ლანჩხუთის მუნიციპალიტეტის 2016 წლის ბიუჯეტში მორიგი ცვლილების გასახორციელებლად საკრებულოს წევრებს მესამედ მოუხდათ რიგგარეშედ შეკრებილიყვნენ. სწორედ, სხდომათა ეს რაოდენობა გახდა 18 თებერვლის სხდომის ძირითადი ინტრიგა.
საკრებულოს თავმჯდომარის შესავალი სიტყვის შემდეგ, საკითხზე მოხსენება გამგეობის საფინანსო-საბიუჯეტო სამსახურის უფროსმა როლანდ ლაშხიამ გააკეთა. საკრებულოს ტრიბუნიდან კიდევ ერთხელ ითქვა, რომ რეგიონებში გასახორციელებელი პროექტების ფონდიდან, მთავრობის განკარგულებით, ლანჩხუთის მუნიციპალიტეტს 3 419 997 ლარი გამოეყო. ამასთან, კანონის შესაბამისად, მუნიციპალიტეტების ვალდებულებაა რეგიონებში გასახორციელებელი პროექტების ფონდიდან დასაფინანსებელი პროექტების თანადაფინანსება. აქედან გამომდინარე, ლანჩხუთის ბიუჯეტის საშემოსავლო გადასახადის გეგმა, ამ ეტაპზე უნდა გაიზარდოს 80 ათასი ლარითო.
როგორც ირკვევა, მთლიანობაში თანადაფინანსებისთვის 180 ათასი ლარი უნდა გაიღოს მუნიციპალიტეტმა. აქედან, 50 ათასი ლარი უკვე აისახა წლის პირველ რიგგარეშე სხდომაზე, ხოლო 80 ათასის ასახვა ამ სხდომაზე მოხდა. დარჩენილი 50 ათასის მოძიება კი სამერმისო საქმეა და, სავარაუდოდ, ეს თანხა სოფლის მხარდაჭერის პროგრამების კლების ხარჯზე მოხდება, რაც შემდგომ ინფრასტრუქტურული თანხების შემცირებით შეივსება.
ოპოზიციონერმა დეპუტატმა გია გოგუაძემ აღნიშნული პროცესი გააპროტესტა:
"ჩვენმა ფრაქციამ ("ლანჩხუთი-ევროატლანტიკური მომავლისთვის") და საფინანსო-საბიუჯეტო კომისიამ განიხილა აღნიშნული საკითხი და შესაბამისი დასკვნაც დაიდო, თუმცა, დღეს წარმოდგენილ მოხსენებაში ამ დასკვნიდან არაფერია გათვალისწინებული. ჩვენ ერთი თვის განმავლობაში ოთხჯერ შევიკრიბეთ, აქედან, სამჯერ რიგგარეშედ, იმისთვის, რომ ელემენტარული საკითხი მიგვეღო. 3 419 997 ლარიდან მილიონ 100 ათასი ლარი გასული წლის 29 დეკემბერს ავსახეთ 2016 წლის ბიუჯეტში, რაც შეეხება 2 მილიონ სამასი ათას ლარს, რომელიც წელს გამოიყო ინფრასტრუქტურული პროექტებისთვის, ამას სჭირდება თანადასაფინანსებლად არა 50 ათასი და 80 ათასი ლარი, არამედ მთლიანობაში, 180 ათასი ლარი, რის წინააღმდეგიც ჩვენ არ ვართ, მით უმეტეს, კანონი იძლევა ამის ვალდებულებას. უბრალოდ, ვსვამ კითხვას _ როცა 2016 წლის ბიუჯეტს ვამტკიცებდით და ვიცოდით, რომ მილიონ 100 ათასი უკვე ბიუჯეტში იდო, მაშინ რატომ არ გავითვალისწინეთ თანადაფინანსების თანხა?! თანაც ის გამოდის, რომ ეს მილიონ 100 ათასი თანხა ხელმეორედ უნდა აისახოს ბიუჯეტში. ჯერ 50 ათასი ლარი დავამატეთ, მეორე სხდომაზე 80 ათასი ლარის მოთხოვნით შემოვიდა გამგეობა და ბოლოს ირკვევა, რომ სულ 180 ათასი ლარი ყოფილა საჭირო. აქვე იმასაც გეტყვით, რომ კანონი გვავალდებულებს რეგიონში გასახორციელებელი პროექტების ფონდიდან დაფინანსებული პროექტები თანადაფინანსდეს 15%-ით, მაგრამ ქვეყნის მდგომარეობისა და ადგილობრივი ბიუჯეტის გათვალისწინებით, მთავრობამ #176 განკარგულების საფუძველზე, დაავალა მუნიციპალიტეტებს, რომ 5% ჩადონ ადგილობრივ შემოსავლებში, დანარჩენს კი ფინანსთა სამინისტრო უზრუნველყოფს, რაზეც აქ არაფერი თქმულა", _ გია გოგუაძემ.
გოგუაძის შენიშვნებზე კომენტარი მუნიციპალიტეტის გამგებელმა ზაზა ურუშაძემ გააკეთ:
"ამდენი ხანია გისმენთ და ერთი პროცენტი სიმართლე არ გითქვამთ. იმისთვის, რომ ფინანსთა სამინისტრო დაგვეხმაროს და ჩვენი ბიუჯეტიდან არ წავიდეს თანხა, თუ ვინმესთვის საამისოდ საკრებულოს სხდომის მოწვევა სირთულეს წარმოადგენს, ეს მისი პრობლემაა. თავიდან ინფრასტრუქტურის სამინისტროსთან შეთანხმებულები ვიყავით, იმის გათვალისწინებით, რომ ჩვენს ბიუჯეტს საკმარისი შემოსავლები არ გააჩნია, 50 ათასი ლარის თანადაფინანსებით გამოგვეყოფოდა თანხა. ამის დასტურად წერილიც გვაქვს. შემდეგ სხვა მუნიციპალიტეტებმაც მოითხოვეს, ზოგმა _ 80 ათასი ლარი, ზოგმა _ 30 ათასი ლარი და ასე შემდეგ. საბოლოოდ, ჩვენსა და ფინანსთა სამინისტროს შორის სიტყვიერი შეთანხმება მოხდა, რომ 80 ათასი ლარი ასახულიყო ჩვენი ბიუჯეტის შემოსავლების მუხლში, სამინისტრო კი ამას შემდეგ დაგვიფინანსებდა. მგონი, ამაში ცუდი არაფერია, თუკი ვინმე სხვაგვარად ფიქრობს, მაშინ ფინანსთა სამინისტროს მადლობა გადავუხადოთ და ჩვენი ბიუჯეტიდან გავწიოთ ეს ხარჯი! ისე, ჩვენ დამატებით კიდევ ველოდებით თანხებს და საკრებულოს სხდომის მოწვევა რატომ უნდა გახდეს პრობლემა?!" _ უკმაყოფილება ვერ დამალა გამგებელმა.
_ "მარტო ლანჩხუთს ეხმარება ფინანსთა სამინისტრო ასე? სხვებმა არ მიმართეს თხოვნით, შემოსავლებში გვიჭირს და დაგვეხმარეთო. თუ სიტყვიერი შეთანხმება "მოსული პონტია" თქვენსა და ფინანსთა სამინისტროს შორის"? _ იკითხა კახა ასკურავამ.
_ არა, ჩოხატაურმაც მოითხოვა 30 ათასი ლარი და უარი მიიღო. ასეც ხდება, ზოგს აძლევენ, ზოგს _ არა. ფინანსთა სამინისტროსთან ურთიერთობაში ეს "მოსული პონტია", _ ღიმილით უპასუხა ურუშაძემ.
დასმულ კითხვებზე ლაშხიამაც გააკეთა კომენტარი, რომელმაც ამ თანხების განაწილების მიზეზები ახსნა:
"2016 წლის ბიუჯეტი, რომელიც ჩვენ განსახილველად შემოვიტანეთ, მუნიციპალიტეტის შემოსავლებიდან გამომდინარე, მაქსიმალური ოდენობით იყო განსაზღვრული, შემდეგ წავედით რისკზე და ისედაც დაძაბული ბიუჯეტი კიდევ უფრო დავძაბეთ ნახევარი მილიონით, რითაც ყველა არსებული რესურსი ამოვწურეთ. 180 ათასი ლარი ერთდროულად იმიტომ ვერ ავსახეთ, რომ იანვრის შემოსავალს, ფაქტობრივად, ვერ ვპოულობთ", _ თქვა ლაშხიამ.
ამ საკმაოდ გულახდილმა პასუხმა, დარბაზში მშვიდი გარემო შექმნა და საკითხი კენჭისყრაზეც დადგა. საბოლოოდ, დარბაზში მყოფი 26 დეპუტატიდან საკითხს მხარი მხოლოდ ორმა არ დაუჭირა.
