“ეს გააძლიერებს პოლიტიკურ პარტიასაც და პოლიტიკურ კულტურასაც ჩვენს ქვეყანაში”

"ქალების ყოფნა პოლიტიკაში აუცილებელია," _ ეს განცხადება საქართველო პრეზიდენტმა გიორგი მარგველაშვილმა "ივლიტას ბიბლიოთეკაში" გამართული შეხვედრის დროს გააკეთა.

ქვეყნის პირველი პირი მიიჩნევს, რომ პოლიტიკურმა პარტიებმა გენდერული თანასწორობა უნდა დაიცვან და პარლამენტში უფრო მეტი ქალი უნდა იყოს წარმოდგენილი, რაზეც ვრცლად "გურია ნიუსისა" და "Post ალიონის" ერთობლივ გადაცემაში _ "მონოლოგიდან _ დიალოგამდე" ისაუბრა.

_ არ მინდა, პოლიტიკოს ქალბატონებზე ცალ-ცალკე ვისაუბრო, მაგრამ მჯერა, რომ ქალები პოლიტიკაში მართლაც ძალიან დიდი პოზიტივის მომტანნი არიან. 2015 წელი მე გამოვაცხადე ქალთა წლად. ძალიან ვცდილობდი, რომ პარლამენტში გასულიყო კანონი, რომელიც გენდერულ კვოტირებას დააკანონებდა, თუმცა, ეს ასე არ მოხდა, რაც დასანანია. მთელი გასული წლის განმავლობაში მე ამაზე ვსაუბრობდი. რეალურად, წინააღმდეგი არავინ არ წავიდა, მაგრამ საქმე საქმეზე რომ მიდგა ეს პოზიცია არ იქნა დაფიქსირებული, _ განაცხადა საქართველოს პრეზიდენტმა გიორგი მარგველაშვილმა.

_ ქალი საქართველოში არის ადამიანი, რომელიც ერთდროულად მუშაობს, სოციალური ფუნქცია გააჩნია, სახლში, ასე ვთქვათ, "შემომტანია", მაგრამ ამავე დროიდან არის დედაც და მეუღლეც, ადამიანი, ვინც უვლის ოჯახს. არ მინდა სიღრმეებში შესვლა, მაგრამ თუ შევხედავთ რეალობას, ქალბატონებმა ბევრად მეტი შეძლეს. ფიზიოლოგიურადაც ქალი დედაა და ეს განაპირობებს მის აქტივობას, მაგრამ ქართველი ქალი მარტო ამ ფუნქციაში არ ჩაიკეტა _ უმძიმეს პერიოდში, როდესაც დაინგრა მთელი სოციალური სისტემა, როცა ჩვენი განათლება და გამოცდილება, ფაქტობრივად, არ იყო საჭირო და აუცილებელი გახდა ახალი გამოცდილების შეძენა, რადგან ბაზარმა ახალი სამუშაო ადგილები გააჩინა, რომლისთვისაც ჩვენ მზად არ ვიყავით, ამას ქალებმა გაართვეს თავი. სწორედ ქალების კისერზე გადაირა ბევრმა პრობლემამ. მე მიმაჩნია, რომ ის ფაქტი, როცა ქალბატონები არ არიან წარმოდგენილი, როგორც პარლამენტში, ასევე სხვა სახელმწიფო სტრუქტურებში ისეთი რაოდენობით, როგორც საჭიროა, არის არა მარტო უსამართლობა, არამედ რესურსის არასწორად გამოყენება, რადგან ქალბატონები ძალიან გამოცდილები არიან. განსაკუთრებით შუა ხნის ქალბატონები, რომლებმაც გადაიტანეს ძალიან მძიმე პერიოდი, _ განაცხადა პრეზიდენტმა.

ქვეყნის პირველი პირის თქმით, ერთ-ერთი მიზეზი იმისა, თუ რატომ მისცემს კონკრეტულ პარტიას ხმას არის ის, თუ რამდენად იქნება პირველ ოცეულში დაცული გენდერული ბალანსი: _ "ქართული ოცნების" ახალი სახეების, ლიდერების წარდგენისას ეს ბალანსი იყო დაცული და ამას მივესალმე. ვნახე "რესპუბლიკელების" ოცეული, რომელიც, ასევე, დაბალანსებულია და მინდა ამასაც მივესალმო. ეს ის არის, რაც გააძლიერებს პოლიტიკურ პარტიასაც და პოლიტიკურ კულტურასაც ჩვენს ქვეყანაში.

გადაცემის მეორე ბლოკში ქალების პოლიტიკაში ყოფნის აუცილებლობაზე, სირთულეებზე და საკუთარ გამოცდილებაზე საქართველოს უშიშროების საბჭოს მდივნის მოადგილემ, თეონა აქუბარდიამ ისაუბრა. მან ლონდონში სწავლების ერთწლიან პერიოდზე გაამახვილა ყურადღება და აღნიშნა, რომ დიდ ბრიტანეთში, სამხედრო სფეროში ქალების ნაკლებობაა:

_ ამ კუთხით, საქართველოში გაცილებით უკეთესი მდგომარეობაა, _ აღნიშნა აქუბარდიამ, რომლის თქმით, მის კურსელებს, რომლებიც 60 ქვეყანას წარმოადგენდნენ, ძალიან უკვირდათ, რომ სამხედრო სფეროში ქალებიც იყვნენ ჩართულები.

_ კურსზე, 105 სტუდენტიდან, ხუთი ვიყავით ქალი, აქედან 2 იყო ბრიტანელი. ბრიტანეთში ახალი ტრადიციაა, ქალი იყო თანაბარ დონეზე კაცთან უსაფრთხოების სფეროში. სხვათა შორის, ძალიან გაუკვირდათ, როცა დამინახეს. მე ვიყავი მეორე ქალი ამ ათი წლის განმავლობაში, რომელიც კოლეჯში სასწავლებლად მივიდა და ისიც სამოქალაქო სფეროდან. ისიც გაუკვირდათ, როცა გაიგეს, რომ საქართველოში იყო ქალი _ თავდაცვის მინისტრი, ქალი _ საგარეო საქმეთა მინისტრი, ქალი _ უშიშროების საბჭოს მდივანი. ბრიტანეთში თავდაცვის მინისტრი ქალი ჯერ არ ყოფილა. მიუხედავად იმისა, რომ იქ სხვა სფეროებში დაცულია გენდერული თანასწორობა, ამ სფეროში ბევრია გასაკეთებელი, _აღნიშნა აქუბარდიამ.

მისივე თქმით, საქართველოში ამ კუთხით გაცილებით უკეთესი მდგომარეობაა: _ მე საქართველოში არ მიგრძვნია, რომ ამ სფეროში ჩემი ადგილი არ არის. უფრო მეტიც _ კაცები ყოველთვის ცდილობდნენ, რომ დამხმარებოდნენ. ჩვენს სფეროში მამაკაცები ქალებს უფრო ენდობიან და აქვე გავავლებ ძალიან საინტერესო პარალელს _ როდესაც სასწავლო კურსის ფარგლებში მანჩესტერის ციხეში წაგვიყვანეს სისტემის შესასწავლად, ვნახე, რომ ყველაზე მეტი ქალი იყო ბადრაგად. როდესაც დავინტერესდი, ეს რით იყო გამოწვეული, ციხის ადმინისტრაციის უფროსმა მითხრა, რომ ქალები უფრო მეტი ნდობით სარგებლობენ პატიმრებში, _ თქვა თეონა აქუბარდიამ.

უშიშროების საბჭოს მდივნის მოადგილის თქმით, ქალის როლი ყველა სფეროში მნიშვნელოვანია:

_ მისასალმებელია ის ტენდენცია, რომ ქალების როლი მატულობს პოლიტიკაში. აუცილებელია, უფრო მეტი ჩართულობა იყოს და ვფიქრობ, უნდა წავახალისოთ ქალები იმისთვის, რომ პოლიტიკაში მოვიდნენ, _ აღნიშნა აქუბარდიამ.

მისივე თქმით, წარმატებული კარიერა ქალისთვის ადვილი არ არის. თუმცა, შეუძლებელი არაფერია: _ ძალიან დიდი მნიშვნელობა აქვს იმას, რომ არასოდეს არ უნდა შეწყვიტო საკუთარ თავზე მუშაობა. როდესაც პირველი შვილი შემეძინა, 20 წლის ვიყავი. დღისით ბავშვს ვუვლიდი და ღამით ვმეცადინეობდი, რომ გამოცდებზე კარგი შედეგი დამედო. ასევე ძალიან მნიშვნელოვანია მეუღლის მხარდაჭერა. სამწუხაროდ, დღეს საქართველოში მსხვერპლთშეწირვის ტრადიციაა, რომ ჯერ ოჯახია და მერე დანარჩენი. რა თქმა უნდა, ოჯახი ძალიან მნიშვნელოვანია, მაგრამ აუცილებელია, რომ თუნდაც საკუთარი ძილის ხარჯზე, უფრო მეტი ფოკუსირება მოხდეს და არ შევწყვიტოთ საკუთარ თავზე მუშაობა, _ აღნიშნა თეონა აქუბარდიამ გადაცემაში სტუმრობისას, რომლის სრული ვერსიის ნახვა შეგიძლიათ აქ.