ეროვნულ-დემოკრატიული ინსტიტუტის მიერ გუშინ და დღეს გამოქვეყნებულმა კვლევების შედეგებმა საზოგადოებაში არაერთგვაროვანი რეაქცია გამოიწვია. მმართველი პარტიის მხარდამჭერებს კვლევების ობიქტურობაში ეჭვი შეაქვთ და NDI-ს "ნაციონალური მოძრაობის" სატელიტად მიიჩნევენ. კვლევის შედეგებით ზედმეტად გახარებულია "მთავარი ოპოზიციური პარტია", როგორც "ნაციონალური მოძრაობა" თავის თავს უწოდებს.
პარტიის ერთ-ერთი აქტიური სახე პეტრე ცისკარიშვილი მიიჩნევს, რომ კვლევა უტყუარად ასახავს საზოგადოებრივ განწყობებს და არც დავით ბაქრაძის 34% რეიტინგი აკვირვებს:
"დავით ბაქრაძე ყველა მონაცემით, როგორც სამსახურეობრივი საქმიანობის მოწონებით, ასევე პირადი სიმპატიით პირველ ადგილზე გავიდა, რაც ძალიან კარგია. ეს დათოს პიროვნული და პარტიული საქმიანობის დამსახურებაა. ის მუდმივ შეხებაშია ხალხთან, დადის შეხვედრებზე, ისმენს მათ პრობლემებს, ცდილობს გადაწყვიტოს ეს პრობლემები და ხშირად წარმატებითაც. ასე, რომ მისი პიროვნული მონაცმეების, მუშაობის და რა თქმა უნდა პარტიის ბოლო პერიოდის მოღვაწეობის შედეგია ეს რეიტინგი."-აღნიშნავს ცისკარიშვილი.
"ახალგაზრდა ბიზნესმენთა და ფინანსისტთა ასოციაციის"- აფბას ექსპერტის ანდრია გვიდიანის აზრით, NDI არაობიექტური და მხოლოდ ერთი პარტიის ინტერესების გამტარებელი კვლევითი ორგანიზაციაა.
"ძალიან მაინტერესებს NDI-ის კვლევის შედეგები რატომ განიხილება ასე აქტიურად, თან სრული სერიოზულობით.
ერთი მაგალითი: ეს ორგანიზაცია 2012 წლის არჩევნებამდე 1 თვით ადრე ამბობდა, რომ ქართული ოცნების რეიტინგი იყო 12%, თუმცა არჩევნებში კოალიციამ ხმების 55% მიიღო. ანუ NDI თავის კვლევაში 43%-ით შეცდა. შესაბამისად, თავისუფლად შეგვიძლია, ზემოთ აღნიშნული ორგანიზაციის კვლევის შედეგები მივიღოთ არა სარწმუნო წყაროდ, ასევე, თამამად შეიძლება ითქვას, რომ NDI არის მიკერძოებული, სუბიექტური და არასერიოზული კვლევითი ორგანიზაცია."-აღნიშნავს გვიდიანი.
პოლიტოლოგ არჩილ გამზარდიას მიაჩნია, რომ ეროვნულ-დემოკრატიული ინსტიტუტი მხოლოდ და მხოლოდ ერთი კონკრეტული პარტიის პოლიტიკურ ინტრესებს ემსახურება.
"შეიძლება ითქვას, რომ NDI-ის კვლევები არის პოლიტიკურად მოტივირებული, ტენდენციური, რომელსაც კონკრეტული პოლიტიკური პარტიის მიმართ მიზანმიმართული პროპაგანდისტული ვექტორი გააჩნია, მეორე მხრივ, თავად იქმნის ნიღაბს ასევე გარე პოზიციონირების კუთხით და მესამე, საზოგადოებაში ქმნის ერთ პროპაგანდისტულ სივრცეს, სადაც არსებითი პოზიციონირების შესაძლებლობას მხოლოდ "ნაციონალური მოძრაობისათვის" ტოვებს".
