ივლისის დასაწყისისთვის, ოზურგეთში უკიდურესად დაეცა თხილის ფასი, ხოლო შაქრის ფასმა აიწია _ კილოგრამი შაქარი 1 ლარი და 90 თეთრი ღირს.
ბაზარში, ქუჩებსა თუ სუპერმარკეტებში ხალხი ხმამაღლა გამოთქვამს პროტესტს, არაერთი მოქალაქე კი, კითხვაზე, როგორ იმოქმედა მათი ოჯახის ბიუჯეტზე ფასების ამ ცვლილებებმა, გვპასუხობს: "შაქარი გაუჩინა ღმერთმა, ვინც ასე გვახრჩობს! კომპოტების და მურაბების სეზონიაო, ლარის კურსი დაეცაო, რომ იძახიან, შარშან ამ დროს არ კეთდებოდა მურაბა და კომპოტი თუ ლარის კურსი იყო საოცნებო? ჯიბეები როგორ გაისქელონ, იმას ფიქრობენ, ხალხი ვის ადარდებს?!" _ გვეუბნება გულიკო ბერაძე და კითხვას სვამს _ "დახლებიდან რომ შაქარი გაქრა, ჩამოტანას ველოდებითო, რომ გვეუბნებიან, ვითომ ერთი დღის მარაგი ჰქონდათ ამხელა მაღაზიებს? გადამალეს და იაფად ნაყიდში ჩვენგან ორმაგად ამოიღებენ,"_ ამბობს ის.
ჩვენ არაერთ მაღაზიას და სავაჭრო ცენტრს ვეწვიეთ. ბევრგან შაქარი საერთოდ არ ჰქონდათ, "უშაქრო" დახლებზე სხვა დასახელების პროდუქტი ალაგია, გამყიდველები კი ფოტოობიექტივს თავს არიდებენ.
_ ჩვენ რა ვიცით, რატომ გაძვირდა? ახლა არ გვაქვს, ველოდებით. რომ მივიღებთ, დავალაგებთ დახლებზე, _ გვეუბნებიან ვასაძეების სუპერმარკეტში, აგრარული ბაზრის მარკეტებში, ასევე, სხვადასხვა საბითუმო მაღაზიაში.
ამბობენ იმასაც, რომ ერთი კილოგრამი შაქრის ფასი მალე 2 ლარს მიაღწევს და ბევრი ზამთრისთვის ტკბილეულს ვეღარ გააკეთებს.
_ ერთი კილოგრამი მურაბა თუ 5 ლარი დამიჯდება, საერთოდ არ ვჭამო, არ ჯობს? _ გვეუბნება ნინო ცხომელიძე, _ ერთი კილოგრამი ბალი, მოცვი თუ ჟოლო 4 ან 5 ლარი ღირს, შაქარი 1 ლარი და 90 თეთრი. იანგარიშეთ, რა ჯდება ერთი კილოგრამი მურაბის გაკეთება, ხუთ ლარზე მეტი, ხომ? მოსახლეობის რამდენი პროცენტი შეძლებს ასეთი საბაზრო ეკონომიკის "აღმავლობის" პირობებში ზამთრისთვის მურაბის მოხარშვას? მართლა გადაეფარა ეს ოხერი ფული ქვეყნიერებას თვალებზე? რამდენიმე წლის წინ იყო ასე _ სწორედ, ზაფხულის დასაწყისში უცებ გააძვირეს შაქარი. მერე შაქარს მაინც ვყიდულობდით ხელმისაწვდომ ფასში. ახლა 40-50 თეთრით გააძვირეს. შაქრის, ისევე, როგორც პურის გარეშე, ადამიანი იარსებებს? _ ამბობს ის და ხელს მაინც მთავრობისკენ იშვერს, _ რატომ არიან გატრუნული, გაიგონეთ სადმე ვინმემ თქვა ტელევიზიით ან გაზეთში დაწერეს, რომ შაქრის ფასი ასე უცებ 40 -50 თეთრით გაიზარდა? იქნებ, გვითხრან, რა ხდება ჩვენს თავს?
მარინა კაპანაძე, ხუთი შვილის დედა:
_ 30 ივნისს ერთი კილოგრამ შაქარში 1 ლარი და 55 თეთრი გადავიხადე, 2 ივლისს უკვე 1 ლარი და 90 თეთრი ღირდა. ხუთი შვილი მყავს და ერთი თვის სამყოფ შაქარს წინასწარ ვერ ვყიდულობ. საშუალება როგორც გამიჩნდება, ისე ვახერხებ, ხან _ ერთი, ხან ორი კილოგრამის ყიდვას. როგორია, ოთხ კილოგრამს რომ ვყიდულობდი, ახლა იმ თანხით სამ კილოგრამსაც რომ ვერ ვიყიდი?
ოზურგეთში დანარჩენი საკვები პროდუქტების ფასი, ჯერჯერობით, იგივეა. რაც შეეხება კარტოფილს, წელს უხვი მოსავალი აღინიშნება და კილოგრამს 40-50 თეთრად ყიდიან.
ნაზიკო მგელაძე, ნასაკირალის მკვიდრი, ფერმერი:
_ რაც თავი მახსოვს, კარტოფილი მომყავს, სამ ტონამდე ვიწევთ და წელს რომ ფასი დაეცა, ასეთი შემთხვევა ნაკლებად მახსოვს. საუკეთესო ხარისხის კარტოფილს 50 თეთრადაც ვერ ვყიდით. იმდენი შრომა სჭირდება, რომ იანგარიშო, გაყიდვა წყალში გადაყრას ნიშნავს, მაგრამ პური და შაქარი ხომ უნდა ვიყიდო? ახლა შაქარი ისე გაძვირდა, 4 კილოგრამი კარტოფილი უნდა გავყიდო, რომ ერთი კილოგრამი შაქარი ვიყიდო. არასდროს უნდა დაედოს გლეხის ნამუშევარს ფასი?! კი, ბატონო, თუ გაჭირვებაა, კარტოფილით გავიტან თავს და სულ არ ვიყიდი შაქარს, მაგრამ ერთხელ ხომ გავიარეთ ასეთი ყოფა დაბნელებულ 90-იან წლებში? რაღას გვახსენებენ იმ უბედურებას?
ზოგადად, აგრარულ ბაზარში გლეხების საუბარში აშკარა უკმაყოფილება იგრძნობა ადამიანის შრომის დაუფასებლობის გამო. მიიჩნევენ, რომ გლეხის ნაშრომს ფასი არ ადევს და თუნდაც ის ფაქტი, რომ ერთი კილოგრამი ყველი 4,50 ან 5 ლარი ღირს, გლეხის შრომის "გაბითურებაა".
რაც შეეხება თხილს, ოზურგეთში, ივლისის დასაწყისში უკვე დაიწყეს ახალი თხილის მიღება და ერთი კილოგრამი 50 თეთრი ღირს! ვინ და როგორ დაადგინა ეს ფასი, თხილის მიმღებ პუნქტებში ვერ გვეუბნებიან. არც იმას ამბობს ვინმე, ამოქმედდა თუ არა მთავრობის მიერ მიღებული რეგულაციები.
_ ჩვენ რა ვიცით, რა კანონი მიიღეს? არავის უთქვამს. ვიბარებთ 50 თეთრად, ისიც ნაკლებად მოაქვთ. მთელი დღე ასე ვზივართ და მხოლოდ იმას გვეკითხება გამვლელ-გამომვლელი, თხილის ფასი თუ მოიმატებსო. რომ ვეუბნებით, რა ფასებიცააა, იწყევლებიან და მიდიან. რა ჩვენი ბრალია? ჩვენც ვზივართ და ველოდებით, იქნებ ფასმა მოიმატოს, რომ ხალხმა თხილი ჩააბაროს, _ ამბობენ ისინი.
რაც შეეხება შარშანდელ თხილს, რომელიც არაერთ ოჯახს აქვს შენახული იმ იმედით, რომ ფასი მოიმატებდა, დღეისთვის, მისი ფასი უფრო დაეცა და კრიტიკულ ზღვარს მიაღწია _ "გულშიშველა" 1 ლარი და 50 თეთრი ღირს, ხოლო "ბერძნულა" _ 2 ლარი და 50 თეთრი.
რაც შეეხება მთავრობის მიერ მიღებულ რეგულაციას, რაც იმას ნიშნავს, რომ თხილის ჩაბარების დროს გაკონტროლდება ხარისხი და შარშანდელის მსგავსად ხარისხიან და ე. წ. "ნაგერას" და "ფურას" ერთმანეთში აღარ აურევენ, ჯერჯერობით, არ მოქმედებს.
