“მესმის მოსახლეობის იმ ნაწილის, ვისთანაც პირადად არ მივიდა ეს სიკეთე”

დაბა ნარუჯა ოზურგეთის მუნიციპალიტეტში მდებარეობს, ქალაქის ცენტრიდან 10 კილომეტრის დაშორებით.

ნარუჯის დასახლება გაჩნდა 1929-30 წლებში, როდესაც ლაითურის ჩაის მეურნეობის გაშენების დროს გადაწვეს ტყითა და ბუჩქნარით დაფარული გაუვალი ადგილები. მისი სახელწოდებაც გადაწვის, გადარუჯვის შედეგად გაჩნდა. 1949 წლის ბოლოს დასახლება გამოეყო ლაითურს და ცალკე მეურნეობად ჩამოყალიბდა.

1986 წელს ნარუჯამ უკვე დაბის სტატუსი მიიღო.

2015 წლის აღწერის მიხედვით, დაბაში 3 207 ადამიანი ცხოვრობს. აქ სხვადასხვა ეროვნების და სარწმუნოების ადამიანები თითქმის საუკუნეა მშვიდად ცხოვრობენ და ეკონომიკურ პრობლემებთან გამკლავებას ერთად ცდილობენ.

რა აწუხებთ და რას ითხოვენ ნარუჯაში მცხოვრები ქალბატონები _ ამ თემაზე "გურია ნიუსისა" და "Post _ ალიონის" ერთობლივი გადაცემისთვის _ "მონოლოგიდან _ დიალოგამდე" სპეციალური რეპორტაჟი ჟანა მეგრელიშვილმა და გიორგი გირკელიძემ მოამზადეს.

"ერთადერთი, რაც გვაქვს, წყალია. სამუშაო არაა _ მხოლოდ ჩაის ვკრეფთ და კილოგრამში 22 თეთრს გვიხდიან. აქაურების 90 პროცენტი თურქეთში მუშაობს _ კაცია თუ ქალი, ყველა იქ მიდის სამუშაოდ. სამი წელია გზას აკეთებენ. ვითომ გააკეთეს, მაგრამ ვიხრჩობით მტვერში, ტალახში. დავწერეთ განცხადება, ვიდავეთ, გზებიც გადავკეტეთ, მაინც არაფერი გამოგვივიდა. გაზი არ გვაქვს. ნარუჯის ცენტრში მდებარე სამი მრავალბინიანი სახლის სახურავი არ შეუცვლიათ, დანარჩენი გადახურეს, ჩვენ დაგვტოვეს. ჭერიდან წყალი ჩამოდის, ლამისაა, ჩამოინგრეს.

დილა იმაზე ფიქრით იწყება, სად ვიშოვოთ პურის ფული. 5-5 დღით გადავდივართ თურქეთში. ხუთ დღეში რამდენი უნდა იშოვო? პენსია არ გვაქვს და სოციალური დახმარება. რით ვირჩინოთ თავი?" _ აღნიშნეს გადაცემის რესპონდენტმა ქალბატონებმა.

მათი თქმით, ნარუჯა ხელისუფლებისგან მიტოვებულია:

_ ყურადღებას არავინ გვაქცევს _ გაზი არ არის, გზა არ არის. პირადულ პრობლემებს რაც შეეხება, გაუსაძლისად უჭირს ხალხს. ეს თურქეთი რომ არ იყოს, ხალხი მშიერი მოკვდება. იქ წასვლაც აღარ შეუძლიათ, ისე დაავადმყოფდნენ, მაგრამ იძულებულნი არიან_ შვილებს საჭმელი, ტანსაცმელი, სწავლა ხომ უნდათ?! ჩაის საკრეფად დადიან. ფაქტობრივად, უცხოელების მონები ვართ!" _ აღნიშნავენ ნარუჯაში მცხოვრები ქალბატონები.

ნარუჯაში არსებულ პრობლემებზე, მათი მოგვარების გზებზე გადაცემის მეორე ბლოკში ოზურგეთის მუნიციპალიტეტის გამგებელმა მერაბ ჭანუყვაძემ ვრცლად ისაუბრა.

_ ნარუჯაში არსებული პრობლემების შესახებ ჩვენ არაერთხელ გვისაუბრია. ოზურგეთის მუნიციპალიტეტის თემებში არის უგზოობის პრობლემა _ 2 000 კილომეტრზე მეტი შიდა სასოფლო გზა გვაქვს და შესაბამისად, ამ პრობლემების ერთბაშად გადაწყვეტა გამორიცხულია. ჩვენ გვაქვს გაწერილი სამწლიანი გეგმა, რომელსაც მივყვებით და ნარუჯელებს მალე ექნებათ მოასფალტებული გზა, _ აღნიშნა გადაცემაში სტუმრობისას მერაბ ჭანუყვაძემ, _ თუმცა, წელს ამის პირობას ვერ მივცემთ, რადგან საკმაოდ დიდი მონაკვეთია. მალე დაიწყება ნარუჯაში გზის მოხრეშვითი სამუშაოები და წელს გზა მოწესრიგდება.

_ ბატონო მერაბ, გზის მოხრეშვა გამოსავალია? როგორც წესი, დახრეშილი გზა ერთ გაწვიმებასაც ვერ უძლებს…

_ გეთანხმებით, მაგრამ ამ შემთხვევაში სხვა შესაძლებლობა მუნიციპალიტეტს არა აქვს. როგორც აღვნიშნე, შეუძლებელია ამ სიგრძე გზის ერთდროულად დაგება. ჩვენ წელს დავიწყეთ რამდენიმეწლიანი პროექტი _ გზებს ვაგებთ იმ სოფლებში, სადაც წლების განმავლობაში არაფერი გაკეთებულა, _ ამბობს ოზურგეთის გამგებელი.

მისივე ინფორმაციით, უკვე დაწყებულია მოლაპარაკებები საგზაო დეპარტამენტთან ლაითურის გზის რეაბილიტაციასთან დაკავშირებით, რომელსაც ავტომატურად მიებმება ნარუჯის გზაც.

ჭანუყვაძის თქმით, სოფლებში ყველაზე დიდი პრობლემა წყლის არარსებობაა და ამ პრობლემის მოგვარება მუნიციპალიტეტის პრიორიტეტია:

_ არის ადგილები, სადაც წყალი არ არის, არის ადგილები, სადაც გზა არ არის. ნარუჯაში წყლის პრობლემა მოგვარებულია და არ შეიძლება იმის თქმა, რომ სოფელში არაფერი გაკეთებულა _ ძალიან ბევრი რამ გაკეთდა, თუმცა აბსოლუტურად მესმის მოსახლეობის იმ ნაწილის, რომლებთანაც პირადად არ მივიდა ეს სიკეთე. ძალიან ბევრი საერთო საცხოვრებელი გადავხურეთ, ბევრს სამშენებლო მასალებით დავეხმარეთ და ამ პროგრამას ვაგრძელებთ. სახურავების უმრავლესობა დაზიანებული სიძველის გამო და შეუძლებელია ამდენი სახლი ერთობლივად გადაიხუროს. ჩვენ ეს პროცესი დაწყებული გვაქვს, 15 საერთო საცხოვრებელი უკვე დახურულია და ამ მიმართულებით მუშაობას აუცილებლად გავაგრძელებთ, _ აღნიშნა მუნიციპალიტეტის გამგებელმა.

მერაბ ჭანუყვაძემ გადაცემაში სტუმრობისას, ერთ-ერთ ყველაზე მნიშვნელოვან პრობლემაზე _ უმუშევრობაზეც ისაუბრა და აღნიშნა, რომ სახელმწიფო უამრავ პროექტს ახორციელებს, რომლითაც სარგებლობა ნებისმიერ ადამიანს შეუძლია. მან აქცენტი ბიზნესის ხელშეწყობის პროგრამაზეც გააკეთა და დასძინა, რომ დღეს ბიზნესი ყოველგვარი წნეხისგან თავისუფალია.

რატომ გაათავისუფლა მერაბ ჭანუყვაძემ მრჩეველი გენდერულ საკითხებში, დანიშნავდა თუ არა მუნიციპალიტეტის პირველი პირი მოადგილედ ქალს, რას აკეთებს ადგილობრივი ხელისუფლება გენდერის მიმართულებით _ ამ საკითხებზე მერაბ ჭანუყვაძის მოსაზრებების გაგება და გადაცემის სრული ვერსიის ნახვა შეგიძლიათ აქ.