CSR კვირეულის ფარგლებში, "საქართველოს ბანკის" ცენტრალურ ოფისში თემაზე "შეზღუდული შესაძლებლობების მქონე პირების პრობლემები საქართველოში და კორპორაციული სოციალური პასუხისმგებლობის როლი” შეხვედრა გაიმართა.
შეხვედრაში "კორპორაციული სოციალური პასუხისმგებლობის კლუბის" წევრებთან ერთად, შეზღუდული შესაძლებლობების მქონე პირების პრობლემებზე მომუშავე არასამთავრობო ორგანიზაციებისა და შრომის, ჯანმრთელობისა და სოციალური დაცვის სამინისტროს წარმომადგენლებიც მონაწილეობდნენ.
როგორც შეხვედრის დაწყებამდე "კორპორაციული სოციალური პასუხისმგებლობის კლუბის" წევრმა, კახა მაღრაძემ აღნიშნა, შეხვედრის მიზანია მონაწილეებმა გაცვალონ შეზღუდული შესაძლებლობების მქონე პირების შესახებ მოსაზრებები, რომ მათთვის დახმარების აღმოჩენა გაადვილდეს.
"კორპორაციული სოციალური პასუხისმგებლობის კლუბი" უკვე ერთი წელია ფუნქციონირებს და 80-მდე სხვადასხვა ორგანიზაციას აერთიანებს. ორი ძირითადი მიმართულება გვაქვს: პოპულარიზაციას ვუწევთ კორპორაციულ სოციალურ პასუხისმგებლობას და ვცდილობთ, საერთაშორისო სტანდარტების განვითარების გზით, მოვახერხოთ, ამ კუთხის განვითარება. რაც შეეხება დღევანდელ ღონისძიებას, შეზღუდული შესაძლებლობების მქონე პირების საკითხებზე ვაწყობთ შეხვედრას, სადაც არასამათავრობო ორგანიზაციები, ბიზნეს კომპანიები გაცვლიან გამოცდილებას და მოსაზრებებს, რომ შევძლოთ უფრო მეტი პასუხისმგებლობა გამოვიჩინოთ ამ პრობლემების მიმართ,"_ თქვა მაღრაძემ.
ფონდ "სიცოცხლის ხე"-ს წევრმა, ანა თათულიშვილმა, შეხვედრის დაწყებამდე ჟურნალისტებთან საუბრისას იმედი გამოთქვა, რომ სხვადასხვა ორგანიზაციები შეზღუდული შესაძლებლობების მქონე პირებზე ზრუნვაში აქტიურად ჩაერთვებიან.
"ფონდი "სიცოცხლის ხე" უკვე მესამე წელია შეზღუდული შესაძლებლობების პირების დასახმარებლად სხვადასხვა ღონისძიებებს ახორციელებს. ჩვენთვის დღევანდელი დღის თემა ძალიან მნიშვნელოვანია და მოხარული ვიქნებით, თუ სხვადასხვა ორგანიზაციები აქტიურად ჩაერთვებიან შეზღუდული შესაძლებლობების მქონე პირებზე ზრუნვაში,"_ განაცხადა თათულაშვილმა.
შეხვედრაზე ყურადღება გამახვილდა ბიზნესის მიერ შეზღუდული შესაძლებლობის მქონე პირების დასაქმების პერსპექტივებზე და იმაზე, თუ რა მდგომარეობაა ამ მიმართულებით დღეს საქართველოში.
შეხვედრაზე ორგანიზაციების წარმომადგენლებმა ასევე ისაუბრეს სხვადასხვა გამოწვევებსა და უპირატესობებზე, რაც თან ახლავს შეზღუდული შესაძლებლობების მქონე პირების დასაქმებას ორგანიზაციებში.
როგორც შეხვედრის მიმდინარეობის დროს "ინკლუზიური საზოგადოება-საქართველოს" წარმომადგენელმა, გია ჯვარშეიშვილმა აღნიშნა, ქვეყანაში ექსპერიმენტების დრო არ არის.
"ქვეყანაში ექსპერიმენტების დრო არ არის და შეზღუდული შესაძლებლობების მქონე პირების დასახმარებლად ყველაფერი უნდა გაკეთდეს. კონვენციაში გაწერილია ის ნორმები თუ რა და როგორ უნდა გაკეთდეს.როდესაც გადაწყვეტილება მიიღეთ პანტუსების გაკეთების შესახებ საერთოდ უარი უნდა გეთქვათ მაგ გადაწყვეტილებაზე, რადგან, რეალურად პანტუსებს შეზღუდული შესაძლებლობების მქონე პირები ვერ სარგებლობენ,"_ განაცხადა ჯვარშეიშვილმა.
მას "ფონდი "სიცოცხლის ხეს" წარმომადგენელი, ანა თათულაშვილი გამოეპასუხა, რომელმაც აღნიშნა, რომ პანტუსების გაკეთებამდე კომპეტენტურ პირებთან გაიარეს კონსულტაცია და გაკეთების დროს სტანდარტებიც დაიცვეს.
რის შემდეგაც ჯვარშეიშვილმა პანტუსების შექმნაში მონაწილე კომპეტენტური პირებს დამნაშავეები უწოდა.
"დამნაშავეები არიან, რადგან პანტუსები არ არის უსაფრთხო,"_განაცხადა მან, თუმცა დებატების გაგრძელება აღარ მოისურვა.
