"გურია ნიუსის" მიერ მოპოვებული ინფორმაციით, ტყიბულში მყოფი მეშახტეები დამსაქმებელი კომპანიის "საქართველოს ინდუსტრიული ჯგუფის" ("ჯი-აი-ჯი") ახალ ხელშეკრულებას ელოდებიან.
"ყველა სიტყვაზე, ყველა ნაბიჯზე ომი გვიწევს და არავინ იცის, ეს ბრძოლა სანამდე გაგრძელდება. გუშინ მოგვიტანეს ახალი ხელშეკრულებები, რადგან ჩვენთვის არ იყო მოსაწონი, ხელშეკრულების ახალ ვარიანტს სამ დღეში ველოდებით" – გვითხრა საგაფიცვო კომიტეტის წევრმა, ლევან ბეშკანაძემ.
მისივე თქმით, მეშახტეების ერთ ნაწილს ხელშეკრულებაზე ხელი ისე მოაწერინეს, რომ პირობები არ გააცნეს.
"ვიდრე არ მოხდება ყველა დეტალის გარკვევა, ხელშეკრულებაზე ხელს არ მოვაწერთ. ჩვენ ვიბრძვით იმისთვის, რომ არ დაირღვევს ჩვენი უფლებები და არ ვიმყოფებოდეთ მონურ მდგომარეობაში. იმ ხელშეკრულებაში, რომელიც წარმოადგინეს, ზუსტად ასეთ პირობებს გვთავაზობდნენ" – თქვა ჩვენთან სატელეფონო საუბრის დროს ლევან ბეშკანაძემ.
საქართველოს ნახშირისა და სამთო მრეწველობის პროფკავშირების თავჯდომარემ თამაზ დოლაბერიძემ "გურია ნიუსთან" საუბრის დროს თქვა, რომ ორი დღის წინ "ჯი-აი-ჯის" წარმომადგენლებმა ხელშეკრულებები გაუფორმეს მეშახტეებს.
"ჩვენს მიერ მოპოვებული ინფორმაციით, დაახლოებით 300 ადამიანთან მოახერხეს ხელშეკრულების დადება. კომპანიამ ცალმხრივად შეიმუშავა ხელშეკრულების ტექსტი და ცდილობდნენ მუშებთან გაეფორმებინათ ახალი კონტრაქტი ისე, რომ მუშებს არ ეძლეოდათ კონტრაქტის სახლში წაღების და იურისტებთან კონსულტაციების გავლის შესაძლებლობა. რამდენიმე მათგანმა ხელი მოაწერა ისე, რომ არ წაუკითხავს. ჩვენ დაგვიკავშირდა ის ხალხი, ვინც წაიკითხა ეს ხელშეკრულება და ამასთან დაკავშირებით პრესკონფერენციაც გავმართეთ. ვითხოვდით, რომ სასწრაფოდ შეეწყვიტა კომპანიას ხელშეკრულებების გაფორმება და პროფკავშირთან ერთად ყოფილიყო შემუშავებული ახალი კონტრაქტები. ხელშეკრულებაში ჩადებული პუნქტებით უქმდება ის შეთანხმება, რომელიც, რამდენიმედღიანი აქციების შემდეგ კომპანიასა და დასაქმებულებს შორის შედგა. ასევე ბათილდება შეთანხმება, რომლის მიხედვითაც, დასაქმებულებს ხელფასები ქვეყანაში არსებული ინფლაციის მიხედვით უნდა გაზრდოდათ. ჩვენ შევხვდით კომპანიის წარმომადგენლებს და მინდა გითხრათ, რომ ახალი ხელშეკრულების შემუშავებაში ჩავერთვებით." – გვითხრა თამაზ დოლაბერიძემ.
საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირის პრეზიდენტის ბატონ თამაზ დოლაბერიძის მიერ გამოთქმულ პრეტენზიებს არ იზიარებს საქართველოს ინდუსტრიული ჯგუფის ხელმძღვანელობა და აცხადებს, რომ დასაქმებულთათვის არ შეუზღუდავს ხელშეკრულების გაცნობისა და მასზე გონივრული ვადის ფარგლებში განსჯის შესაძლებლობა. ხოლო ხელშეკრულებებზე ხელმოწერები მხარეთა თავისუფალი ნების გამოვლენის პრინციპის ფარგლებში ხდება.
"2016 წლის 29 თებერვალს შპს "საქნახშირი (ჯი-აი-ჯი ჯგუფი)"-ს და დასაქმებულებს შორის გაფორმდა შეთანხმება, რომლის ერთ-ერთი ძირითადი პირობა იყო ეტაპობრივად სახელფასო განაკვეთების გაზრდა, რაც ჯამურად 10%-ით უნდა მომხდარიყო არაუგვიანეს 2016 წლის 1 აპრილიდან.
გამომდინარე იქიდან, რომ სახელფასო განაკვეთების ფაქტობრივად გაზრდა საჭიროებს მხარეთა შორის გაფორმებულ შესაბამის შრომით ხელშეკრულებებში ასახვას, კომპანიამ შეიმუშავა და დასაქმებულებს შესთავაზა ხელშეკრულებების ახალი პროექტები, რომლებიც სრულ შესაბამისობაშია საქართველოს მოქმედ კანონმდებლობასთან. შრომითი ხელშეკრულებების დასაქმებულთათვის გაცნობა და წარდგენა განხორციელდა მათი სამუშაო ცვლების შესაბამისად (რიგ შემთხვევაში ღამის საათებშიც), რადგანაც სამუშაო პროცესი კომპანიაში უწყვეტად, 24 საათიან რეჟიმში მიმდინარეობს.
2016 წლის 23 მარტს შედგა შეხვედრა კომპანიის ადმინისტრაციას, დასაქმებულთა ნაწილსა და პროფკავშირების წარმომადგენლებს შორის, რომლის ფარგლებშიც ადმინისტრაციამ ინფორმაცია მიაწოდა საზოგადოებას ბოლო 3 კვირის განმავლობაში გატარებული კონკრეტული ღონისძიებების თაობაზე უსაფრთხოების ნორმებისა და ტექნიკის შეძენასთან დაკავშირებით, მათ შორის გარემონტებული და ბოლო კვირების განმავლობაში ახლად შეძენილი ელმავლების, ძვირადღირებული კომბაინების შეძენის, ფეთქინივთიერებებების საწყობის მოდერნიზაციის, ძიძიგურის შახტაში მიმდინარე სარემონტო სამუშაოების, ამავე შახტის სასადილოს ფუნქციების აღდგენისა და სხვათა შესახებ. შეხვედრაზევე შეჯერდა პოზიცია, რომ უახლოეს დღეებში მოხდება ახალი შრომითი ხელშეკრულებების დეტალური დამუშავება, მათი მოქმედ შრომის კოდექსთან სრული შესაბამისობის დადასტურება და საბოლოო რედაქციაზე შეთანხმება.
კომპანიის განმარტებით, ახალი შრომითი ხელშეკრულებების გაფორმება წარმოადგენს ერთმნიშვნელოვან საფუძველს დასაქმებულთათვის გაზრდილი სახელფასო განაკვეთების ანაზღაურებისათვის და ისინი შრომის კოდექსის არც ერთ პირობასთან წინააღმდეგობაში არ მოდის, ამასთანავე არ ახდენს დასაქმებულთა უფლებების შეზღუდვას." – ამბობს საქართველოს ინდუსტრიული ჯგუფის ადმინისტრაციული დირექტორი ნინო ჯორბენაძე.
