დღეს ერთიანი ეროვნული გამოცდები დაიწყო. გამოცდების დღეს ხარვეზების აგრეშე არ ჩაუვლია, თუმცა, მნიშვნელოვანი შემაფერხებელი პრობლემები, შეფასებისა და გამოცდების ეროვნული ცენტრის ინფორმაციით, არ ყოფილა.
როგორც ცნობილია, საქართველოში 21 საგამოცდო ცენტრი ფუნქციონირებს და ყველა მათგანში აბიტურიენტების საგამოცდო პროცესი ქართულ ენასა და ლიტერატურაში ორ ეტაპად მიმდინარეობდა.
„გურია ნიუსი“ საგამოცდო პროცესის გასაშუქებლად თბილისში, ტექნიკური უნივერსიტეტის მე-6 კორპუსში იმყოფებოდა, სადაც გამოცდაზე შესულ აბიტურიენტებს ოჯახის წევრები სასწავლებლის ეზოში ელოდებოდნენ.
როგორც ცნობილია, 2016 წლის გამოცდები ნაწილობრივ ელექტრონული ფორმატით ტარდება, ელექტრონული ფორმატით ტესტის კითხვებია წარმოდგენილი და აბიტურიენტმა მისი პასუხები ჩვეულებრივ ფურცელზე უნდა შეავსოს.
„გურია ნიუსი“ გთავაზობთ, თუ რას ფიქრობენ აბიტურიენტების მშობლები საგამოცდო სისტემაში დანერგილ ცვლილებაზე და როგორ აფასებენ გამოცდიდან გამოსული მომავალი სტუდენტები ელექტრონული ფორმატის ტესტებსა თუ საგამოცდო პროგრამას.
ერთ-ერთი აბიტურიენტის გულშემატკივრის, ლიკა კახიშვილის თქმით, ელექტრონული სისტემა აბიტურიენტებს გამოცდების ჩაბარებაში ხელს ვერ შეუშლის.
„ტექნიკურ უნივერსიტეტთან დისშვილის საგულშემატკივროდ მოვედი. სკოლაში საუკეთესო მოსწავლე იყო, მხოლოდ მათემატიკაში ვამზადებდით. ამიტომ, ვფიქრობ, გამოცდების ჩაბარება არ გაუძნელდება. საგამოცდო გარემო ძალიან მომწონს, ყველაფერი მობილიზებულია და კანონზომიერად ხდება. არ არის ისეთი ქაოსი, როგორც მსგავს შემთხვევებში. გამოცდებში ელექტრონული სისტემის შეტანა პროგრესია, არ მგონია, ამან ხელი შეუშალოს ბავშვებს გამოცდების ჩაბარებაში, რადგან დღეს კომპიუტერს ყველა ფლობს, გარდა ამისა, საკმარისი დრო აქვთ აბიტურიენტებს საკუთარი ცოდნის გამოსამჟღავნებლად. წარმატებებს ვუსურვებ ყველას,“_თქვა კახიშვილმა.
მშობელი მარინა ბერიანიძე კი ამბობს, რომ რამდენად მოხერხებულია ელექტრონული სისტემით გამოცდების ჩაბარება აბიტურიენტებმა უნდა შეაფასონ.
„ველოდები, რომ ჩემი შვილი წარმატებებს მიაღწევს. მომწონს ეროვნული გამოცდების გარემო, რაც შეეხება კომპიუტერულ ტესტებს, პირველი მცდელობაა. გამოვა ბავშვი გამოცდიდან და შემდეგ შევიტყობ, რამდენად მისაღები იყო მისთვის გამოცდის ეს მეთოდი, გაუადვილდა თუ არა ჩაბარება. საქართველოში მარტო სკოლის ცოდნით შეუძლებელია გამოცდების ჩაბარება, ამიტომ ყველა ბავშვი სამივე ძირითად საგანში ემზადება. ჩემს შვილს საფინანსოზე აქვს გადაწყვეტილი ჩაბარება, მგონი, ქართულს საუკეთესოდ ჩააბარებს იმიტომ, რომ ქართველები ვართ,“_ გვითხრა ბერიანიძემ.
აბიტურიენტების ნაწილმა, რომლებიც გამოცდაზე დილის 9:00 საათზე შევიდნენ, გამოცდიდან გამოსვლის შემდეგ აღნიშნეს, რომ ტესტები იმაზე უფრო ადვილი იყო, ვიდრე ელოდებოდნენ.
„ტესტები ძალიან ადვილი იყო, იმაზე ადვილიც, ვიდრე მოველოდი. იმედი მაქვს კარგ შედეგებს ავიღებ,“_ ამბობს აბიტურიენტი ანი კანკია.
საგამოცდო პროგრამის სიადვილეზე საუბრობს ასევე აბიტურიენტი თამარ შამუგიაც.
„იმაზე რთული საკითხები მეგონა, ვიდრე შემხვდა. თუ არ ინერვიულებ ყველაფერი კარგად იქნება. რაც შეეხება ელექტრონულ ვერსიას მე პირადად ფურცლებზე მერჩივნა, თუმცაა, ალბათ, ზოგისთვის მარტივი იყო,“_თქვა შამუგიამ.
14:00 საათზე აბიტურიენტების მეორე ნაწილის რეგისტრაცია დაიწყო.
როგორც ერთ-ერთმა აბიტურიენტმა მარიამ ბაქრაძემ თქვა გამოცდების კომპიუტერული სისტემით ჩაბარება ადვილი უნდა იყოს.
„არ მაქვს ჩემი თავის იმედი, მაგრამ იმედია ყველაფერი კარგად იქნება. ვნერვიულობ. მეშინია, მაგრამ საშიში არც არაფერია ასე მგონია. ამ თაობისთვის გამოცდების კომპიუტერული სისტემით ჩაბარება ადვილი უნდა იყოს,“_ არნიშნა ბაქრაძემ გამოცდაზე შესვლის წინ.
აბიტურიენტმა გიორგი ჩხიკვინიძემ კი გამოთქვა იმედი, რომ გამოცდებს ჩააბარებს.
„გამოცდიდან გამოსული აბიტურიენტებიდან შევიტყვე, რომ ელექტრონული ვერსიით გამოცდების ჩაბარება ადვილია. არ ვნერვიულობ. ალბათ, ჩავაბარებ,“_ამბობს ჩხიკვინიძე.
როგორც ცნობილია, ერთიან ეროვნულ გამოცდებში წელს 38 500-ზე მეტი აბიტურიენტი მონაწილეობს.
შეფასებისა და გამოცდების ცენტრის ხელმძღვანელის, მაია მიმინოშვილის ინფორმაციით, დღეს ეროვნულ გამოცდებში მონაწილეობა 19 000-მდე აბიტურიენტს უნდა მიეღო, თუმცა საგამოცდო ცენტრებში დილით 96,7 % მივიდა. გამოცდაზე არ გამოცხადდა რეგისტრირებულ აბიტურიენტთა 5%.
რაც შეეხება გამოცდაზე გამსვლელ აბიტურიენტთა მეორე ნაკადის შედეგებს, შეფასებისა და გამოცდების ცენტრის ინფორმაციით, 9200-ზე მეტი აბიტურინტიდან დარეგისტრირებულთა 98% გამოცხადდა.
დღეისთვის ერთიანი ეროვნული გამოცდების ორივე სესია უკვე დასრულებულია.
როგორც ცნობილია, ერთიანი ეროვნული გამოცდები 22 ივლისს, ფიზიკის გამოცდით დასრულდება, ხოლო თვის ბოლოს აბიტურიენტები გამოცდების შედეგების გაგებას შეძლებენ.
ამავე თემაზე:
გამოცდების პროცესს უხარვეზოდ არ ჩაუვლია – მიმინოშვილი
აბიტურიენტს სამედიცინო დახმარება დასჭირდა
მოხსნეს თუ არა აბიტურიენტები გამოცდიდან
გამოცდების მიმდინარეობისას ელექტროენერგია გაითიშა
საგამოცდო პროცესიდან პირველი აბიტურიენტები გამოვიდნენ
ჩემი სახით, კიდევ ერთი გულშემატკივარი გყავთ – განათლების მინისტრი აბიტურიენტებს მიმართავს
რამდენი აბიტურიენტი გამოეთიშა გამოცდებს
ერთიანი ეროვნული გამოცდების რეგისტრაციის პროცესმა მშვიდ ვითარებაში ჩაიარა – მიმინოშვილი
"თქვენ აუცილებლად მიაღწევთ დასახულ მიზანს" – პრემიერი აბიტურიენტებს მიმართავს
ერთიანი ეროვნული გამოცდები დაიწყო
