საქართველომ უნდა ითანამშრომლოს სლოვენიასთან ევროპულ და ევროატლანტიკურ სტრუქტურებში ინტეგრაციის პროცესში რეფორმების გაზიარების თვალსაზრისით, _ აღნიშნულის შესახებ საქართველოს პრეზიდენტმა გიორგი მარგველაშვილმა სლოვენიაში ოფიციალური ვიზიტის შეფასებისას განაცხადა.
პრეზიდენტის თქმით, ქართულ-სლოვენიურ ურთიერთობებში ახალი ფურცელი იწყება.
"მე მინდა გაცნობოთ, რომ სლოვენია ყოველთვის ძალიან აქტიურად უჭერდა მხარს საქართველოს უმნიშვნელოვანეს სტრატეგიულ საკითხებზე, როგორიცაა ჩვენი ტერიტორიული მთლიანობა, ევროპული და ევროატლანტიკური არჩევანი, მაგრამ მინდა ასევე მოგახსენოთ, რომ არსებობს ძალიან ბევრი სფერო, სადაც ჩვენ შეგვიძლია აქტიურად ვითანამშრომლოთ.
თავდაცვის სფეროში თანამშრომლობასთან დაკავშირებით სლოვენიამ ვარშავის სამიტზევე გააკეთა განცხადება, არსებობს ეკონომიკურ, კულტურულ სფეროში თანამშრომლობის დიდი პოტენციალი.
შესაძლებელია თანამშრომლობა იმ დიდი გამოცდილების გაზიარებით, რომელიც ჩვენნაირი წარსულის მქონე ქვეყანას აქვს რეფორმირების და ევროპულ და ევროატლანტიკურ სტრუქტურებში ინტეგრაციის გზაზე.
მე, დავპატიჟე სლოვენიის პრეზიდენტი. იქნება საპასუხო მაღალი დონის ვიზიტები ჩვენ ქვეყანაში, რაც გააღრმავებს ჩვენ ორ ქვეყანას შორის ურთიერთობებსაც და გააღრმავებს თანამშრომლობასაც საერთაშორისო არენაზე", _ განაცხადა საქართველოს პრეზიდენტმა.
ცნობისთვის, სლოვენიის რესპუბლიკაში ოფიციალური ვიზიტის ფარგლებში, გიორგი მარგველაშვილმა შეხვედრა სლოვენიის პრმიერინისტრ მიტო ცერართან გამართა.
საქართველოს ევროპული და ევროატლანტიკური ინტეგრაციის პროცესის ხელშეწყობისა და განვითარებისათვის, შეხვედრისას მხარეებმა დაინტერესება გამოთქვეს, სხვადასხვა სამინისტროს შორის თანამშრომლობისა და სლოვენიის გამოცდილების გაზიარებასთან დაკავშირებით.
შეხვედრისას ხაზი გაესვა მზადყოფნას, სავაჭრო და ეკონომიკური თანამშრომლობის გაძლიერებისათვის.
აღინიშნა, რომ პრეზიდენტის დელეგაციაში საქართველოს სავაჭრო-სამრეწველო პალატის ჩართვა და ვიზიტის ფარგლებში ორი ქვეყნის სავაჭრო-სამრეწველო პალატებს შორის ურთიერთგაგების მემორანდუმის ხელმოწერა, ურთიერთობების გაღრმავებისათვის წინგადადგმული ნაბიჯია.
ევროკავშირი-საქართველოს ასოცირების-ღრმა და ყოვლისმომცველი თავისუფალი სავაჭრო სივრცის ხელშეკრულების შესაძლებლობების გათვალისწინებით, საქართველო მიესალმება სლოვენიელი მეწარმეებისა და ინვესტორების მიერ საქართველოსთან სავაჭრო-ეკონომიკური თანამშრომლობის პოტენციალის შესწავლას.
რაც შეეხება სოფლის მეურნეობის სფეროს, ქართულმა მხარემ დაინტერესება გამოხატა ერთობლივი სასოფლო – სამეურნეო პროექტების განხორციელებაში.
ქართული მხარე დაინტერესებულია ასევე, სლოვენიის ბაზარზე საქართველოს სასოფლო – სამეურნეო პროდუქტების ექსპორტის ხელშეწყობის მიმართულებით.
საქართველოს პრეზიდენტის ოფიციალური ვიზიტი სლოვენიის რესპუბლიკაში დღეს დასრულდება.
