ბრიტანელმა მოყვარულმა განძის მაძიებელმა დეივ კრისპმა საუკუნის აღმოჩენა გააკეთა.
ფორუმში, სომერსეტის საგრაფოში, მეტალოდეტექტორის საშუალებით ერთ-ერთი ვრცელი მინდვრის გამოკვლევისას, მან თავის ხელსაწყოზე დიდი ანომალია შენიშნა, მიწა გათხარა და რომაული მონეტებით სავსე დიდი ზომის თიხის ქოთანი იპოვა.
აღმოჩენისთანავე კრისპმა ადგილობრივ ადმინისტრაციას შეატყობინა, ადგილი მკაცრად გაასაიდუმლოეს და ლონდონიდან არქეოლოგების ჯგუფი გამოიძახეს. მიწის 30-სანტიმეტრიანი სისქის ქვეშ დამალულმა უძველესმა განძმა ათასწლეულების შემდეგ პირველად იხილა მზის სინათლე.
ქოთანში მოთავსებული იყო რომის იმპერიის დროინდელი 52 ათასი მონეტა, რომელთა უმრავლესობა დათარიღებულია ახალი წელთაღრიცხვის მესამე საუკუნით.
კოლექციაში როგორც ვერცხლისა და სპილენძის, ასევე ოქროს მონეტებია. მეცნიერთა ვარაუდით, ეს განძი ვინმე კონკრეტული მდიდარი ადამიანის გადამალული არ უნდა იყოს. მათი აზრით, მოცემულ განძს უფრო საკულტო დანიშნულება ჰქონდა და ღმერთებისადმი შეწირული სიმდიდრე იყო. ამჟამად ყველა მონეტა უკვე ბრიტანეთის მუზეუმის საკუთრებაა.
