სამთავროს დედათა მონასტერში, გიორგობის დღესასწაულზე მომხდარ ინციდენტს პოლიცია ამ დრომდე იძიებს.
მეუფე ილარიონ სამხარაძე და მისი თანმხლები პირი კი, მონასტრის წევრებს ფიზიკურ ანგარიშსწორებაში ადანაშაულებენ და ფაქტის დროულად გამოძიებას ითხოვენ.
საქართველოს საპატრიარქოში აცხადებენ, რომ ინციდენტი ტაძარში მეუფე ილარიონისა და მისი თანმხლები ქალბატონის მიერ წირვის ჩაშლის მცდელობას მოჰყვა. თუმცა, როგორც პატრიარქის მდივანი მამა მიქაელ ბოტკოველი ამბობს, მეუფე ილარიონი და მისი თანმხლები ქალბატონი არავის უცემია. საპატრიარქოში ასევე განმარტავენ, რომ რომ ილარიონ სამხარაძე მოქმედი მღვდელმთავარი არ არის და ამიტომ ინციდენტი ტაძარში მრევლის მიმართ მისმა მოწოდებებმა გამოიწვია.
მომხდარზე გამოძიება ცემის მუხლით მიმდინარეობს. მოწმის სტატუსით სამართალდამცავებმა უკვე რამდენიმე პირი დაკითხეს, მათ შორის, მეუფე ილარიონ სამხარაძის თანმხლები ქალბატონი ნათია სირაძე. ასევე, ჩატარებულია ექსპერტიზაც, თუმცა პასუხი ჯერჯერობით უცნობია.
მეუფე ილარიონ სამხარაძის თანმხლები პირი ნათია სირაძე „გურია ნიუსთან“ საუბრისას ამბობს, რომ ნებისმიერ დროს შეუძლია იმ სასულიერო პირის ამოცნობა, რომელმაც ილარიონ სამხარაძეს შეურაცხყოფა მიაყენა.
"მე მისი სახე კარგად მახსოვს როგორ დაეჯაჯგურა მეუფეს. ჯერ ხალხს არ აძლევდა მეუფესთან მისვლის უფლებას, ეუბნებოდა, ის არ არის ეპისკოპოსი და არ მიხვიდეთო. ეჯიკავებოდნენ ხალხს, უკან ხელს კრავდნენ და აგდებდნენ. როცა ხმამაღლა იყვირა არ მიხვიდეთო, მაშინ მეუფემ კვერთხი დაარტყა. ვუთხარი, ხალხს რატომ ატყუებთ, არ დაიღალეთ ამდენი ტყუილით-მეთქი?!. ამის შემდეგ მოვიდა, მეუფეს ხელზე დაეჯაჯგურა. ვუთხარი რეებს კადრულობთ-მეთქი, ამის თქმა და ჩემი ტაძრიდან ცემით გაყვანა ერთი იყო. ბეჭებზე და თავში მირტყამდნენ. უკან მოტრიალებას ვცდილობდი და მეუფესთან დაბრუნებას, მაგრამ ამ დროს ტაძრის კარები ჩაკეტეს", _ ამბობს სირაძე.
მისივე თქმით, არსებობს ფაქტის ამსახველი ვიდეოკადრები, თუმცა გამოძიების ინტერესებიდან გამომდინარე, ის ჟურნალისტებისთვის ფირის გადმოცემაზე უარს აცხადებს.
"სასამართლო პროცესზე წარვადგენთ ამ კადრებს. ჯერჯერობით არც პოლიციისთვის მიგვიწოდებია, ამას თავისი პროცესუალური ნორმები აქვს და აუცილებლად გადავცემთ პოლიციას", _ ამბობს სირაძე.
გარდა ამისა, სირაძე ამბობს, რომ შემთხვევის დროს ტაძარში წირვა არ იყო და მათი მხრიდან არც რაიმე ხელშეშლას ჰქონია ადგილი.
რაც შეეხება მეუფე ილარიონისთვის უფლებამოსილების შეჩერებას, სირაძე ამბობს, რომ საპატრიარქოში ტყუიან, როდესაც აცხადებენ, მეუფე ილარიონმა თავისი სურვილით დაწერა განცხადება და პენსიაზე გავიდა. სირაძე ამ განცხადების გამოქვეყნებას ითხოვს.
რას ყვება მეუფე ილარიონ სამხარაძე მომხდართან დაკავშირებით და ვის ადანაშაულებს ცემაში, "გურია ნიუსის" ინტერვიუდან შეიტყობთ.
