მუხლი “რკინიგზის სატრანსპორტო საშუალებებით სარგებლობის წესების დარღვევას” ეხება. ცვლილების თანახმად, სატვირთო მატარებლით თვითნებური მგზავრობა, მატარებელში სვლის დროს ჩაჯდომა და გადმოსვლა, ვაგონის საფეხურებსა და სახურავზე მგზავრობა, მატარებლის თვითნებური, საჭიროების გარეშე გაჩერება 40 ლარით დაჯარიმებას გამოიწვევს. ამდენივე იქნება ჯარიმა სამგზავრო ვაგონის შიდა მოწყობილობის, ბილეთის საფასურის გადახდის ავტომატური საშუალების, ლოკომოტივისა და ვაგონის მინის დაზიანებისთვის.
მატარებლის ვაგონის ფანჯრიდან და კარიდან ნაგვის და სხვა საგნების გადაყრისთვის პირს ან გააფრთხილებენ ან 20 ლარით დააჯარიმებენ.
20-ლარიანი ჯარიმა დაწესდა რეგიონული მიმოსვლის მატარებლის ვაგონში (მათ შორის, ტამბურში), მაგისტრალური და საერთაშორისო მიმოსვლის სამგზავრო მატარებლებში ნებადაურთველ ადგილებში მოწევისთვის.
კანონის თანახმად, რკინიგზის ტრანსპორტის ორგანოების სახელით ადმინისტრაციული სამართალდარღვევის საქმის განხილვისა და ადმინისტრაციული სახდელის დადების უფლება აქვთ საქართველოს რკინიგზის დირექტორთა საბჭოს დადგენილებით განსაზღვრულ უფლებამოსილ პირებს.
საქართველოს რკინიგზის შესაბამისი სამსახურის უფლებამოსილ პირს უფლება აქვს რკინიგზის ტრანსპორტზე ჩადენილი დარღვევებისათვის გათვალისწინებული ჯარიმის გადახდევინების მიზნით, საჯარიმო ქვითარი გამოწეროს ადმინისტრაციული სამართალდარღვევის ჩადენის ადგილზე ადმინისტრაციული სამართალდარღვევის ოქმის შეუდგენლად, თუ დამრღვევი სადავოდ არ ხდის მისთვის დადებულ ადმინისტრაციულ სახდელს. წინააღმდეგ შემთხვევაში, აღნიშნული პირი გამოწერს საჯარიმო ქვითარს, ასევე ადგენს ადმინისტრაციული სამართალდარღვევის ოქმს.
აღსანიშნავია, რომ კანონში შეტანილი ცვლილების თანახმად
რკინიგზის ტრანსპორტზე ჩადენილი ადმინისტრაციული სამართალდარღვევისათვის გათვალისწინებული საჯარიმო ქვითრისა და ადმინისტრაციული სამართალდარღვევის ოქმის ფორმას, მისი შევსების, ჩაბარებისა და აღრიცხვა-ანგარიშგების წესს საქართველოს ეკონომიკისა და მდგრადი განვითარების სამინისტრო ამტკიცებს.
