წყნეთის მოსახლეობამ შესაძლოა უახლოეს დღეებში თბილისი წყნეთის ცენტრალური გზა გადაკეტოს. პროტესტის ამ ზომას მოსახლეობა იმ შემთხვევაში მიმართავს, თუ თბილისის მერია და ვაკის რაიონის გამგეობა, რომელსაც წყნეთი ეკუთვნის, წყნეთში არსებული პრობლემით არ დაინტერესდება.
მოსახლეობის ინფორმაციით, წყნეთში სასაფლაოს ტერიტორია კიდევ ერთხელ გასხვისა, ალტერნატიული ფართი კი ამ დრომდე არ გამოუყვიათ.
როგორც "გურია ნიუსს" ადგილობრივებმა განუცხადეს, ძველი სასაფლაოს ტერიტორიაზე მიცვალებულების დაკრძალვა კარგა ხანია ფეხით სავალ ბილიკებზე უწევთ, თუმცა ეს ადგილებიც უკვე შევსებულია.
მოსახლეობა აცხადებს, რომ 2011 წელს, სასაფლაოზე მიბმული ტერიტორია, რომელიც სასაფლაოს გაგრძელებად მოიაზრებოდა, უკანონოდ გასხვისდა, რის გამოც გამოძიება არის დაწყებული, თუმცა ახალი მეპატრონე აპირებს ადგილზე მშენებლობა დაიწყოს, რასაც მოსახლეობა აპროტესტებს.
სასაფლაოს დაბრუნების მოთხოვნით, წყნეთის სამი მაცხოვრებელი – რეზო ხეჩუაშვილი, გოჩა ხეჩუაშვილი და ლევან გოგილაშვილი უკვე მე-5 დღეა შიმშილობს.
მათი თქმით, სანამ პრობლემა არ მოგვარდება, შიმშილობას არ შეწყვეტენ.
გარდა სასაფლაოს დაბრუნებისა, მოსახლეობა ითხოვს ასევე უკანონოდ გასხვისებული სტადიონის დაბრუნებასაც. როგორც ადგილობრივები ამბობენ, 1985 წლიდან, სტადიონი სამკერვალო ფაბრიკის საკუთრებაში იყო, თუმცა 2002 წელს ისიც ჩუმად გაიყიდა და მას შემდეგ რამდენიმე მეპატრონე გამოიცვალა. მათ შორის, ბოლო მეპატრონე რამდენიმე თვის წინ.
მოსახლეობის მოთხოვნების შესახებ ინფორმაცია აქვს ვაკის რაიონის გამგებლის წარმომადგენელს წყნეთში, თუმცა, მისი თქმით, პრობლემა სამართლებრივად უნდა მოგვარდეს და არა პროტესტის უკიდურესი ზომით.
მიუხედავად გამგებლის წარმომადგენლის რჩევისა, ადგილობრივები გაჩერებას არ აპირებენ და უახლოეს დღეებში თბილისი წყნეთის გზის გადაკეტვას გეგმავენ.
მოშიმშილე რეზო ხეჩუაშვილი "გურია ნიუსთან" საუბრისას ამბობს, რომ მოსახლეობამ ზემოთ აღნიშნულ პრობლემებთან დაკავშირებით რამდენჯერმე აცნობა ვაკის რაიონის გამგებელს, თვენახევრის წინ შეხვდნენ თბილისის მერს, დავით ნარმანიას, რომლისგანაც მიიღეს დაპირება, რომ მათი პრობლემა მოგვარდებოდა, თუმცა, ამ დრომდე არაფერი შეცვლილა.
"წყნეთის სასაფლაო, რომელიც არსებობდა და არის დაახლოებით 120 წლის, 2011 წელს ყალბი საბუთებით შეისყიდა ვინმე ნინუამ, რომელიც ჩვენი ინფორმაციით, გიგა ბოკერიას ქვისლია. ეს ტერიტორია არის 6025 კვ.მ. გამოვიდა მთელი მოსახლეობა და წინ აღვუდექით ამ უკანონობას. დაახლოებით, თვენახევრის წინ საზოგადოებრივი მოძრაობა "ქართული მისიის" დახმარებით, მის წარმომადგენელთან ერთად, შევხვდით დავით ნარმანიას, მივიღეთ დაპირება, რომ მოგვარდებოდა ეს პრობლემა, თუმცა პასუხი ნულია.
2010 წელს რომ გვაიძულეს და 400 ოჯახს საკუთრებაში არსებული მიწები ჩაგვაბარებინეს, წინააღმდეგ შემთხვევაში დაჭერით გვემუქრებოდნენ, ერთი სასაფლაო რა გახდა, წყნეთისთვის, ამდენი მიწა გვაჩუქებინეს სახელმწიფოსთვის. ამას არ დავთმობთ. მთელი წყნეთის მოსახლეობა გამოვა და რადიკალურ ზომებს მივმართავთ", _ ამბობს რეზო ხეჩუაშვილი.
წყნეთის მოსახლეობის ნაწილი აცხადებს, რომ სასაფლაოს ტერიტორიაზე თავისუფალი ადგილი, სადაც მიცვალებული შეიძლება დაასაფლაონ, აღარ დარჩა.
"უკვე გასავლელი გზებიც კი გამოვიყენეთ. მეტი ადგილი ფაქტიურად აღარ არის. სასაფლაო დაგვიბრუნონ, თუ არადა, აწი ვინცა გარდაიცვლება, იმ მიტაცებულ ადგილზე დავასაფლავებთ და მერე ჩვენთან პრეტენზიები ნუღარ ექნებათ. სოფელს ეკუთვნის და როგორც ჩვენ გვინდა ისე მოვიქცევით. მერე არ გვითხრან უკანონოდ იქცევითო. გაუკეთონ მონაცვლეობა და სხვა ტერიტორია მისცენ", _ ამბობენ ადგილობრივები.
სასაფლაოს ტერიტორია რომ სოფელს უნდა დაუბრუნდეს ამაზე ვაკის რაიონის გამგებლის წარმომადგენელი წყნეთში ზურაბ შაყულაშვილიც საუბრობს, როგორც მან "გურია ნიუსს" უთხრა, სასაფლაოსთვის ალტერნატიული ფართის საკითხიც განიხილება, თუმცა როდის შეიძლება ეს ტერიტორია სოფელს გადმოეცეს, ვერ აკონკრეტებს.
"სამი ალტერნატიული ფართი აქვთ შეთავაზებული სასაფლაოსთვის, გარდა ამისა, პროკურატურაშია საქმე და მოკვლევა მიმდინარეობს, რამდენად კანონიერად გასხვისდა 2011 წელს სასაფლაოს ტერიტორია. ვეთანხმები მოსახლეობას, რომ უკანონოდ არის გაყიდული; ეს ყოველთვის სასაფლაოს ტერიტორია იყო, ასე მოიაზრებოდა, თავისუფალი მიწის ნაკვეთი იყო", _ ამბობს შაყულაშვილი.
თუმცა, გამგებლის წარმომადგენელი ასევე აცხადებს, რომ სასაფლაოს ის ტერიტორია, რომელიც გასხვისდა, სოფელს რომც დაუბრუნდეს, 3-4 წელიწადში კიდევ ალტერნატიული ფართის გამოძებნა მოუწევთ, რადგან ის სასაფლაოსთვის საკმარისი არ იქნება.
განსხვავებული მოსაზრება აქვს მოსახლეობას. ისინი ამბობენ, რომ სოფლისთვის ეს ტერიტორია სასაფლაოდ გამოსაყენებლად, დაახლოებით 50 წლის განმავლობაში საკმარისი იქნება.
რაც შეეხება მოსახლეობის მეორე მოთხოვნას, სტადიონის სოფლისთვის დაბრუნებას, გამგებლის წარმომადგენელი ამ საკითხზეც ამბობს, რომ პრობლემა სამართლებრივი გზით უნდა გადაწყდეს და მოსახლეობა გამოძიების დასრულებას უნდა დაელოდოს.
"1985 წელს, ჯუმბერ პატიაშვილი რომ ცეკას პირველი მდივანი იყო, მე პირადად შევხვდი და ვთხოვე სტადიონი გაეკეთებინა. დაახლოებით 2 თვეში გაგვიკეთეს სტადიონი. ტურნირები და ჩემპიონატები კი ტარდებოდა. მაგრამ 2002 წელს როგორღაც ეს სტადიონი გასხვისდა. მანამდე წყნეთის სამკერვალო ფაბრიკის ბალანსზე იყო. 2002 წლის მერე კიდევ გასხვისდა ეს სტადიონი და ახლახან კიდევ გაიყიდა. ეს ხელისუფლება სამართლიანობის აღდგენის დაპირებით მოვიდა, მაგრამ უსამართლობის მეტი წყნეთისთვის არაფერი გაუკეთებიათ. კობიაშვილის და კალაძის სახლების გვერდით რომ გაიყიდება სტადიონი ვისი იმედი უნდა გვქონდეს? მოსახლეობას სხვა არაფერი დაგვრჩენია, ჩვენი უფლებებისთვის უნდა ვიბრძოლოთ", _ ამბობს მოშიმშილე რეზო ხეჩუაშვილი.
მისივე თქმით, 4-დღიანი შიმშილობის მიუხედავად მათი მდგომარეობით ვაკის რაიონის გამგეობიდან არავინ მისულა დაინტერესებულა.
"გამგეობის ეზოში ვათენებ და ვაღამებ, 4 დღეა აქ ვარ. არავინ დაინტერესებულა ჩვენი მდგომარეობით, არც მერიიდან მოსულა ვინმე, არც გამგეობიდან", _ ამბობს ხეჩუაშვილი და დასძენს, რომ მოსახლეობის ერთ-ერთი მოთხოვნა წყნეთში თვითმმართველობის აღდგენაცაა.
გამგებლის წარმომადგენელი აღნიშნულ საკითხთან დაკავშირებით ამბობს, რომ პრობლემების შესახებ მერიაში და გამგეობაში უკვე იციან, თუმცა სამართლებრივი რეაგირების გარდა მათაც არაფერი შეუძლიათ.
"გურია ნიუსის" კითხვაზე, ვინ გააცნო მათ მოსახლეობის მოთხოვნები და იყო თუ არა მერიის ან გამგეობის წარმომადგენელი ადგილზე შაყულაშვილი ამბობს, რომ ამის შესახებ არაფერი იცის და არ ახსოვს, ვინ მივიდა ვაკის რაიონის გამგეობიდან მოშიმშილეებთან.
"გურია ნიუსი" ზემოთ აღნიშნულ პრობლემებთან დაკავშირებით, განმარტებისთვის ვაკის რაიონის გამგეობას დაუკავშირდა. დაპირების მიუხედავად, რომ საკითხზე კომენტარს კომპეტენტური პირებისგან მივიღებდით, მოგვიანებით ისევ წყნეთში გამგებლის წარმომადგენელთან გადაგვამისამართეს.
ზურაბ შაყულაშვილმა ჩვენთან განმეორებით საუბრისას აღნიშნა, რომ მისი პოზიცია ვაკის რაიონის გამგებლის პოზიციაა და ახალს ვერაფერს გვეტყოდა.
"პროცესს ვერანაირად ვერ დავაჩქარებთ, არავინ არ დარჩება ზემოდან. გარდა ამისა, სტადიონი, რაზეც მოსახლეობას აქვს პროტესტი, გასხვისდა 2002 წელს, ახლა კიდევ მოხდა გასხვისება ერთი პირიდან მეორეზე. ამ საქმესაც სამართლებრივი მოკვლევა სჭირდება.
გარდა ამისა, 7000 კაციან მოსახლეობაში თქვენც ნახეთ, 20-მდე ადამიანია გამოსული და აპროტესტებს ამას, აქედან 3 ადამიანი შიმშილობს, დანარჩენები ასე რომ ვთქვათ, სეირის მაყურებლები არიან. ყველამ იცის, რომ ამ საკითხების გადაწყვეტას ვცდილობ. ეს პრობლემები მემკვიდრეობით მივიღეთ უხსოვარი დროიდან. ვეთანხმები, რომ მათი მოთხოვნები სამართლიანია და საზოგადოებრივი დანიშნულების არცერთი ობიექტი ასე არ უნდა გასხვისდეს და გაიყიდოს. მაგრამ რა ვუყოთ წინა ხელისუფლების დროს გასხვისებულ მიწებს? ამაზე გითხარით, რომ მოქმედებები მიდის. წყნეთი დიდი დასახლებაა და სასაფლაოს გარეშე რომ არ დარჩება, ეს ხომ ფაქტია? რაც გვაქვს გაუსხვისებელი მიწები, იქედან ვცდილობთ რომ ალტერნატიული ფართი გამოვძებნოთ", _ განაცხადა შაყულაშვილმა ჩვენთან განმეორებით საუბრისას.
"გურია ნიუსი" აღნიშნულ საკითხთან დაკავშირებით მუშაობას აგრძელებს. თბილისის მერიის ქონების მართვის სააგენტოს, მთავარი პროკურატურის და კერძო მესაკუთრეების პოზიციებს მოგვიანებით შემოგთავაზებთ.
