ასეთი გადაწყვეტილება მიიღო დღეს კონტროლის პალატამ “გურია ნიუსის” მიერ ლევან ბეჟაშვილის სახელზე შეტანილი საჩივრის ადმინისტრაციული წესით განხილვის სხდომაზე.
სხდომაზე შესვლის წინ, კონტროლის პალატის შიდაგანაწესის უფროსის ჯიმშერ დობორჯგინიძის მიერ დიქტოფონის წართმევის მცდელობის გამო, “გურია ნიუსი” პროტესტის ნიშნად საჩივრის ადმინისტრაციული წესით განხილვას არ დაესწრო.
“გურია ნიუსის” ინტერესების დამცველის, ქართული მედიის სამართლებრივი დაცვის ხელმძღვანელის ნათია კაპანაძის განმარტებით, კონტროლის პალატის თანამშრომლის მიერ ჩადენილ ქმედებაში, რომლის თვითმხილველიც თავად გახდა, აშკარად შეინიშნებოდა დისციპლინური გადაცდომის ნიშნები, რაც დისციპლინური საქმის წარმოების დაწყების საფუძველია. მისივე განცხადებით, საკუთარი თანამშრომლის დისციპლინურ გადაცდომაზე კონტროლის პალატის თავმჯდომარემ, ლევან ბეჟაშვილმა უნდა იმსჯელოს _ “გურია ნიუსი” სწორედ მას მიმართავს განცხადებით.
ნათია კაპანაძე დღევანდელ სხდომას დაესწრო და კონტროლის პალატის იურისტს “გურია ნიუსის” საჩივარი დეტალურად გააცნო. სხდომის დაწყებამდე მან შუამდგომლობა დააყენა აუდიოჩანაწერის გაკეთებასთან დაკავშირებით, რომელიც არ დაუკმაყოფილეს და უფრო დამაჯერებელი რომ ყოფილიყო მათი არგუმენტი, გერმანული პრაქტიკა მოიყვანეს მაგალითად: “გერმანიაში რომ იცოდნენ, საქართველოს კონტროლის პალატამ რაც ჩაიდინა მარტო გურიაში, ასეთ იდეებს არ შემოგთავაზებდნენ”, _ განაცხადა პასუხად ნათია კაპანაძემ.
კონტროლის პალატის იურისტისთვის დადებითი მხარე და სარჩელის ნაწილობრივ დაკმაყოფილების საფუძველი ის ფაქტორი აღმოჩნდა, რომ ჩვენს მიერ გამოთხოვილ საჯარო ინფორმაციაზე ფინანსური მონიტორინგის თანამშრომელთა რაოდენობა არ დაგვიმალეს.
19-კაციანი საშტატო ნუსხის მხოლოდ რიცხობრივი ოდენობის გამხელა, ამ უწყებისთვის საჯარო ინფორმაციის გაცემის დადებით ტენდენციად ითვლება.
2012 წლის 20 მარტს შეტანილ წერილზე საქართველოს კონტროლის პალატის ადმინისტრაციული დეპარტამენტის უფროსის მოვალეობის შემსრულებლის, დავით კაპანაძის 2012 წლის 3 აპრილის კორესპონდენციით გვეცნობა, რომ საქართველოს კონტროლის პალატის პოლიტიკური პარტიების ფინანსური მონიტორინგის სამსახურის საშტატო ნუსხა გათვალისწინებულია 19 საშტატო ერთეულით შემდეგი სახით:
სამსახურის უფროსი _ 1 საშტატო ერთეული;
სამსახურის უფროსის მოადგილე _ 1 საშტატო ერთეული;
მთავარი კონსულტანტი _ 4 საშტატო ერთეული;
ექსპერტ-ანალიტიკოსი _ 12 საშტატო ერთეული;
სპეციალისტი _ 1 საშტატო ერთეული.
ამავე წერილით განგვიმარტეს, რომ კონტროლის პალატა მოკლებულია შესაძლებლობას, გადმოგვცეს ინფორმაცია ზემოთ აღნიშნულ საშტატო ერთეულებზე მომუშავე საჯარო მოსამსახურეთა ვინაობის შესახებ, მათი თანამდებობრივი სარგოების მითითებით, ვინაიდან ხსენებული ინფორმაცია შეიცავს პერსონალურ მონაცემებს.
ვინ არის ეს 19 ადამიანი, რა ოდენობის ხელფასს იღებენ ბიუჯეტიდან და საერთოდ, საიდან მოვიდნენ ამ ახალ სამსახურში, კონტროლის პალატას მკაცრად აქვს გასაიდუმლოებული.
დღევანდელი სხდომა იმით დასრულდა, რომ კონტროლის პალატამ კიდევ ერთთვიანი ვადა აიღო _ პასუხი სწორედ ამ ვადაში გვეცნობება.
“გურია ნიუსმა” კონტროლის პალატის თავმჯდომარეს საჩივრით 2012 წლის 02 მაისს მიმართა, რომლის მთავარი მოთხოვნა ასეთია:
1. ბათილად ცნოს საქართველოს კონტროლის პალატის ადმინისტრაციული დეპარტამენტის უფროსის მოვალეობის შემსრულებლის მიერ გამოცემული 03 აპრილის #82/26 ინდივიდუალურ ადმინისტრაციულ სამართლებრივი აქტი;
2. დაევალოს საქართველოს კონტროლის პალატის საჯარო ინფორმაციის გაცემაზე პასუხისმგებელ პირს მოგვაწოდოს ჩვენს მიერ 2012 წლის 20 მარტს #72 კორესპონდენციით გამოთხოვილი საჯარო ინფორმაცია, კერძოდ, საქართველოს კონტროლის პალატის პარტიების ფინანსური საქმიანობის მონიტორინგის სამსახურის საშტატო ნუსხა (სახელობითი სია) შრომის ანაზღაურების მითითებით.
