ოზურგეთში, ახალგაზრდა პედაგოგთა კავშირის ოფისში საჯარო დისკუსია გაიმართა, სადაც ისაუბრეს საზოგადოებაში ბოშათა სოციალიზაციის პრობლემებზე.
დისკუსიაში საზოგადოების ფართო სპექტრი მონაწილეობდა _ ქალაქის მერიის წარმომადგენლები, ჟურნალისტები, სკოლების დირექტორები, მოსწავლეები.
ბოშათა განათლების უფლების რეალიზაციის შესახებ მოხსენება გააკეთა უმცირესობების საკითხთთა ევროპული ცენტრის ბოშათა მიმართულების კოორდინატორმა ელენე პროშიკიანმა.
მან აღნიშნა, რომ ეროვნებით ბოშაა და ცხრა წელია, რაც ბოშათა პრობლემებზე მუშაობს და მათ საზოგადოებაში ინტეგრაციას ემსახურება.
მისივე თქმით, საქართველოს ხუთ რეგიონში 2000-მდე ბოშა ცხოვრობს. მათ შორის, ყველაზე მეტი აჭარაში, კონკრეტულად კი ქობულეთშია კომპაქტურად ჩასახლებული და იქ 60 ბავშვი უკვე სკოლაში დადის.
გაცილებით მცირე რაოდენობა _ 15 ბოშა ბავშვი დადის სკოლაში თბილისში და უფრო ცოტა დანარჩენ რეგიონებში.
დისკუსიის დროს არაერთხელ დაისვა კითხვა _ ბოშათა პრობლემები მათივე კულტურული თავისებურებით აიხსნება თუ ქვეყანაში არსებული სოციალური პოლიტიკის ბრალია?
ოზურგეთის მეოთხე საჯარო სკოლის დირექტორმა ტარიელ კალანდაძემ ისაუბრა ბოშა ბავშვებსა და მათ ოჯახებზე. მისივე თქმით, თითოეულ მათგანს ხელი შეუწყვეს, რომ სკოლაში ევლოთ, თუმცა, საბოლოოდ, მაინც არ მოდიან გაკვეთილებზე.
შეხვედრაზე ასევე აღნიშნეს, რომ არაერთი ოჯახი ბოშებისა, ჩაერთო სიღარიბის პროგრამაში, ბავშვები დარეგისტრირდნენ სკოლებში, თუმცა, უმწვავეს პრობლემად მაინც რჩება მათი განათლების უფლების ხელმისაწვდომობა.
ოზურგეთის მერის მოადგილემ კობა დუნდუამ გამოთქვა საკუთარი მოსაზრება ქალაქში მცხოვრებ ბოშებზე და დისკუსიის მონაწილეებს მოუყვა, თუ რა გააკეთა ქალაქის მერიამ მათთვის.
"ქალაქ ოზურგეთში მცხოვრებ ბოშებთან ჩვენ განსაკუთრებული კომუნიკაცია გვაქვს და მინდა, კონკრეტული ქმედებების შესახებ გითხრათ, თუ რა გააკეთა ქალაქის მერიამ მათთვის.
კერძოდ, ჩვენ გადავეცით მათ ბინები. ერთმა მათგანმა კი, რაისა მარენის ოჯახმა უარი თქვა 90 კვ.მ ფართის მქონე ბინაზე, სადაც ევრორემონტია ჩატარებული.
უარს იმიტომ ამბობს, რომ ორსართულიანი სახლის ყიდვას თხოვს ქალაქის მერიას, რადგან ბევრი შვილები ჰყავს.
ასევე შევთავაზეთ დასაქმება, თუმცა, უარი თქვა. ნადია კირიჩენკოს ოჯახს გადაეცა ასეთივე ბინა და თავის ქმარშვილთან ერთად უკვე იქ ცხოვრობს.
მათთვის ხელმისაწვდომია, თუკი რაიმე სოციალური პაკეტი არსებობს. მაქვს ერთი თხოვნაც _ იქნებ, მათთვისაც ჩაგეტარებინათ სემინარები, რომ მოვალეობებზე იფიქრონ, შვილები გაუშვან სკოლაში, დარეგისტრირდნენ, უარი არ თქვან შეთავაზებულ საუკეთესო საცხოვრებელ ფართზე თუ სამუშაო ადგილზე", _ თქვა კობა დუნდუამ.
ელენე პროშიკიანმა დუნდუას გამოსვლის შემდეგ თქვა, რომ მიესალმება ფაქტს, როგორიც არცერთ რეგიონში არ უნახავს.
"რასაც თქვენ ამბობთ, მე არცერთ რეგიონში არ მინახავს და არ მომისმენია, მიუხედავად იმისა, რომ გარკვეული მუშაობა ყველგან ტარდება. აუცილებლად ვიტყვი ყველგან ოზურგეთის მერიის მიერ გაკეთებულ საქმეებზე ბოშების მიმართ და მომდევნო შეხვედრებზე სხვა რეგიონებში თქვენ მიგიწვევთ," _ უთხრა ქალბატონმა ელენემ ოზურგეთის მერის მოადგილეს.
დისკუსიის მონაწილეებმა არაერთ პრობლემაზე ისაუბრეს, რაც ბოშების ირგვლივ არსებობს. ზოგმა მათი ცხოვრების კულტურული თავისებურება და ტრადიციების წესი დაასახელა ერთ-ერთ მიზეზად. ძირითადად კი, შეთანხმდნენ მოსაზრებაზე, რომ არასამთავრობო ორგანიზაციებმა, ხელისუფლებამ, საზოგადოებამ ერთობლივად იმუშაონ საზოგადოებაში ბოშათა სოციალიზაციითვის. თუ საჭიროა, ბავშვები გაიყვანონ იმ ოჯახებიდან, სადაც მოზარდს სწავლას უშლიან, არ უშვებენ სკოლაში და ძალადობენ მათზე, რომ ქუჩაში გავიდნენ და იმათხოვრონ.
დასასრულს, პედაგოგთა კავშირის თეატრალური სტუდიის მოსწავლეებმა, ბოშათა ცხოვრების ამსახველი სცენარით, სპექტაკლი წარმოადგინეს, რომელმაც დიდი მოწონება დაიმსახურა.
