გერმანული გამოცემა BILD-ის ინფორმაციას იმის შესახებ, რომ ქვეყანაში ჩასულ სხვადასხვა ერს შორის კრიმინალური ქმედებების რაოდენობით ქართველები ლიდერობენ და ევროკავშირი საქართველოსთვის ვიზალიბერალიზაციის მინიჭებით დიდ თავის ტკივილს გაიჩენს, საპარლამენტო უმრავლესობის ლიდერი ზვიად კვაჭანტირაძე ეხმაურება, რომელიც ამჟამად ბერლინში იმყოფება ქართულ დელეგაციასთან ერთად:
"არ შემიძლია არ გამოვეხმაურო ამ ინფორმაციას და ამასთანავე, ბარემ მოკლედ მაინც მოგიყვებით რა ხდება ბერლინში, სადაც პარლამენტის თავმჯდომარის და დელეგაციის ვიზიტი მიმდინარეობს. უპირველესად ჩანს, რომ ვიზიტი კარგად მიდის, თუმცა მის შედეგებზე, თუ რამდენად წარმატებული გამოდგება იგი, ცოტა მოგვიანებით ვისაუბროთ.
რაც შეეხება კრიმინალების კავშირს ვიზალიბერალიზაციასთან. რა თქმა უნდა, კრიმინალი არის კრიმინალი და ისინი არიან ცუდები და ამ აღიარებით, სამწუხაროდ, კრიმინალის ამოკვეთა ბოლომდე ვერ მოხდება.
მიუხედავად ამისა, ეს თემა თითიდან გამოწოვილია. ქართველები კრიმინალების ოცეულშიც კი არ შედიან გერმანიაში და საერთოდ, რა უბედურება და რა დისკრიმინაციაა დამნაშავეების ეროვნული ნიშნით გამოყოფა?
ან კი, როგორ შეიძლება ვინმეს თავში მოუვიდეს იდეა, რომ საქართველო და მისი პატიოსანი მოქალაქეები უნდა დაისაჯონ ზუსტად 455 ქართულპასპორტიანი კრიმინალის გამო, ვინც გერმანიის პოლიციას ყავს დღემდე დაფიქსირებული, ძირითადად, ქურდობის გამო???
კიდევ ერთხელ ხაზგასმით ვამბობ, კრიმინალის გამართლება გამორიცხულია, მაგრამ საქართველო, მისი მთავრობა მაქსიმალურად თანამშრომლობს გერმანიასთან ამ კუთხით, ისევე როგორც გერმანიასთან რეადმისიის მაჩვენებელი 96% -ს სცდება და უმაღლესია სხვა ქვეყნებთან შედარებით.
ბერლინში ბევრი შეხვედრა გავმართეთ და ყველგან, ბუნდესტაგის თავმჯდომარიდან დაწყებული კანცლერის თანაშემწით დამთავრებული ვერავინ მალავდა აღშფოთებას Bild -ის და Die Welt -ის და სხვათა პუბლიკაციების გამო (ერთიდაიგივე ნიუსს ავრცელებდნენ), სადაც ხაზგასმული იყო 455 ქართველი კრიმინალის პრობლემა.
ერთმა გავლენიანმა დეპუტატმა ისიც კი აღნიშნა, რომ ამ პუბლიკაციებში მესამე ქვეყნის "რბილი ძალის" მოქმედება ჩანსო. ალბათ, ამ მესამე ქვეყნის გამოცნობა არ გაგიჭირდებათ.
გასაკვირი არაა, რომ რუსეთს ყელში ხანჯალივით ეჩხირება საქართველოსთვის ევროვიზების გაუქმების ამბავი და ეშინია, რომ ვიზების გაუქმებისთანავე აფხაზები და ოსები დაიწყებენ ქართული პასპორტების მასიურ აღებას.
მეორე მხრივ არის უკრაინაც, რომელსაც ვერ წარმოუდგენია, რომ საქართველომ შეიძლება მასზე ადრე მიიღოს ვიზალიბერალიზაცია. აქეთ კიდევ თურქეთი, თავისი მზარდი პრობლემატიკით და იქეთ კიდევ კოსოვო, რომლის დამოუკიდებლობაც კი ჯერ ბევრ ქვეყანას არ უცვნია.
თუმცა, ჩვენ ყველგან ვაფიქსირებთ და პრინციპში გვეთანხმებიან, რომ ყველა ქვეყნის ერთ ქვაბში მოხარშვა უსამართლობა იქნებოდა ბევრი მიზეზის გამო.
მიუხედავად იმისა, რომ სერიოზული შეხვედრების შემდეგ ჩვენ ყველანი ოპტიმისტურად ვართ განწყობილები, მე მაინც ვფიქრობ, რომ უმნიშვნელოვანესი ფაქტორი გახდება პრემიერ-მინისტრის გიორგი კვირიკაშვილის დაგეგმილი ვიზიტი ბერლინში და მისი შეხვედრა კანცლერ მერკელთან, რომელიც მომავალ კვირას შედგება.
გუშინ იყო უმნიშვნელოვანესი შეხვედრების დღე ბუნდესტაგის პრეზიდენტთან და კანცლერის საგარეო-პოლიტიკურ მრჩეველთან, ასევე უსერიოზულესი შეხვედრა ბუნდესტაგის ევროკავშირის საქმეთა კომიტეტის წევრებთან. ძირითადი მესიჯი იყო შემდეგი: არჩევნებამდე აუცილებლად დასრულდება პოლიტიკური გადაწყვეტილების მიღების პროცესი და იგი იქნება პოზიტიური საქართველოსთვის.
დღეს, ისევ ძალიან სერიოზულ ხალხს ვხვდებით, ბუნდესტაგის თავდაცვის და უსაფრთხოების კომიტეტის წევრებს. ვნახოთ რას გვეტყვიან ისინი.
ზოგადად, ბერლინში განწყობა ჩვენს მიმართ ძალიან მეგობრული და თბილია, რაც ოპტიმიზმის საფუძველს გვაძლევს და აქედან გამომდინარე მჯერა, რომ მთავარი, რასაც გვპირდებიან აუცილებლად მოხდება- საქართველოზე მიღებული იქნება დადებითი პოლიტიკური გადაწყვეტილება არჩევნებამდე დარჩენილ პერიოდში" _ წერს ზვიად კვაჭანტირაძე ფეისბუქში.
