტრში. ორდერი ჩვენთან წარმოდგენილია ქსეროასლის სახით. როგორც გამგეობის წარმომადგენელმა აღნიშნა, დედანი იყო და დღესაც არის გამგეობაში, მაგრამ მის წარმოდგენაზე უარი განაცხადეს. ორდერის ქსეროასლზე შეუიარაღებელი თვალითაც აშკარად ეტყობა გადასწორების კვალი _ ციფრი გადასწორებულია. ახლა სააპელაციო სასამართლოში არის საქმე და ვნახოთ, იგი როგორ გადაწყვეტს, _ აღნიშნავს არობელიძე და დასძენს, რომ “1957 წლიდან, იმ დღიდან, როდესაც ტიავხიბია საქართველოში ჩამოვიდა, მუშაობდა ნარუჯის მეურნეობაში, იყო მოწინავე მუშა, დაჯილდოებული იყო რამდენიმე მედლითა და ორდენით. იმ დროს მოქმედი კანონი, მას გარკვეულ უპირატესობებს აძლევდა ბინათსარგებლობასთან დაკავშირებით. 1987 წლიდან, როცა მან პირველი სართულიც დაიკავა, წინააღმდეგობა არავის გაუწევია და აგრძელებდა ცხოვრებას ჩვეულებრივ, ორივე სართულზე. მხოლოდ 2011 წლის ოქტომბერში, პოლიციის ძალით მოვიდა რამინ პაპიძე, მოდავე ირმა პაპიძის ძმა და წარმოადგინა ყალბი ორდერი. ამბობდა, მე მაქვს ამ ბინის ორდერი, საკუთრების მოწმობა და საჯარო რეესტრიდან ამონაწერი, რომ ბინა რეგისტრირებულია ირმა პაპიძეზეო. პოლიციამ ოჯახი გააფრთხილა, დაცალეთ ნებაყოფლობითო. მუზიუკოვებმაც დაცალეს და განცხადებაც მაშინვე შეიტანეს სასამართლოში, საკუთარი დარღვეული უფლებების დასაცავად. პაპიძეების ოჯახს არასოდეს გამოუთქვამს პრეტენზია როცა მუზიუკოვები 2006-2007 წლებში კიბეს მათ თვალწინ აშენებდნენ. ახლა კი რამინ პაპიძემ მიმართა ზედამხედველობის სამსახურს და მოითხოვა, მოეშალათ კიბე. სწორედ ეს საკითხი დგას დღის წესრიგში _ ველოდებით, რა გადაწყვეტილებას მიიღებს ოზურგეთის რაიონული სასამართლო. რაც შეეხება კანონიერ მოსარგებლეებს, მათ წინააღმდეგ, ფაქტობრივად, პრეტენზიას პაპიძეები ვერ აცხადებენ. პრეტენზია ამ შემთხვევაში განაცხადა გამგეობამ, იმ მიზეზით, რომ ჩვენ არ მოგვმართა და პირდაპირ მიმართა სასამართლოსო. სასამართლომ კი, შესაძლებელია, უსახლკაროდ დატოვოს მუზიუკოვას ოჯახი”, _ გვითხრა სოფო არობელიძემ.
ოზურგეთის მუნიციპალიტეტის გამგეობის ზედამხედველობის სამსახურის უფროსი შუქრი გაბრიჩიძე “გურია ნიუსთან” საუბარში აღნიშნავს: _ ეს პროცესი შეჩერებული იქნება, რადგან საქმე კვლავ სასამართლოშია და რა გადაწყვეტილებასაც გამოიტანს, იმის მიხედვით ვიმოქმედებთ.
