"ძალიან ხშირად გვხვდება ქუჩაში ძაღლები, რომლებსაც არ ჰყავთ პატრონი. არის შემთხვევები, როცა ცხოველები ბავშვებს, და არა მარტო ბავშვებს, დასაკბენად მისდევენ. ეს საკითხი ბოლოს და ბოლოს როდის უნდა მოგვარდეს? უამრავი დაავადება შეიძლება გადაგვედოს მაწანწალა ძაღლებისგან", _ გვითხრა ქალაქ ოზურგეთში მცხოვრებმა, ი.დ.-ძემ.
ი. დ.-ძე ერთადერთი არ არის, ვინც ამ საკითხთან დაკავშირებით "გურია ნიუსს" დაუკავშირდა.
"ბაილეთიდან გიკავშირდებით. ვერც დღისით და ვერც ღამით ვერ გაივლით ოზურგეთთან დამაკავშირებელ გზაზე _ დაახლოებით, 10-12 ძაღლი მაინც არის გარეთ იმ ადგილას, სადაც ძაღლთა თავშესაფარია. ძალიან აგრესიულები არიან ეს ძაღლები, ყურადღებას კი არავინ გვაქცევს. სანამდე გაგრძელდება ასე, არ ვიცი", _ გვითხრა სატელეფონო საუბრის დროს სოფელ ბაილეთში მცხოვრებმა ერთ-ერთმა ქალბატონმა.
ინდმეწარმე გოგი მაღლაფერიძემ ქალაქ ოზურგეთში ტენდერი მოიგო და სწორედ მას ევალება ძაღლების ვეტერინარული მომსახურება.
"ძაღლთა თავშესაფარში ძაღლის დიდხანს გაჩერება არ შეიძლება და აქედან გამომდინარე, დიდხანს არც ვაჩერებთ _ ჩვენთან გადაგვყავს ცხოველები, უტარდებათ ვეტერინარული მომსახურება, ვუვლით და შემდეგ იმ ადგილას ვაბრუნებთ, საიდანაც წამოვიყვანეთ", _ ამბობს გოგი მაღლაფერიძე.
მისივე თქმით, იქ, სადაც ძაღლთა თავშესაფარი მდებარეობს, ხშირად ყრიან ძაღლებს:
"მოგვყავდა სახლებიდან ისეთი ძაღლები, რომლებიც პატრონს არ უნდოდა ან ავი იყო, ან შინაურ ფრინველებს ჭამდა და ვაძინებდით. ახლა ამის უფლება არ გვაქვს. იმ ადგილზე, სადაც ახლა ძაღლთა თავშესაფარია, ხშირად მოჰყავთ ძაღლები და ყრიან. მინდა გითხრათ, რომ მსგავსი ფაქტი მხოლოდ სოფელ ბაილეთის ტერიტორიაზე არ ხდება", _ თქვა ჩვენთან საუბრის დროს გოგი მაღლაფერიძემ.
"მედალფას" ოზურგეთის სამედიცინო ცენტრის რადიოლოგი ილია დოლიძე "გურია ნიუსთან" საუბრისას ამბობს, რომ ცოფი ან სხვა დაავადებები ამ ეტაპზე არ დაფიქსირებულა:
"საკმაოდ ხშირად მოდიან ჩვენთან დაკბენილი ადამიანები და ითხოვენ დახმარებას. მინდა გითხრათ, რომ მხოლოდ ძაღლებისგან დაკბენილები არ მოდიან. მაგალითად, იყო შემთხვევა, მაიმუნმა დაკბინა ერთ-ერთი მოქალაქე, ასევე, კატამ დაკაწრა და ა. შ. რაც მთავარია, მსგავს სიტუაციაში დროულად უნდა მოხდეს სამედიცინო პერსონალის ჩარევა. ამ ეტაპისთვის რაიმე სახის დაავადება არ გამოვლენილა", _ გვითხრა ილია დოლიძემ.
მისივე თქმით, 2016 წლის დასაწყისიდან დღემდე, ამ მიმართულებით 768 პაციენტს გაეწია დახმარება:
"ამ ორ დღეში 23 ადამიანს დავეხმარეთ, უფრო მეტად კატის ნაკაწრი ჰქონდათ, რამდენიმე ძაღლის მიერ იყო დაკბენილი".
ქალაქ ოზურგეთის მუნიციპალიტეტის მერიის პრესსამსახურში გვითხრეს, რომ "ოზურგეთში ფუნქციონირებს უმეთვალყურეოდ დარჩენილ ცხოველთა თავშესაფარი, სადაც უპატრონო ცხოველებს უტარდებათ მკურნალობა, ვაქცინაცია და ხდება მათი დანომვრა. აღნიშნულ თავშესაფარზე ტენდერი გამოაცხადა ა(ა)იპ "ოზურგეთის სერვისცენტრმა", რომელიც მოიგო ინდმეწარმე გიორგი მაღლაფერიძემ. აღნიშნული ფუნქციების შესასრულებლად ა(ა)იპ ინდმეწარმეს თვეში, საშუალოდ, 1 800 ლარით აფინანსებს.
ცხოველთა დაცვის ორგანიზაციების რეკომენდაციების გათვალისწინებით, ვაქცინაციის, მკურნალობის და დანომვრის შემდეგ ძაღლებს დაუსახლებელ ადგილებში უშვებენ, რადგან ცხოველების ლიკვიდაცია კანონით აკრძალულია. დანომრილი ძაღლები, რომლებიც ქალაქ ოზურგეთის ტერიტორიაზეა, სიცოცხლისთვის საშიშროებას არ წარმოადგენს", _ ამბობენ ქალაქ ოზურგეთის მერიის პრესსამსახურში.
