დღეს ერთიანი ეროვნული გამოცდები დაიწყო. ოზურგეთში საგამოცდო ცენტრი გახსნილია ქალაქის მეორე საჯარო სკოლაში. ახლა აქ ხალხმრავლობაა, აბიტურიენტები და მათი მშობლები ღელავენ. ზოგი უკვე გამოდის გამოცდიდან, ზოგიც შესასვლელად ემზადება. "გურია ნიუსი" ახალგაზრდებს ესაუბრა.
სალომე ტრაპაიძე, აბიტურიენტი: "მე ჩოხატაურიდან ვარ, ბუკნარის საჯარო სკოლა დავამთავრე. გამოცდაზე დღის მეორე ნახევარში შევდივარ. ვღელავ, რა თქმა უნდა, მაგრამ სრული იმედით ვარ განწყობილი. სტუდენტი აუცილებლად გავხდები. მინდა, პედაგოგის პროფესია მივიღო და დაწყებით კლასებში ვიმუშაო. ძალიან მიყვარს ბავშვები. გული მწყდება, რომ სკოლებში ახალგაზრდა მასწავლებლებს ვეღარ ვხედავ. ზუსტად ვერ გეტყვით, რა არის ამის მიზეზი. ახალგაზრდები ძირითადად სულ სხვა პროფესიებს ირჩევენ, მაგალითად, „ბიზნესის ადმინისტრირება“ და სხვა. არა მგონია, სურვილი არ ჰქონდეს არავის, პედაგოგი გახდეს, თუმცა, ფაქტი ჯიუტია. მე აუცილებლად გავხდები მასწავლებელი და სკოლაში შევალ! ბავშვებთან ურთიერთობა ისე მიყვარს, ამ გრძნობის გადმოცემაც არ შემიძლია."
ლევან ჭანტურია , აბიტურიენტი: " ავიაციის ინჟინერი უნდა გავხდე. შიში თუ გავივლე, ვერ გავხდები ავიატორი, რაც გულით მწადია! პრობლემას ვხედავ იმაში, რომ ეროვნულ გამოცდები დახუთულ ოთახებში ტარდება. ზაფხულია, ძალიან ცხელა და ეს პაპანაქება განწყობას აფუჭებს, ამასთანავე ხელის შემშლელიცაა აზროვნებაში. ნუთუ ასე შეუძლებელია, ეროვნულ გამოცდებზე აუდიტორიებში კონდიციონერები იყოს დამონტაჟებული და იქ მსხდომ აბიტურიენტებს სიცხით სული არ ეხუთებოდეთ?"
ნოდარ კალანდაძე, აბიტურიენტი: სამშენებლო ფაკულტეტზე ვაბარებ. მშენებელი ინჟინრის პროფესია ძალიან მომწონს. ზოგადად, შენება მიყვარს!
_ქვეყნის შენებას აპირებ?
_რატომაც არა? დიახ, უნდა ავაშენო, ოღონდ ისე არა, სიმღერაში რომ არის. (იცინის)
ლია საგინაძე, აბიტურიენტი: "მე დაბა ნარუჯის საჯარო სკოლა დავამთავრე. ეს-ესაა, გამოვედი ქართული ენისა და ლიტერატურის გამოცდიდან. დავწერე ჭაბუა ამირეჯიბის „დათა თუთაშხია.“ ვფიქრობ, კარგად დავწერე. ექიმი უნდა გავხდე. პროფესიის სიყვარული მამისგან დამებედა. ის მედიცინის მუშაკია. განწყობა კარგი მაქვს. კი არ ვნერვიულობ, უფრო ვღელავ, ჭარბობს ემოცია და ეს ალბათ, ბუნებრივია. მინდა, ყველა აბიტურიენტს წარმატება ვუსურვო."
როგორც აბიტურიენტები აღნიშნავენ, მათ, გამოცდებთან ერთად , ოთახებში ცხელ ზაფხულთან გამკლავება უხდებათ. ცუდია, როცა ეროვნულ გამოცდებზე რამდენიმე საათის განმავლობაში ზიხარ, მუშაობ და სიცხისგან სუნთქვა გეკვრის.
"როცა ძალიან ცხელა, მობილიზებული ვერ ხარ, ძნელია, ჩახუთული მუშაობ. სამომავლოდ აუცილებლად უნდა გაითვალისწინონ და შენობაში კონდიციონერები უნდა დამონტაჟდეს. ბოლოს და ბოლოს, 21-ე საუკუნეში ვცხოვრობთ"_ ამბობენ ისინი.
