მთიან ყარაბახში ვითარების დაძაბვას საერთაშორისო საზოგადოება დენთის კასრს ადარებს, რომელიც ნებისმიერ დროს შეიძლება აფეთქდეს და კატასტროფა გამოიწვიოს. კონფლიქტში ჩართული მხარეები ერთმანეთის მიმართ ურთიერთბრალდებებს არ იშურებენ.
ვითარება კი ასეთია, 1994 წელს დადებული ზავი დაირღვა.
აზერბაიჯანის თავდაცვის სამინისტრომ გუშინ გაავრცელა ცნობა ცეცხლის ცალმხრივად შეწყვეტის თაობაზე, რასაც ერევანი ხაფანგს უწოდებს.
აზერბაიჯანის მხარე 18 დაღუპული სამხედრო მოსამსახურის შესახებ იუწყება, ხოლო სომხეთის თავდაცვის უწყება აცხადებს, რომ დაწყებულ დაპირისპირებას უკვე ემსხვერპლა 12 სომეხი სამხედრო. მსხვერპლი არის მშვიდობიან მოსახლეობაშიც.
საერთაშორისო საზოგადოება დაპირისპირებულ მხარეებს ცეცხლის დაუყოვნებლივ შეწყვეტისკენ მოუწოდებს.
რამ გამოიწვია 1994 წელს მიღწეული ზავის დარღვევა, დამკვირვებლები ორ ვერსიაზე საუბრობენ. შესაძლოა ეს ერთ-ერთი მხარის მიერ ზავის პირობების შემთხვევით დარღვევა იყოს. მეორე ვერსიით, აზერბაიჯანმა არც ისე მასშტაბური ოპერაციის ჩატარება ბრძოლის ველზე ვითარების სათავისოდ შეცვლის სურვილით დაიწყო და როგორც ჩანს, გამოუვიდა კიდეც. მან რამოდენიმე დასახლებულ პუნქტზე კონტროლი აღადგინა.
საქართველოში ნატოს სამეთვალყურეო მისიის ხელმძღვანელი უილიამ ლაჰიუ მიიჩნევს რომ "კონფლიქტი განსაკუთრებით სახიფათოა, რადგან მან შეიძლება რეგიონული ხასიათი მიიღოს. სამხრეთ კავკასიის ლიდერებმა ყველაფერი უნდა გააკეთონ , რომ კონფლიქტი მშვიდობიანად მოგვარდეს. ნატო მხარს უჭერს მინსკის ფორმატს, რომელიც კონფლიქტის გადაწყვეტის საკითხებზე მუშაობს."-ამბობს ლაჰიუ.
ქართველი ექსპერტების და პოლიტოლოგების აზრით, თუ კონფლიქტი გამწვავდება, ეს ძალიან დიდი საფრთხე შეიძლება აღმოჩნდეს საქართველოსთვის. თბილისს მოუწევს მკაფიო პოზიციის დაფიქსირება საკთხის მიმართ, რომელიც რუსეთის მხრიდან სომხეთისთვის დასახმარებლად გადაგზავნილი სამხედრო ტექნიკის საკუთარ ტერიტორიაზე გატარებას ეხება.
"ერთადერთი სახელმწიფო, რომელიც დაინტერესებულია სამხედრო კონფლიქტების არდასრულებით, რუსეთია, რომელსაც სურს ამ კონფლიქტებზე ზემოქმედებით შეინარჩუნოს რეგიონზე საკუთარი გავლენა. ვაკვირდები და ხშირად ვხედავ, რომ რუსეთი სწორედ მაშინ აქტიურდება, როცა ამერიკის შეერთებულ შტატებში ხელისუფლების ცვლილების დრო ახლოვდება. ასე მოხდა 2008 წლის აგვისტოს ომის დროსაც, შემდეგ უკრაინაშიც."-აცხადებს ექსპერტი ბათუ ქუთელია.
საქართველოს თავდაცვის მინისტრი თინა ხიდაშელი აცხადებს, რომ სამინისტროს ორივე მხარესთან აქვს მჭიდრო კომუნიკაცია. მისივე ინფორმაციით, ჯერჯერობით არც აზერბაიჯანს და არც სომხეთს საქართველოსთვის კონკრეტული თხოვნით არ მიუმართავთ.
