სოფელ ცდოში დაკავებული აქტივისტი სასამართლომ გაათავისუფლა

ყაზბეგში, სოფელ ცდოში დაკავებული ზაზა წიკლაური, რომელიც "დარიალი-სტეფანწმინდის" ელექტროგადამცემი ხაზის მშენებლობას ეწინააღმდეგება, სასამართლომ ხელწერილის საფუძველზე გაათავისუფლა.

როგორც "გურია ნიუსს" ორგანიზაცია "მწვანე მუშტის" წარმომადგენელმა შოთა ბუჩუკურმა უთხრა, გუშინ, ადგილობრივი მოსახლეობის აქციაზე დაკავებული ზაზა წიკლაური სასამართლომ დღეს გაათავისუფლა.

"თუმცა სასამართლო პროცესები გრძელდება, საქმე არ შეწყვეტილა. მომდევნო სხდომა პარასკევს არის ჩანიშნული", _ გვითხრა ბუჩუკურმა.

მისივე ინფორმაციით, მოსახლეობა აქციების გაგრძელებას გეგმავს, რადგან ენერგეტიკის სამინისტროს პოზიცია არ შეუცვლია.

"სავარაუდოდ, აქციების ოთხშაბათიდან განახლდება", _ აღნიშნა ბუჩუკურმა.

შეგახსენებთ, რომ რამოდენიმე დღეა ყაზბეგში სოფელი ცდოს მოსახლეობა სოფლის ტერიტორიაზე ელექტროგადამცემი ხაზების მშენებლობას ეწინააღმდეგება.

მოსახლეობა  სამშენებლო სამუშაოების შეჩერებას, წართმეული მიწების დაბრუნებას, გამგეობის მიერ გაცემული ნებართვის გაუქმებასა და ალტერნატიული მარშრუტის გამოყენებას ითხოვს, რომელიც სოფელს არ დააზიანებს.

როგორც ადგილობრივები აცხადებენ, 220 მეგავატიანი სიმძლავრის სადენების გაყვანა სოფლის შუაგულში დაიწყეს. საუბარია დარიალი-სტეფანწმინდის ჰიდროელექტროსადგურის მშენებლობისთვის საჭირო სადენებზე, ადგილობრივები დენის ხაზების გასაყვანად შემოვლით გზაზე საუბრობენ, თუმცა ეს მეტ ხარჯებთან არის დაკავშირებული.

ადგილობრივების ინფორმაციით, ელექტროსადენების სიმძლავრე, რომელმაც სოფელზე უნდა გაიაროს მოსახლეობის სიცოცხლეს საფრთხეს უქმნის. მოსახლეობა ამბობს, რომ საცხოვრებელი სახლების დატოვება მოუწევთ.

ენერგეტიკის სამინისტრო და კონტრაქტორი კომპანია კი ამტკიცებს, რომ ელექტროსადენების გაყვანა მოსახლეობას საფრთხეს არ შეუქმნის. კომპანიაში ამბობენ, რომ მოსახლეობის მიერ შეთავაზებული ალტერნატიული ვარიანტის განხილვა ვერ მოხდება.

"4 ბოძი, რომელიც სოფელში გადის მთის ფერდობზე გადაგვაქვს. ჩვენს საკუთარ სახელმწიფო მიწაზე. სახელმწიფო ხაზს ვარემონტებთ. გაუგებარია მოსახლეობის პროტესტი. ყველანაირი კომპენსაცია უკვე გადახდილია", _ განაცხადა რამდენიმე დღის წინ ენერგეტიკის მინისტრის მოადგილე ილია ელოშვილმა სოფლის მოსახლეობასთან შეხვედრისას.

როგორც ზემოთ აღვნიშნეთ, მოთხოვნების დაუკმაყოფილებლობის შემთხვევაში, მოსახლეობა აქციების გაგრძელებას გეგმავს.