ოზურგეთის "ახალგაზრდა პედაგოგთა კავშირის" ინიციატივით დემოკრატიული ჩართულობის ცენტრში საჯარო დისკუსია გაიმართა თემაზე "არასრულწლოვანების დაცვა ალკოჰოლისა და თამბაქოსგან".
დისკუსიის დროს განხილეს შემდეგი საკითხები: ალკოჰოლიზმი და საზოგადოების დამოკიდებულების შეცვლა მოზარდების მიერ ალკოჰოლის მოხმარების მიმართ.
"ახალგაზრდა პედაგოგთა კავშირის" წარმომადგენლებმა მზია მეხუზლამ და სალომე ჭიჭინაძემ იმ ფაქტებზე ისაუბრეს, რომელიც ხშირად ხდება საქართველოში.
"როგორც სუპერმარკეტებში და ასევე სავაჭრო ჯიხურებში ხდება მოზარდებისთვის სიგარეტის და ალკოჰოლური სასმელების მიყიდვა, რაც არის დაუშვებელი და მიუღებელი. ამ საკითხებზე უფრო მეტი აქტივობა არის საჭირო."- თქვა შეხვედრაზე სალომე ჭიჭინაძემ.
შეხვედრაზე ითქვა, რომ საქართველოს კანონის "მავნე ზეგავლენისაგან არასრულწლოვანთა დაცვის შესახებ" (თავი II მუხლი 4.) მიხედვით, აკრძალულია: ა) არასრულწლოვანისთვის ალკოჰოლური სასმელის , ლუდისა და თამბაქოს მიყიდვა; ბ) არასრულწლოვანთა მიერ ალკოჰოლური სასმელების, ლუდისა და თამბაქოს რეალიზაცია; გ) ალკოჰოლური სასმელების, ლუდისა და თამბაქოს რეალიზაცია საგანმანათლებლო, სასწავლო-აღმზრდელობით დაწესებულებებში და მათ ტერიტორიაზე.
შეხვედრაზე ასევე ისაუბრეს ბოლო დროს ჩატარებულ კვლევების შესახებ. საქართველოში ჩატარებული კვლევების მონაცემებით, 15-16 წლის ასაკის ახალგაზრდების უმრავლესობას ცხოვრებაში ერთხელ მაინც გასინჯული აქვს ალკოჰოლი და ალკოჰოლის მიღებას დადებით მოვლენად აფასებს.
რეგიონების მიხედვით, ყველაზე მეტი მსმელი გვხვდება კახეთში (51,7%), ყველაზე ცოტა კი სამცხე ჯავახეთსა (28%) და აჭარაში (32%).
უკანასკნელი 1 თვის განმავლობაში ალკოჰოლი მიიღო – 41.9%: ( ბიჭები – 54.7% გოგონები – 27%); ცხოვრებაში ერთხელ მაინც მიუღია ალკოჰოლი – 93%, ალკოჰოლი მიუღია 40 და მეტჯერ – 20% (წყარო: ESPAD_2008).
ყველაზე პოპულარული სასმელებია ღვინო და ლუდი. გამოკითხულ მოსწავლეთა 70%-მა აღნიშნა რომ სულ ცოტა ერთი ჭიქა ღვინო მაინც დალეული აქვს 13 წლამდე ასაკში. შამპანიურისთვის ეს სიტუაცია 66%, ხოლო ლუდისთვის 63%-ით განისაზღვრა. მაგარი სპირტიანი სასმელებისთვის კი 36%-ით.
ზოგადად, დაახლოებით 70% შემთხვევაში მოსწავლეები ალკოჰოლს იღებენ საკუთარ ან მეგობრის ბინაში, 10%-მდე რესტორანში. ხოლო დანარჩენ შემთხვევებში ბარში, სკვერში, ქუჩაში და სხვ.
საქართველოში ჩატარებული კვლევების მონაცემებით, 18-24 წლის ახალგაზრდების მოწევის დაწყების საშუალო ასაკია 17.2 წელი: ბიჭებში – 17.3 და გოგონებში – 16.4, ხოლო მწეველობის სტაჟი – 4 წელი: ბიჭებში – 3.9 და გოგონებში – 5.3.
16 წლის მოზარდების 50%-ს ერთხელ მაინც მოუწევია სიგარეტი და მათი 60%-თვის სიგარეტის ყიდვა ადვილია.
შეხვედრას ადგილობრივი ხელისუფლების, საზოგადოების, არასამთავრობო სექტორის, საჯარო სკოლების და მედიის წარმომადგენლები ესწრებოდნენ.
