თავდაცვის სამინისტრო სამხედრო-სავალდებულო სამსახურში გაწვევას აღარ განახორციელებს.
როგორც ცნობილია, აღნიშნული გადაწყვეტილების შესრულება ნატო-ს წინაშე დაკისრებული ერთ-ერთი ვალდებულებაა, თუმცა ქვეყნის პრემიერ-მინისტრი მიიჩნევს, რომ მსგავსი გადაწყვეტილების გახმოვანება ტექნიკური მომზადების გარეშე ნაადრევია.
"გურია ნიუსი" დაინტერესდა, რას ფიქრობს მოსახლეობა სამხედრო-სავალდებულო სამსახურში გაწვევის გაუქმების შესახებ, რის გასარკვევადაც, თბილისის ქუჩებში შემთხვევითი შერჩევით მოქალაქეები გამოკითხა.
მოქალაქე ნიკა თათრიშვილი მიიჩნევს, რომ თავდაცვის მინისტრმა სწორი გადაწყვეტილება მიიღო.
"აუცილებელია, რომ ჯარში წასვლა ნებაყოფლობითი იყოს. არ ვიცი, რის გამო მიიღო თავდაცვის მინისტრმა აღნიშნული გადაწყვეტილება, მაგრამ სწორია. რაც არ უნდა იყოს ისეთ გარემოცვაში ვცხოვრობთ, რომ საკუთარი შეიარაღებული ძალებით ვერავის დავუპირისპირდებით, ამიტომ ომში დასახოცად ყველა არ უნდა გაიმეტოს ხელისუფლებამ,"_ თქვა თათრიშვილმა.
გურამ ბარათაშვილი კი ამბობს, რომ ჯარში წასვლა ბიჭების გარდა, გოგოებისთვისაც სავალდებულო უნდა იყოს.
"ჯარში წასვლა სავალდებულო უნდა იყოს, ბიჭები კი არა, გოგოებიც უნდა გაიწვიონ, როგორც ისრაელშია. თუმცა თავდაცვის მინისტრი ფაქტიურად არ გვყავს, რაც ამ სულელურ გადაწყვეტილებაზეც აისახება,"_ ამბობს ბარათაშვილი.
ლელა სინაურიძის თქმით, ჯარში ყველას გაწვევა არ უნდა ხდებოდეს.
"2008 წელს იმდენი ახალგაზრდა დავკარგეთ, რომ ჯარში ყველა ნამდვილად არ უნდა გაიწვიონ. უსამართლობაა, რადგან დარწმუნებული ვარ წვევამდელებს ისე არ წრთვნიან, როგორც პროფესიონალებს",_ თქვა სინაურიძემ.
მოქალაქე გიორგი ბახტაური კი ამბობს, რომ ყველას უნდა შეეძლოს საკუთარი თავის და ქვეყნის დაცვა, რის გამოც ჯარში სავალდებულო გაწვევა არ უნდა გაუქმდეს.
"ქვეყანას საკუთარი ჯარი უნდა ჰყავდეს. ყველას უნდა შეეძლოს საკუთარი თავის და ქვეყნის დაცვა. მიმაჩნია, რომ თავდაცვის მინისტრმა აღნიშნული გადაწყვეტილება წინა საარჩევნო პერიოდში იმიტომ მიიღო, რომ რესპუბლიკურ პარტიის შედეგებზე დადებითად აისახოს, რადგან მოსახლეობის ნაწილი დაბნეულია, ზოგს კი საერთოდ არ აქვს ჯარში წასვლის სურვილი,"_ ამბობს ბახტაური.
საქართველოს და ისრაელის მოქალაქე თემურ დანელია, "გურია ნიუსთან" საუბარში აღნიშნავს, რომ მიღებული გადაწყვეტილების შემდეგ პრემიერ-მინიტრს თინა ხიდაშელი უნდა გადაეყენებინა.
"თავდაცვის მინისტრის მიერ მიღებული გადაწყვეტილება, ალბათ, "რესპუბლიკურ პარტიას" არჩევნებში გამოაგდება. მე საქართველოს და ისრაელის მოქალაქე ვარ და კარგად მესმის რას ნიშნავს ისეთი პატარა ქვეყნისთვის, როგორიც საქართველოა, რომელსაც ბევრი პრობლემები აქვს უსაფრთხოების მხრივ, ასეთი უპასუხისმგებლო გადაწყვეტილების მიღება. ისრაელში ბიჭებთან ერთად გოგოებიც დგანან ქვეყნის სადარაჯოზე, აქ კი ბიჭებმა მაინც ხომ უნდა დაიცვან ქვეყანა. სამწუხაროდ სახელმწიფო სტრუქტურებს შორის შეუთანხმებლობა და უკორდინაციო მუშაობა დიდი ხანია სახეზე გვაქვს. ალბათ, პრემიერს ხიდაშელი უნდა გადაეყენებინა ამ განცხადების ფონზე, მაგრამ ეტყობა პრემიერ-მინისტრს სურს უთანხმოების გამწვავებას თავი აარიდოს, რადგან ხიდაშელის უკან პარლამენტის თავმჯდომარე, რესპუბლიკური პარტია და რამდენიმე მინისტრი დგას,"_ თქვა დანელიამ.
შეგახსენებთ, რომ 18-დან 27 წლამდე ასაკის საქართველოს მოქალაქეები სამხედრო სავალდებულო სამსახურში გაწვევას ექვემდებარებოდნენ, თუმცა თავდაცვის მინისტრის მიერ მიღებული გადაწყვეტილებით, მათ ჯარში აღარ გაიწვევენ.
ამავე თემაზე:
"ქვეყნისთვის წარმატებულ ნაბიჯად მიმაჩნია სავალდებულო გაწვევის გაუქმება"
გიორგი კვირიკაშვილი: "გაუგებრობა უნდა ამოვწუროთ და თინასაც ვურჩევ, სჯობს სამუშაო რეჟიმში გადავიდეთ"
