ლანჩხუთის ცენტრში ერთ-ერთი მრავალსართულიანი სახლის ფასადზე სახელმწიფო პროგრამის "აწარმოე საქართველოში" გაკრული სარეკლამო ბანერი დღეს დილით ჩამოხსნილი დაგვხვდა. ამ ფაქტს წინა საღამოს გარკვეული ინცინდენტი უძღოდა "ქართული ოცნების" რამდენიმე აქტივისტის მხრიდან, რომელთა შორის ძირითადად ა(ა)იპ- "ტექ-სერვისის" თანამშრომლები იყვნენ.
საქმე ისაა, რომ გუშინ, სამუშაო საათების შემდეგ "ოცნების" რამდენიმე აქტიური მხარდამჭერი "აწარმოე საქართველოში" სარეკლამო ბანერის გაკვრას აპროტესტებდნენ "ერთიანი ნაციონალური მოძრაობის" ლანჩხუთის ოფისის თავზე. მათ პარტიის ოფისთან ნაგვის ურნა მიაგორეს და ზედ ასასვლელ კიბესთან წააქციეს.
მომხდარ ფაქტთან დაკავშირებით "გურია ნიუსი" დაუკავშირდა შპს "ჯი-ემ-სი-ჯის" დირექტორს მაია შიშნიაშვილს, რომლის თქმითაც, აღნიშნული ბანერის გასაკრავად ეს ადგილი შეირჩა კარგი ხედის გამო, რომელიც ყველა მხრიდან შესამჩნევია.
"ამ პროექტის მიზანი მხოლოდ პოზიტივის შექმნაა მოსახლეობაში. იგი ემსახურება მათ კეთილდღეობას, თუ ჩვენს მიერ შერჩეულ ადგილას ბანერის გაკვრით ვინმეს დისკომფორტი შეექმნა არა რის პრობლემა, სხვა ადგილს შევარჩევთ, მთავარია პროგრამამ მიზანმიმართულად იმუშაოს და მოსახლეობისთვის პოზიტიური საქმე აკეთოს", – გვითხრა ქალბატონმა მაიამ.
აღნიშულ შემთხვევასთან დაკავშირებით სოციალური ქსელის მეშვეობით კომენტარი გააკეთა "ჯი-ემ-სი-ჯის" გურიის რეგიონალური ოფისის ხელმძღვანელმა დავით გოგუაძემაც.
"ამ საცხოვრებელი სახლის მეორე სართულზეა განთავსებული შპს ჯი-ემ-სი-ჯის გურიის რეგიონალური ოფისი. რომელიც ემსახურება მოსახლეობას, უწევს კონსულტაციას, მიკრო და მცირე ბიზნესის ხელშეწყობის პროგრამაში მონაწილეობის მსურველ ყველა დაინტერესებულ ფიზიკურ პირს.ბანერი ემსახურება პროექტს,ეს კედელი შეირჩა კარგი ხედის გამო რომელიც ყველა მხრიდან არის კარგად შესამჩნევი.პროექტი ემსახურება მოსახლეობას,მათ კეთილდღეობას და დასაქმება.ეს მოსახლეობა არის ჩვენი სახელმწიფო და არა რომელიმე პოლიტიკური პარტია. ასე რომ ნუ აურევთ სახელმწიფოს მიერ კეთილი საქმის კეთებას პირად ინტერესებში", -წერს გოგუაძე სოციალურ ქსელში.
ცნობისთვის, აღნიშნული სახელმწიფო პროგრამის ფარგლებში, პირველ ეტაპზე ქვეყნის მასშტაბით 1620 ბენეფიციარია დაფინასებული, ხოლო ტრენინგი გაიარა 3110 ბენეფიციარმა. აქედან გურიის რეგიონში მთლიანობაში დაფინანსდა 220 ბენეფიციარი, რის შედეგადაც შეიქმნა 474 სამუშაო ადგილი. უშუალოდ ლანჩხუთის მუნიციპალიტეტში კი სახელმწიფო პროგრამიდან დაფინანსება მიიღო 99 ბენეფიციარმა და 191 სამუშაო ადგილი შეიქმნა.
