შემთხვევით არაფერი ხდება ამქვეყნად: ყოველ ადამიანს ღვთისგან განსაკუთრებული მისია აქვს მინიჭებული _ რუსუდან ზენაიშვილის ამქვეყნად არსებობის გამართლება მის მიერ დაარსებული სასულიერო გიმნაზიაა.
სამრევლო სკოლაში, 19 აპრილს, ქალბატონი რუსუდანის დაბადების სამოცდამეორე წლისთავი მის გარეშე აღნიშნეს.
ლანჩხუთის იოანე ნათლისმცემლის სახელობის სამრევლო სკოლა (ყოფილი სასულიერო გიმნაზია) 1995 წელს დააარსეს რუსუდან ზენაიშვილმა, ია ჩხაიძემ და მოხალისეთა მცირე გუნდმა. სკოლას დაარსებიდან რუსუდან ზენაიშვილი ხელმძღვანელობდა. ლანჩხუთის მოსახლეობა წლების განმავლობაში ადევნებდა თვალს, როგორ იზრდებოდა და იკრეფდა ძალებს სულიერების ახალი კერა პატარა ქალაქში.
შუხუთის წმინდა გიორგის ეკლესიის მოძღვარი, მამა საბა (ჟღენტი) იხსენებს: “სკოლის მშენებლობაში მეც ვიღებდი მონაწილეობას, მაგრამ მაშინ სასულიერო პირი არ ვიყავი. საჭირო გახდა რამდენიმე შიდა კედლის გამონგრევა. მე ვანგრევდი, ქალბატონ რუსუდანს და რამდენიმე ქალს კი საკუთარი ხელით გაჰქონდათ ნაგავი. სკოლის მშენებლობაში ლანჩხუთში ახლად დანიშნული მღვდელი მამა სვიმეონი (სვანიძე) მონაწილეობდა. იგი აღფრთოვანებული იყო რუსუდანის შემართებით, ძლიერი ხასიათით. კიდევ ერთი გარემოებას მინდა ხაზი გავუსვა: დღეს ლანჩხუთში არის ხალხი, რომელთაც სურთ ახალი სკოლების დაარსება, აქვთ კიდეც საამისო რესურსი, მაგრამ ამას მაინც ვერ ახერხებენ. იმ დროისთვის ნამდვილად აკლდა რაღაც ლანჩხუთს და ეს სასულიერო სკოლა იყო. მადლობა უფალს, რომ დღეს ასეთი არაჩვეულებრივი სკოლა აქვს ჩვენს ქალაქს, რაშიც რუსუდან ზენაიშვილის წვრილი განუსაზღვრელია”.
ლევან გიორგაძე, სკოლის სასწავლო ნაწილის გამგე: “ჩვენ გამუდმებით ვგრძნობთ ქალბატონი რუსუდანის უხილავ მხარდაჭერას. მისი ბოლო სიტყვები იყო: “გიმნაზიას მიხედეთ”. ყველა დიდ ადამიანს მთელი სიცოცხლე ახასიათებს იდეისთვის ბრძოლა და მისთვის თავგანწირვა. იგი იყო “საქმით მეტყველი სული”.
რუსუდან ზენაიშვილი უმძიმესი დაავადებით შარშან გარდაიცვალა. ხანმოკლე დროით იავადმყოფა, მაგრამ მძიმე განსაცდელის ჟამსაც კი მისთვის ყველაზე მთავარი სკოლა და მისი აღსაზრდელები იყვნენ.
ქალბატონი რუსუდანის დაბადების დღის აღსანიშნავი საღამო ძალიან მოკრძალებულად ჩატარდა და სასიამოვნო ფაქტით დასრულდა _ ამიერიდან სკოლის ფასადზე დამაგრებული მემორიალური დაფა ყველას შეახსენებს, რომ ამ სკოლას, დაარსებიდან სიცოცხლის ბოლომდე, რუსუდან ზენაიშვილი ხელმძღვანელობდა.
