„გურიის რეგიონში არსებული მძიმე საგადასახადო წნეხი და ბიზნეს გარემო, სწორედაც რომ არის პასუხი იმაზე, რატომ ვერ მოხვდა საქართველო „ბლუმბერგის“ მიერ გამოქვეყნებული ხელსაყრელი ბიზნეს გარემოს მქონე ქვეყნების ჩამონათვალში“ -ეს განცხადება “ახალი მემარჯვენეების” ეკონომიკური მიმართულების ხელმძღვანელმა ლევან კალანდაძემ დღეს ოზურგეთის მუნიციპალიტეტში, „დემოკრატიული ჩართულობის ცენტრში“, გააკეთა.
ბრიფინგის დაწყებამდე, ის მცირე და წვრილ მეწარმეებს შეხვდა. ლევან კალანდაძემ მეწარმეებს პარტიის პროგრამა „ახალი მემარჯვენეები მცირე ბიზნესისათვის“ და პარტიის ძირითადი ეკონომიკური პრიორიტეტები გააცნო, რაც ეკონომიკურად აქტიური და ბიზნესში ჩართული მოქალაქეებისათვის ბიზნესის წარმოების გამარტივებასთან და ბიზნეს გარემოს გაუმჯობესებასთან დაკავშირებულ ინიციატივებს ითვალისწინებს. მეწარმეებთან შეხვედრაზე ასევე, ისაუბრეს გურიის მხარეში დღეს არსებულ პრობლემებზე, მათი გადაჭრის გზებზე.
მთავარი პრობლემა, რაც რეგიონის წვრილ და მცირე მეწარმეებს აწუხებთ, არის მძიმე საგადასახადო წნეხი, რაც ზედმეტად მკაცრ საგადასახადო ადმინისტრირებასა და დასჯის დრაკონული მეთოდების გამოყენებაში გამოიხატება. სამწუხაროა, მაგრამ გურიის რეგიონში საგადასახადო მოხელეების უმთავრეს მიზანს მეწარმესთან პარტნიორული ურთიერთობების და დახმარების აღმოჩენის ნაცვლად, ჯერ კიდევ მათი დაჯარიმება და დანაშაულში „გამოჭერა“ წარმოადგენს. ამისთვის, ხშირად იყენებენ ე.წ. კერძო საგადასახადო ინსპექტორის ინსტიტუტს, რომელიც არც თუ იშვიათთად საკუთარი უფლებამოსილების გადამეტების ხარჯზე, დაშინებისა და მუქარის გზით ახორციელებს მეწარმეების საგადასახადო დევნას. მცირე მეწარმეები ხშირად ჩივიან და უკმაყოფილებას გამოთქვამენ, რომ გურიის რეგიონში სალარო აპარატი და ე.წ. ჩეკი კვლავ მთავარ სადამსჯელო ინსტრუმენტს წარმოადგენს საგადასახადო ორგანოების ხელში.
„სანამ საგადასახადო დევნა და მცირე მეწარმეების დატერორება არ დასრულდება ამ რეგიონში, ბიზნესის განვითარებასა და ბიზნეს გარემოს გაუმჯობესებაზე მთავრობის მხრიდან საუბარი ყოველთვის უადგილო იქნება. და, რაოდენ სამწუხაროა, რომ ეს დევნა განსაკუთრებით დაუნდობელი და სასტიკი სწორედ არჩევნების მოახლოვების დროს ხდება” – განაცხადა კალანდაძემ.
მან ასევე კომენტარი გააკეთა „ბლუმბერგის“ მიერ გუშინ გამოქვეყნებულ კვლევაზე, რომლის მიხედვითაც, იმ 50 ქვეყნის ჩამონათვალში, სადაც ბიზნესის კეთებისთვის ხელსაყრელი გარემოა, საქართველო ვერ მოხვდა. „გურიის რეგიონში არსებული მძიმე საგადასახადო წნეხი, ხელისუფლების მიერ შეზღუდული ბიზნეს გარემო და შევიწროებული მცირე მეწარმეები, და ზოგადად, საქმიანობისთვის გაუსაძლისი პირობები სოფლად, სწორედაც რომ არის პასუხი იმაზე, რატომ ვერ მოხვდა საქართველო „ბლუმბერგის“ მიერ გამოქვეყნებული ხელსაყრელი ბიზნეს გარემოს მქონე ქვეყნების ჩამონათვალში“ – აღნიშნა კალანდაძემ.
