ჩოხატაურის მუნიციპალიტეტში, ბოლო დროს შტატების არნახული მატებაა _ გამგეობაში თითქმის ყოველ დღე ახალი კადრი ინიშნება. როგორც ამბობენ, თანამშრომლები სკამებზე მორიგეობით სხდებიან, რადგან გამგეობაში მათი სამყოფი არც მაგიდაა და არც სკამი. მაგალითად, გამგეობის მუნიციპალური შესყიდვებისა და მატერიალურ ტექნიკური უზრუნველყოფის სამსახურში სამი ადამიანი მუშაობს _ სამუშაო ოთახში კი მხოლოდ ორი მაგიდა დგას; კულტურის სამსახურში სამი მაგიდაა და ხუთი თანამშრომელი; იურიდიული და ანალიტიკური სამსახური გამგებლის თანაშემწის პატარა ოთახშია შეხიზნული, სადაც სამ პატარა მაგიდას 5 ადამიანი მორიგეობით უსხდებიან (ამ თემაზე ვრცელ მასალას ჩვენ უახლოეს ნომერში შემოგთავაზებთ. ავტ).
გაზრდილია ადმინისტრაციული სამსახურის თანამშრომელთა რაოდენობაც, რომლებსაც მეტად უცნაური, ხანდახან კომიკური ფუნქციები აქვთ მინიჭებული _ ჩოხატაურის მუნიციპალიტეტის ვებგვერდზე განთავსებული ინფორმაციის თანახმად, სოფიკო ჯინჭარაძე გამგეობის ადმინისტრაციული სამსახურის სპეციალისტის მოვალეობის შემსრულებელია საგარეო ურთიერთობების საკითხებში! ეს ის ჯინჭარაძეა, რომელიც “გურია ნიუსის” გადამღებ ჯგუფს ადმინისტრაციულ შენობაში არ უშვებდა მოტივით, რომ ასეთი ბრძანება ჰქონდა მიღებული და რომელმაც ისიც კი არ იკადრა, ზემდგომისთვის ჩვენი იქ ყოფნის და კანონიერი მოთხოვნის შესახებ ეცნობებინა.
“საგარეო ურთიერთობების სპეციალისტის”, რომელიც პროფესიით ჟურნალისტია, საშინაო პოლიტიკა იმდენად მკაცრი იყო, რომ დავინტერესდით, რას აკეთებს საგარეო მიმართულებით. თუმცა, ჯინჭარაძის თქმით, აღმოჩნდა, რომ 28 მარტიდან, ის საგარეო ურთიერთობის სპეციალისტი აღარ არის:
_ 2012 წლის 28 მარტს, ადმინისტრაციული სამსახურის დებულებაში შევიდა ცვლილება, რის საფუძველზეც შემეცვალა ფუნქცია _ ამჟამად ვარ სპეციალისტი ტერიტორიულ ორგანოებთან ურთიერთობის საკითხებში. შესაბამისად, მევალება მათთვის საჭირო ინფორმაციის მოძიება და მიწოდება. ჩემი უშუალო ფუნქციაა გამგეობასა და ტერიტორიულ ორგანოებს შორის ინფორმაციის გაცვლის უზრუნველყოფა(?!), _ აღნიშნა ჩვენთან საუბრისას ჭინჭარაძემ
ჩოხატაურის მუნიციპალიტეტის საკრებულოს 28 მარტის #17 დადგენილებით, “ჩოხატაურის მუნიციპალიტეტის გამგეობის ადმინისტრაციული სამსახურის დებულების დამტკიცების შესახებ”, საკრებულოს 2011 წლის 11 იანვრის #3 დადგენილებაში ცვლილებები შევიდა და დამტკიცებული დებულების მე-2 მუხლი ჩამოყალიბდა შემდეგი რედაქციით: სამსახურის უფროსი, სამსახურის თანაშემწე, საქმისწარმოებისა და საინფორმაციო მომსახურების განყოფილების უფროსი, სპეციალისტები და მდივან რეფერენტი.
აღნიშნულ დადგენილებაში მითითებული არ არის, თუ რის სპეციალისტები ჰყავს ამ სამსახურს. ჯინჭარაძე ამბობს, რომ “დებულებაში წერია ზოგადად _ სპეციალისტი, საშტატო ნუსხით კი დაზუსტებულია სპეციალისტების საქმიანობის სფეროები”.
ჯინჭარაძის თვიური ანაზღაურება 420 ლარს შეადგენს.
“გურია ნიუსის” კითხვაზე, დანიშვნიდან დღემდე, ვისთან დაამყარა საგარეო ურთიერთობები და რა სახის, ჯინჭარაძის პასუხი ასეთია:
_ ჩემი ამ თანამდებობაზე დანიშვნის შემდეგ _ 2012 წლის 6 თებერვლიდან, მუნიციპალიტეტის მხრიდან ოფიციალური ვიზიტები არ დაგეგმილა.
_ 6 თებერვლიდან 28 მარტამდე რას აკეთებდით?
_ აქტიურად ვმონაწილეობდი ადმინისტრაციული სამსახურის საქმიანობაში, კერძოდ, ვეხმარებოდი მოქალაქეთა მიღების რეგულაციაში…
_ გასაგებია, მაგრამ თქვენ ხომ საგარეო ურთიერთობების სპეციალისტი იყავით? სწორედ ეს გვაინტერესებს _ რა გააკეთეთ საგარეო ურთიერთობების კუთხით?
_ მაგ კითხვაზე პასუხი უკვე გაგეცით.
_ ანუ, არაფერი?
_ ამ დროის განმავლობაში ადმინისტრაციული სამსახურის საქმიანობაში აქტიურად ვიყავი ჩაბმული, _ გვითხრა ჯინჭარაძემ, თუმცა, არ დააკონკრეტა რაში გამოიხატებოდა მისი აქტიურობა _ სავარაუდოდ, “გურია ნიუსის” ჟურნალისტებისთვის მუშაობაში ხელის შეშლაში.
და ბოლოს, ჩინოვნიკმა, რომელიც 28 მარტამდე საგარეო ურთიერთობების სპეციალისტი იყო, არ იცის არც ერთი უცხო ენა _ მისი თქმით, მას ესმის ინგლისური და რუსული, თუმცა, ამ ენებზე ლაპარაკს ვერ ახერხებს(?!).
როგორც ჩანს, ჩოხატაურის გამგეობას საგარეო საქმიანობად სამტრედიასთან, მარტვილთან ან ქობულეთთან დიპლომატიური ურთიერთობების დამყარება მიაჩნია, რასაც უცხოური ენის ცოდნა არ სჭირდება, თუმცა, არც ამ მუნიციპალიტეტების დელეგაციების სტუმრობით არიან მაინცდამაინც განებივრებული ჩოხატაურელები, რომლებიც ხელფასს უხდიან ათასგვარ “სპეციალისტებს”.
