პარლამენტის საფინანსო-საბიუჯეტო და რეგიონული პოლიტიკისა და თვითმმართველობის კომიტეტების ერთობლივ სხდომაზე საქართველოს სახელმწიფო აუდიტის სამსახურის მიერ წარმოდგენილი თვითმმართველი ქალაქების: ფოთის, ოზურგეთისა და წალკის მუნიციპალიტეტების საფინანსო-ეკონომიკური საქმიანობის შესაბამისობის აუდიტების შემაჯამებელი ანგარიშები და რეკომენდაციები პარლამენტის წევრებს საფინანსო-საბიუჯეტო კომიტეტის თავმჯდომარის მოადგილემ, ნოდარ ებანოიძემ გააცნო.
ნოდარ ებანოიძის განცხადებით, პირველად, ამ მოწვევის პარლამენტში გაიხსნა საპარლამენტო კონტროლის მმართველობის თემა, რომელიც ძალიან მნიშვნელოვანია. იმის გათვალისწინებით, რომ თვითმმართველობებში ზოგადად, პრობლემები იდენტურია, მომხსენებელმა აუდიტის სამსახურის მიერ გამოვლენილი ტენდენციები ერთიანად წარმოადგინა.
მომხსენებლის ინფორმაციით, ფოთსა და ოზურგეთში შემოწმების პერიოდად 2012-2013 წლები, ხოლო წალკის მუნიციპალიტეტის შემთხევაში 2013-2014 წლები განისაზღვრა. ჩატარებული აუდიტების შედეგად 80-ზე მეტი სხვადასხვა ტიპის დარღვევა და ნაკლოვანება გამოვლინდა, რაზედაც შესაბამისი რეკომენდაციები გაიცა.
ჩატარებული აუდიტების შედეგად აღმოჩენილია სისტემური და კონკრეტული სახის დარღვევა-ნაკლოვანებები, რომლებიც თვითმმართველი ერთეულების საფინანსო-ეკონომიკურ საქმიანობაზე არსებით გავლენას ახდენს.
პარლამენტის პრესსამსახურის ინფორმაციით, ნოდარ ებანოიძემ თვითმმართველი ქალაქების, ფოთის, ოზურგეთის და წალკის მუნიციპალიტეტების ბიუჯეტებში მიუღებელ შემოსავლებზე გაამახვილა ყურადღება, რაც ანგარიშების მიხედვით, გადაუხდელი საიჯარო ქირებით, მიმწოდებლებზე დაურიცხავი საურავით, მომსახურე ბანკის არასათანადოდ შერჩევით, გადაუხდელი მოსაკრებლებით და საკრებულოს დადგენილებების შეუსრულებლობით არის განპირობებული.
მიმოხილვაში აღნიშნულ მუნიციპალიტეტებში შესყიდვების ხარვეზების, ფაქტობრივი დანახარჯების, არასათანადოდ დასაბუთებული ხარჯების და საფინანსო საქმიანობის ხარვეზების შესახებაც იქნა ყურადღება გამახვილებული.
აუდიტის დასკვნაში ყურადღება ასევე გამახვილებულია იმ ფაქტზე, რომ შემოწმებულ მუნიციპალიტეტებში საფინანსო საქმიანობა მნიშვნელოვანი ხარვეზებით არის განხორციელებული. კერძოდ, არ არის შედგენილი ფინანსური ანგარიშგებები, ბუღალტრულ გატარებებში დაშვებული შეცდომები არსებითი და ყოვლისმომცველია, არ არის დაცული საბიუჯეტო კოდექსის მოთხოვნები, შესყიდულია არაკვალიფიციური კერძო აუდიტის დასკვნები და სხვა.
ნოდარ ებანოიძემ კომიტეტების წევრებს საფინანსო-საბიუჯეტო კომიტეტის მიერ შემუშავებული რეკომენდაციები გააცნო, რის საფუძველზეც აღნიშნულ მინიციპალიტეტებს ეთხოვათ აუდიტის სამსახურისა და სახელმწიფო აუდიტის სამსახურის ანგარიშების განმხილველი პარლამენტის სამუშაო ჯგუფის მიერ წარმოდგენილი რეკომენდაციების გათვალისწინება მომავალ საფინანსო-ეკონომიკურ საქმიანობაში და საბიუჯეტო პროცესში, რაც უზრუნველყოფს მუნიციპალიტეტის საქმიანობის ეფექტურობას.
„აუდიტის სამსახურის მიერ გაცემული რეკომენდაციების 70 % არ სრულდება. ასეთია სტატისტიკა. სწორედ ამაში უნდა ჩაერთოს პარლამენტი და უკვე ჩვენგან გაცემულ რეკომენდაციებს მივადევნოთ თვალი.“ – განაცხადა ნოდარ ებანოიძემ.
დეპუტატებმა აუდიტის სამსახურის დასკვნასთან დაკავშირებით მოსაზრებები გამოთქვეს.
რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე, კარლო კოპალიანი დაინტერესდა თუ ხდებოდა აუდიტის სამსახურის მხრიდან დარღვევების გამოვლენის შემთხვევები 2012 წლამდე.
პარლამენტის წევრი ზაქარია ქუცნაშვილისთვის კი ის საკანონმდებლო საფუძველია საინტერესო, რის საფუძველზეც იქნება შესაძლებელი ადგილობრივი თვითმმართველობებისთვის რეკომენდაციების გაზიარების და შესრულების თაობაზე მითითებების მიცემა პარლამენტის მხრიდან.
სახელმწიფო აუდიტის სამსახურის წარმომადგენლის განცხადებით, აუდიტის სამსახურს შემოწმების უფლება 2010 წლიდან მიეცა და ის, შესაბამისად, აღნიშნული პერიოდიდან მოქმედებს კანონით განსაზღვრული ფუნქციების ფარგლებში.
რეგიონული პოლიტიკისა და თვითმმართველობის კომიტეტის თავმჯდომარის, ერეკლე ტრიპოლსკის განცხადებით, “მნიშვნელოვანია, რაც დღეს მოვისმინეთ და დიდი მადლობა სამუშაო ჯგუფს ამისთვის. მზად ვართ მოვუსმინოთ სხვა მუნიციპალიტეტებსაც.“
რეგიონული პოლიტიკისა და თვითმმართველობის კომიტეტმა მოისმინა და ცნობად მიიღო წარმოდგენილი რეკომენდაციები. საფინანსო-საბიუჯეტო კომიტეტის წევრებმა კი აღნიშნულ რეკომენდაციებს კენჭი უყარეს და მხარი დაუჭირეს.
