დღეს, ლანჩხუთის საკრებულო რიგგარეშედ შეიკრიბა და მიმდინარე წლის ანგარიშზე პირველი სხდომა გამართა, რომელსაც სულ 23 დეპუტატი ესწრებოდა და დღის წესრიგის თანახმად ხუთი საკითხი განიხილეს.
პირველი საკითხი დეპუტატთა სამსჯავროზე მუნიციპალიტეტის გამგებელმა, ზაზა ურუშაძემ წარმოადგინა, რომელიც 2016 წლის ბიუჯეტში ცვლილების განსახორციელებლად ადმინისტრაციული წარმოების დაწყებას გულისხმობს. დანარჩენი ოთხი საკითხი კი, განსახილველად გამგეობის სოციალური სამსახურის უფროსმა თამარ ფირცხალაიშვილმა გამოიტანა.
ფირცხალაიშვილმა თავის გამოსვლაში სოციალური დახმარების გაცემისა და მიღების წესზე, მიმდინარე წლის სოციალური პროგრამების დამტკიცების შესახებ, სოციალურ-კულტურული ღონისძიებების დაფინანსებასა და ამ ღონისძიებების პროგრამების დამტკიცებაზე ისაუბრა.
პირველივე სხდომაზე საკრებულოს წევრმა დარეჯან ბურჭულაძემ შენიშვნით საკრებულოს თავმჯდომარეს გოგი ხელაძეს მიმართა და უსაყვედურა, რომ ისეთი მნიშვნელოვანი საკითხის განხილვა, როგორიც სოციალური პაკეტია, სოციალურ საკითხთა კომისიას დაჩქარებული წესით მოუწია.
"ძალიან კარგი ბატონო გოგი დღის თორმეტ საათზე არ გეთქვათ, რომ ოთხი საათისთვის კომისიის სხდომააო, ორზე ბიურო იყო ჩანიშნული. დაჩქარებული წესით მოხდა ყველაფერი, ზოგმა დეპუტატმა, მიუხედავად სურვილისა, ვერ შესძლო კომისიას დასწრებოდა. მძიმე საცხოვრებელ პირობებში მცხოვრებთათვის ერთჯერადი დახმარების გასაწევად გასულ წელს 173 500 ლარი გაიხარჯა, წელს კი მხოლოდ 125 ათასი ლარია გათვალისწინებული, რაც ჩემი აზრით, არასაკმარისია. გარდა ამისა, ნამდვილად მისასალმებელია C ჰეპატიტით დაავადებულთა დაფინანსებაც, თუმცა, ვფიქრობ, ეს პაკეტიც კიდევ ერთხელ გადასახედია", -განაცხადა ბურჭულაძემ.
ხმაურიანი იყო რომან ბიწაძის განცხადება სოციალურ პაკეტთან დაკავშირებით.
"ჩვენი ბიუჯეტის 11, 1 % იხარჯება სოციალურ პაკეტზე, როცა გასულ წელს ამ კუთხით ბიუჯეტიდან 21,6% იყო მიმართული. ჩოხატაური ჩვენზე პატარა რაიონია და ჩვენზე მეტი იხარჯება იქ სოციალურ პროგრამებზე, წელს 533 ათასი ლარი აქვთ გათვალისწინებული, ოზურგეთს ჩახედავ -მეტია, ბორჯომში მეტია, წყალტუბოშიც და ა.შ. გამოდის, მარტო ჩვენთანაა კლება, არადა, ადგილობრივ შემოსვალს სამ მილიონნახევრამდე ვზრდით", –განაცხადა ბიწაძემ.
"როგორ, ჩოხატაურს ჩვენზე მეტი აქვს?! – არ მჯერა, ამ წუთას გადავურეკავ გამგებელ კუჭავას და გავიგებ", _ მიმართა ურუშაძემ ბიწაძეს და სასწრაფოდ ტელეფონიც მოიმარჯვა ჩოხატაურის გამგებელთან დასაკავშირებლად.
მარამ სატელეფონო დიალოგის შემდეგ რა პასუხი მიიღო ჩოხატაურელი კოლეგისგან, ეს ბატონ ზაზას აღარ გაუმჟღავნებია და ბიწაზესთან მისი პოლემიკა ამით ამოიწურა.
თუმცა, ბიწაძისგან განსხვავებით, მისმა კოლეგამ, ადამ ხუხუნაიშვილმა კმაყოფილება გამოხატა, რომ წლევანდელი ბიუჯეტი არ არის ძირითადად სოციალურზე ორიანტირებული და ერთ-ერთ პრიორიტეტად სპორტის დაფინანსებაა.
"ჩემი აზრით, ძალიან კარგია რომ სპორტს ასეთი ყურადღება ექცევა, მაგრამ გასათვალისწინებელია გამოიკვეთოს სპორტის ის სახეობები, რომელიც მეტად პრიორიტეტულია და მეტ მხარდაჭერას საჭიროებს", _ აღნიშნა ხუხუნაიშვილმა, რაზეც გამგებელიც დაეთანხმა.
