საქართველოს უზენაესი სასამართლოს თავმჯდომარე ნინო გვენეტაძე თბილისში ორ ბინას და ერთ მიწის ნაკვეთს ფლობს. აღნიშნული ქონება მას ამ თანამდებობის დაკავებამდეც ჰქონდა. გვენეტაძის ქონებრივ დეკლარაციაში, რომელიც მან 2016 წლის 23 მაისს შეავსო, წინა წლის დეკლარაციასთან შედარებით ცვლილებები არ არის გარდა შემოსავლის თანხისა. აღსანიშნავია, რომ უზენაესი სასამართლოს თავმჯდომარეს 36 871 ლარით ნაკლები შემოსავალი აქვს მიღებული.
რაც შეეხება ნინო გვენეტაძის უძრავ ქონებას, დეკლარაციის თანახმად, ის თბილისში, პეკინის 3 ა ნომერში 70.00 კვ.მ-ისა და ამავე მისამართზე 140.00 კვ.მ-ის ფართობის ბინების 100%-იანი წლის მფლობელია. გარდა ამისა, გვენეტაძე ფლობს 11.00 კვ.მ-ის მიწის ნაკვეთს თბილისში, „დიღმის სავანეში“.
რაც შეეხება მის ფინანსურ მდგომარეობას, დეკლარაციის მიხედვით, გვენეტაძის შემოსავალი გასულ წელს საერთო ჯამში 102 599 ლარი იყო. კერძოდ, საქართველოს უზენაესი სასამართლოს თავმჯდომარის პოსტიდან მან 102 199 ლარის შემოსავალი მიიღო, ხოლო შპს ქართულ-ამერიკული უნივერიტეტის სრული პროფესორისა და სადოქტორო-სამაგისტრო პროგრამების ხელმძღვანელის თანამდებობისთვის – 400 ლარი.
დეკლარაციის შევსების მომენტში კი, გვენეტაძის სახელფასო ანგარიშზე რესპუბლიკა ბანკში 950.00 ლარი ირიცხებოდა.
თუმცა, გარდა შემოსავლისა, გვენეტაძეს ერთი წლის განმავლობაში სოლიდური დანახარჯიც ჰქონდა. მან სესხების პროცენტის დასაფარად 17 423 დოლარი და 674.00 ლარი გასცა.
კერძოდ, რესპუბლიკა ბანკში 2007 წელს აღებული 60 000 დოლარიანი კრედიტის (ხელშეკრულების დადებისა და ამოწურვის თარიღი: 28/12/2007 – 27/12/2017) დასაფარად 10280.00 დოლარი, ხოლო ამავე ბანკში 2012 წელს აღებული 30000.00 დოლარიანი კრედიტის (ხელშეკრულების დადებისა და ამოწურვის თარიღი: 12/02/2014 – 12/02/2019) დასაფარად კი, 7143.00 დოლარი გადაიხადა.
გარდა ამისა, გვენეტაძეს რესპუბლიკა ბანკში 2010 წელს აღებული 10 000- დოლარიანი კრედიტიც (ხელშეკრულების დადებისა და ამოწურვის თარიღი: 30/09/2014 – 30/09/2017) აქვს, რომლის დასაფარადაც მან 674.00 ლარი გადაიხადა.
აქვე უნდა აღინიშნოს, რომ 2015 წელს, გვენეტაძეს 36 871 ლარით ნაკლები შემოსავალი აქვს მიღებული, ვიდრე 2014 წელს, მაშინ, როდესაც უზენაესი სასამართლოს თავმჯდომარე არ იყო. აღნიშნულ თანამდებობას ნინო გვენეტაძე 2015 წლის თებერვლიდან იკავებს.
ამავე თემაზე:
„სამოქალაქო სექტორში უფრო მეტი ანაზღაურება მქონდა, ვიდრე სასამართლო სისტემაში“_ გვენეტაძე
რა ქონებას ფლობს უზენაესი სასამართლოს თავმჯდომარე ნინო გვენეტაძე
