მცხეთის მუზეუმ-ნაკრძალის დღევანდელი მდგომარეობისა და სამომავლო პერსექტივების შესახებ ინფორმაცია მოისმინეს დღეს დეპუტატებმა განათლების, მეცნიერებისა და კულტურის და სპორტისა და ახლგაზრდულ საქმეთა კომიტეტების გაერთიანებულ სხდომაზე.
სხდომის გამართვის საფუძველი მცხეთის მაჟორიტარი დეპუტატის, დიმიტრი ხუნდაძის განათლების, მეცნიერებისა და კულტურის კომიტეტისადმი მიმართვა გახდა, რომლითაც იგი მხცხეთის მუზეუმ-ნაკრძალში შექმნილი საგანგაშო ვითარების განხილვას ითხოვდა. კომიტეტის თავმჯდომარის, ივანე კიღურაძის ინფორმაციით, მცხეთაში არსებული მუზეუმი, რომელშიც ექსპონატები იყო განთავსებული, 8 წლის წინ გაიყიდა, ხოლო თვითონ ექსპონატები შეუსაბამო პირობებში გადაიტანეს.
„ეს ექპონატები გამოჩენილ ქართველ არქეოლოგთა მრავალი თაობის დიდი ძალისხმევითაა აღმოჩენილი, დღეს ისინი საწყობშია შენახული და განადგურება ემუქრება. დღემდე არ ხერხდება მუზეუმის შენობის აგება. დიმიტრი ხუნდაძემ ეს საკითხი არაერთხელ დააყენა როგორც საქართველოს პარლამენტში, ასევე საქართველოს მთავრობაში“, _ აღნიშნა ივანე კიღურაძემ.
საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის, ნიკოლოზ ანთიძის ინფორმაციით, საუბარია 25000 ნივთზე, რომელთაგან 8000 ოქროს ფონდშია შეტანილი.
2014 წელს, მას შემდეგ, რაც სააგენტოს გადაეცა მცხეთის კინოთეატრ „კარიბჭეს“ შენობა, სადაც განთავსებულია მცხეთის ისტორიული დიდი კარიბჭე, სააგენტომ გამოაცხადა კონკურსი პროექტირებაზე.
„დავიწყეთ ამ შენობის სამუზეუმე სივრცედ გადაკეთება და პარალელურად ვმუშაობდით დონორი ორგანიზაციების მოძიებაზე. ეს სამუშაო 4 მლნ-ზე მეტი ჯდება. ვთხოვეთ მსოფლიო ბანკს და მუნიციპალური განვითარების ფონდს და პროექტი მოხვდა მსოფლიო ბანკის დაფინანსების ნუსხაში. ამის შემდეგ პროექტის სრულყოფა განხორციელდა. ვთარგმნეთ და გადავაგზავნეთ იგი იუნესკოს მსოფლიო მემკვიდრეობის ცენტრში. 2015 წელს მოგვივიდა თანხმობა“, _ განაცხადა ნიკა ანთიძემ.
მიუხედავად ამისა, მცხეთის მუზეუმის პროექტი დღემდე არ განხორციელებულა. მცხეთის მაჟორიტარი დეპუტატის, დიმიტრი ხუნდაძის განცხადებით, ერთ-ერთი მნიშვნელოვანი პრობლემა არის ის, რომ ქალაქ-მუზეუმს არ აქვს მუზეუმი.
„ეს პრობლემა 2011 წელს იწყება, მას შემდეგ, რაც გასხვისებული მუზეუმიდან ექსპონატები გადავიდა კონტროლის პალატის სარდაფში, შეუსაბამო პირობებში“, _ აღნიშნა დიმიტრი ხუნდაძემ. დეპუტატს მიაჩნია, რომ მუზეუმისთვის სახელმწიფო ბიუჯეტიდან უნდა გამოეყოს შესაბამისი თანხა იმ შემთხვევაში, თუ საერთაშორისო ორგანიზაციები მის დაფინანსებაზე არ იზრუნებენ. მისივე თქმით, უნიკალური ექსპონატების დაბრუნება მცხეთის მუზეუმში დროულად უნდა მოხდეს.
რეგიონული განვითარებისა და ინფრასტრუქტურის მინისტრის პირველი მოადგილის, ილია დარჩიაშვილის განცხადებით, სამინისტრო ინტენსიურად მუშაობს პროექტზე,
„ჩვენ ვგეგმავთ, ზაფხულისთვის გვქონდეს მცხეთის მუზეუმის სრულყოფილი პროექტი. ყველაფერს ვაკეთებთ იმისთვის, რომ შემოდგომაზე გვყავდეს კონტრაქტორი ორგანიზაცია, რომელიც დაიწყებს სამშენებლო სამუშაოებს“, _ განაცხადა ილია დარჩიაშვილმა.
