საქართველოს ყოფილი პრემიერ-მინისტრის ბიძინა ივანიშვილის აზრით, ისეთი ეკონომიკური ზრდის ტემპი, რაც საქართველოს ახალი ხელისუფლების პირობებში აქვს, არასდროს ჰქონია.
ამის შესახებ ივანიშვილმა რეგიონულ ჟურნალისტებთან შეხვედრაზე გურიაში განაცხადა.
"ეკონომიკური ზრდის ტემპი შესაძლოა არ არის მომხიბლავი დღეს როგორიც იყო ახალი ხელისუფლების მოსვლის შემდეგ 4 წლის განმავლობაში, თუმცა, შეგახსენებთ, რომ ჩვენ ვართ ლიდერები ეკონომიკური ზრდის ტემპით, რომელიც არასდროს ყოფილა წინა ხელისუფლების დროს. როდესაც რეგიონში არის კრიზისი, როდესაც ევროპაშია კრიზისი, იქ ქვეყანა ვერ გაიზრდება ძალიან მაღალი ტემპებით, მაგრამ ამ პროცესში საქართველო არის ლიდერი ზრდის ტემპებით", _ განაცხადა ივანიშვილმა და დასძინა, რომ ქვეყანა ვალების ეკონომიკიდან გადავიდა ინვესტიციების ეკონომიკაზე.
”კორუფცია ნულამდეა დასული. სამუშაო ადგილები 2006-12 წლამდე 23 000-ით შემცირდა და ქვეყნიდან გადინების ტემპი იყო ძალიან მაღალი. ჩვენი მოსვლის შემდეგ სამუშაო ადგილები გაიზარდა დაახლოებით 65 000-ით. ამავდროულად, ეს არ გაზრდილა სახელმწიფო სტრუქტურების ხარჯზე, პირიქით, სახელმწიფო სტრუქტურებში დასაქმებულთა რაოდენობა შემცირდა. ვალების ეკონომიკიდან გადავედით ინვესტიციების ეკონომიკაზე. ლარის კურსი ახალი ვალებით რეგულირდებოდა. ნახეთ ახლა როგორი მცურავი კურსი დავიჭირეთ და რა მოხდა რეგიონებში. ლარმა ჯანსაღად აჩვენა საკუთარი თავი სწორი ეკონომიკის პირობებში, რაც საოცრად ძნელი მისაღწევი იყო. როდესაც რეგიონი არის კრიზისში, იქ რომელიმე ქვეყანა ვერ იქნება სუპერწარმატებული, მაგრამ ამ პირობებში ჩვენ ვართ ლიდერები”, _ აღნიშნა ივანიშვილმა.
მისივე თქმით, ეკონომიკის აღორძინებას დრო სჭირდება.
"15-20 წელიწადი არ არის დიდი დრო, რომ ევროპის მსგავსი ეკონომიკა უნდა გვქონდეს. თქვენ 4 წელიწადი უნდა გააანალიზოთ, სად ვიყავით და სად მოვედით. საოცრებას ითხოვთ როცა ამბობთ, გადით და გაჭირვებულებს ნახავთო. როცა 2030 წელს ვახსენებ, მინდა საზოგადოებას განვუმარტო, არ იფიქროთ, რომ 2030 წელს გაჭირვებულს ვერ ნახავთ, ან ნახავთ ისეთ სახელმწიფოს, სადაც გაჭირვება არ არის, ეს ყველგან არის და ეს ასე იქნება. თქვენ ახლა უნდა შეადაროთ, თუ რა ხდებოდა, მაგალითად, სამუშაო ადილების თვალსაზრისით და რა ხდება ახლა", _ აღნიშნა ივანიშვილმა და დასძინა, რომ გაჭირვებას ნებისმიერ ქვეყანაში, მათ შორის ამერიკაში, კანადაში, საფრანგეთში და სხვა ნორმალურ სახელმწიფოში ვნახავთ.
