საპარლამენტო არჩევნების პირველადი მონაცემების გამოქვეყნების შედეგად, საარჩევნო ზღვარი სამმა პარტიამ გადალახა "ქართული ოცნება – დემოკრატიული საქართველო"_ 856858 (48.6 %); "ერთიანი ნაციონალური მოძრაობა"_ 478417 (27.14 %) და დავით თარხან-მოურავი, ირმა ინაშვილი – საქართველოს პატრიოტთა ალიანსი, გაერთიანებული ოპოზიცია" 88032 (5 %). შესაბამისად, პარლამენტშიც ეს სამი პოლიტიკური ძალა შევა.
აღსანიშნავია, რომ იმ პოლიტიკური სუბიექტების მანდატები, რომლებიც ზღვართან ახლოს იყვნენ, თუმცა ბარიერი ვერ გადალახეს (ასეთი კი სამი პოლიიკური ძალაა, "ირაკლი ალასანია – თავისუფალი დემოკრატები" _ 81355 (4.61 %). "ნინო ბურჯანაძე – დემოკრატიული მოძრაობა" _ 62322 (3.54 %) და "შალვა ნათელაშვილი – საქართველოს ლეიბორისტული პარტია" _55201 (3.13 %), პარლამენტში შესულ პოლიტიკურ პარტიებზე გადანაწილდება.
საქართველოს საარჩევნო კოდექსის 125-ე მუხლის თანახმად, საქართველოს პარლამენტის წევრთა მანდატები მიეკუთვნება მხოლოდ იმ პარტიულ სიას, რომელმაც მიიღო არჩევნებში მონაწილეთა ხმების არანაკლებ 5 პროცენტისა. არჩევნებში მონაწილეთა ხმების რაოდენობაში არ ჩაითვლება ბათილად ცნობილი ბიულეტენებით გათვალისწინებული ხმების რაოდენობა.
"პარტიული სიის მიერ მიღებული მანდატების რაოდენობის დასადგენად ამ სიის მიერ მიღებული ხმების რაოდენობა უნდა გამრავლდეს 77-ზე და გაიყოს საარჩევნო სუბიექტების მიერ მიღებული ხმების ჯამზე. მიღებული რიცხვის მთელი ნაწილი წარმოადგენს პარტიული სიის მიერ მიღებული მანდატების რაოდენობას.
თუ პარტიის/საარჩევნო ბლოკის მიერ მიღებული მანდატების რაოდენობათა ჯამი 77-ზე ნაკლები აღმოჩნდა, გაუნაწილებელი მანდატები პირველ რიგში მანდატების რაოდენობის 6-მდე შესავსებად დაემატება რიგრიგობით იმ საარჩევნო სუბიექტებს, რომლებმაც გადალახეს საარჩევნო ბარიერი და მიღებული მანდატების რაოდენობა 6-ზე ნაკლები აქვთ.
თუ ამ მუხლის მე-6 პუნქტით დადგენილი წესით განაწილების შემთხვევაში რომელიმე საარჩევნო სუბიექტის მიერ მიღებული მანდატების რაოდენობა მაინც 6-ზე ნაკლებია, თითო მანდატი 6-მდე შესავსებად რიგრიგობით აკლდება იმ საარჩევნო სუბიექტებს, რომელთა მანდატების რაოდენობაც 6 მანდატს აღემატება და ამ მოკლების შემთხვევაში საარჩევნო სუბიექტს არ დარჩება 7 მანდატზე ნაკლები.
თუ ამ მუხლის მე-6 პუნქტით დადგენილი პროცედურების შემდეგ კიდევ დარჩა გადაუნაწილებელი მანდატები, ისინი გადასანაწილებელი მანდატების ამოწურვამდე რიგრიგობით გადანაწილდება იმ სუბიექტებზე, რომლებმაც შევსების გარეშე მიიღეს არანაკლებ 6 მანდატისა.
თუ 2 ან 2-ზე მეტი პარტიული სიის მიერ მიღებული ხმების რაოდენობა თანაბარი აღმოჩნდა, მანდატი მიეკუთვნება იმ სიას, რომელმაც ცესკოში უფრო ადრე გაიარა რეგისტრაცია“, _ აღნიშნულია კოდექსში.
იურისტი ლევან ალაფიშვილი "გურია ნიუსთან საუბრისას განმარტავს, რომ ბარიერს მიღმა დარჩენილი პარტიების ხმების გადანაწილება მას შემდეგ მოხდება, რაც ცესკო არჩევნების საბოლოო მონაცემებს გამოაცხადებს.
"მას შემდეგ, რაც პარტიების მიერ მიღებული პროცენტები და 5%-ს გადალახული პარტიები გაირკვევა, ამის მერე თითოეული სუბიექტის მიერ მიღებული ხმების რაოდენობა მრავლდება 77-ზე და იყოფა მონაწილეთა რაოდენობაზე, რა რიცხვიც გამოვა, ის არის მანდატების რაოდენობა. მაგრამ ამ წესით დაანგარიშების დროს საუკეთესო შედეგების მქონე პარტიებმა თუ გაინაწილეს მანდატები და კიდევ დარჩა ე.წ. გარეთ დარჩენილების ხმების ექვივალენტური მანდატები, ამას რიგითობით ინაწილებენ. კოდექსი ამაზე ამბობს, რომ თუკი რომელიმე პარტიამ გადალახა 5% იმას მინიმუმ 6 მანდატი აქვსო, ანუ ეს გამოაკლდა იმ სხვაობას. რაც დარჩება, მინიმუმ 6-ის მერემ, ის ნაწილდება საუკეთესო შედეგის მქონე პარტიებს შორის რიგითობის მიხედვით, პირველი მეორეზე გათვლით. თუ დარჩა "პატრიოტთა ალიანსის“ 6 მანდატის მერე 10 ხმა, განაწილდება არა სამივე პარტიაზე, არამედ "ქართულ ოცნებასა“ და "ნაციონალურ მოძრაობას“ შორის. შეხვდებათ 5-5 მანდატი. თუ დარჩა 11, "ოცნება“ 6-სს, "ნაციონალური მოძრაობა“ 5 მანდატს მიიღებს“, _ ამბობს ალაფიშვილი.
