დღეს ფრაქცია "ლანჩხუთი-ევროატლანტიკური მომავლისთვის" სხდომაზე დეპუტატმა გია გოგუაძემ გააჟღერა ინფორმაცია, რომ დაცული ტერიტორიების ეროვნულმა სააგენტომ ეროვნული პარკის საზღვრებში ცხრა ათასი ჰა ფართობი დაარეგისტრირა ლანჩხუთის მუნიციპალიტეტის კუთვნილი ტერიტორიიდან.
"ეს საკითხი 15 წელზე მეტია სადაოა და ამ დროის განმავლობაში ყველა ადგილობრივი ხელისუფლება უარს ამბობდა ამ ტერიტორიის ეროვნული პარკის საზღვრებში დაკანონებაზე. მაინტერესებს, ვინ მოაწერა ადგილობრივი ხელმძღვანელობიდან ამას ხელი?"– კითხვით მიმართა გოგუაძემ გამგეობის ქონების მართვის სამსახურის უფროსს, გოგი ფაცურიას.
სამსახურის უფროსის თქმით, აღნიშნულის შესახებ მუნიციპალიტეტის ხელმძღვანელობისთვის მხოლოდ რამდენიმე დღის წინ, ლანჩხუთის სატყეო უბნის ხელმძღვანელისგან, ნუგზარ ჩხაიძისგან გახდა ცნობილი.
"ამის შესახებ ჩვენ ნუგზარ ჩხაიძისგან გავიგეთ, რომლის თქმითაც, რეგიონულ სამსახურში იყო დაბარებული ამ საკითხთან დაკავშირებით, სადაც მითითება მიიღო რომ ჭრები შეეჩერებინა გამოყოფილ ფართობზე. სწორედ ამის შემდეგ მოვიძიეთ ეს საკითხი, ამოვიღეთ ამონაწერები და ვნახეთ, რომ დაცული ტერიტორიების სააგენტომ რეგისტრაცია 2015 წლის ზაფხულში განახორციელა. არადა, ამასთან დაკავშირებით იმავე წლის მაისში ადგილობრივი საკრებულოს მხრიდან არაერთი დოკუმენტაცია და უარყოფითი დასკვნაა გაგზავნილი,"– აღნიშნა გოგი ფაცურიამ.
ეროვნულ პარკთან დაკავშირებით კომენტარი ვთხოვეთ საკრებულოს წევრ რომან ბიწაძეს, რომელიც ამ პრობლემის წარმოშობის დღიდან აქტიურადაა ჩაბმული პროცესებში და ყოველთვის მოსახლეობის ინტერესებს იცავდა. თუმცა, ბატონი რომანი გია გოგუაძის მხრიდან გაჟღერებულ ინფორმაციაში განსაკუთრებულს ვერაფერს ხედავს და მიიჩნევს, რომ ეს ბუნებრივი რესურსების დაცვის სამინისტროში მიმდინარე შიდა პროცესებია.
" თუ აქამდე ტყეების მონიტორინგს სატყეო ატარებდა, ახლა მას, როგორც ჩანს მიღებული აქვს დავალება კონკრეტულად იმ ფართობებზე ჩაატაროს მონიტორინგი, რომელიც სატყეო დეპარტამენტს ეკუთვნის. ამაში წარმოუდგენელი ნამდვილად არაფერი არ არის. რაც შეეხება საზღვრების დემარკაციას, აქაც არასწორ ინტერპრეტაციასთან და ხშირად უცოდინარობასთან გვაქვს საქმე. 1998-2002 წლების თვითმმართველობის კანონის თანახმად დაცული ტერიტორიების შექმნაზე გადაწყვეტილებას იღებდა ადგილობრივი საკრებულოები, თუმცა, 2002 წელს, კანონში შესული ცვლილების შემდეგ ასე აღარაა", – გვითხრა ბიწაძემ.
