წლევანდელი ზაფხულის შემდეგ, ოქტომბრის დასაწყისამდე, ერთი კოლოგრამი შაქრის ფასმა 50 თეთრით მოიმატა _ დღეისთვის, ოზურგეთში, ერთი კილოგრამი შაქარი 2 ლარი და 10 თეთრი ღირს. მაისში ერთი კილოგრამი შაქარი 1 ლარი და 70 თეთრი ღირდა. შემდეგ, ზაფხულის განმავლობაში, 10, 20 და 30 თეთრით, ყოველთვიურად იმატებდა. ამის გამო, ყველგან ისმის საყვედური და გაბრაზებული მოსახლეობა მოგვმართავს, ამ თემაზე ხმამაღლა ვისაუბროთ.
_ პოლიციაში ხომ არ ვიჩივლებ შაქრის გაძვირების გამო? რატომ არაფერს წერთ? რატომ ხდება, რომ, როცა მურაბის, კომპოტის შენახვის სეზონი თუ ღვინის დაყენება იწყება, მაინცდამაინც მაშინ აძვირებენ? მთავრობას თუ არ შეუძლია მაგის მოგვარება, აბა, ვის შეუძლია?! _ გვეუბნება ოზურგეთის აგრარულ ბაზარში ვაჟა სალუქვაძე და პასუხსაც არ ელოდება.
"გურია ნიუსი" ფასების მატების შესახებ არა ერთხელ წერდა. ჩვენ ახლაც გავესაუბრეთ მოსახლეობას ამ თემაზე.
მზია თავართქილაძე, ეკონომისტი, პენსიონერი: _ შაქრის ფასი ასე ნელ-ნელა არ უნდა იმატებდეს. ეს ფაქტი აშკარად მეტყველებს იმაზე, რომ ვიღაცამ 50 თეთრით ერთბაშად ვერ გააძვირა და შემპარავ ხერხს მიმართა. ფასების რეგულირება ძალიან კარგად შეუძლია სახელმწიფოს, მთავარია, ამის ნება იყოს. ჩემი აზრით, თუ ფასებს შემომტანი ზრდის, მაშინ ვიღაცამ უნდა გვითხრას, რომ ბაჟმა მოიმატა ან რაღაც ამის მსგავსი მოხდა. თუ მსოფლიო ბაზარზე გაძვირდა, ესეც უნდა თქვან. ამ ბოლო წლებში შაქრის ასე გაძვირება არ მომხდარა. ზოგი პარტია მხოლოდ საარჩევნოდ იძახის, გადასახადებს შევამცირებო. სინამდვილეში ასე რომ ხდებოდეს, პროდუქციაც გაიაფდება. უბრალოდ, ეს ნაბიჯი ხალხის ზურგზე ფულის საშოვნელად გადადგმული ნაბიჯია, დრო იშოვეს და ყელში წაუჭირეს მოსახლეობას…
ხუტუ ბერაძე, პენსიონერი: _ ორი დღის წინ, ერთი კილოგრამი შაქარი 2 ლარად ძლივს ვიშოვე საბითუმო ბაზარში. ბიზნესის თავისუფლებაო, რომ ამბობენ, ესაა თავისუფალი ბიზნესი? რატომ ძვირდება მაინცდამაინც სეზონზე? გამოვიდეს ვინმე მედიაში და გვითხრას სიმართლე. შაქრით გამოტენილია მაღაზიები და მაინც ყოველდღე იმატებს ფასი.
აკაკი ლომჯარია, ეკონომისტი: _ გვითხრან, რატომ აძვირებენ შაქარს და მოვუსმენთ. თუ სადმე რაიმე კრიზისია, გაგვაგებინონ. განადგურდა მსოფლიოში შაქრის მოსავალი თუ რაშია საქმე? სახელმწიფოს მეთაურები იმიტომ ჰყავს, უნდა იზრუნონ იმისთვის, რომ ხალხმა პური და შაქარი თავისუფლად იყიდოს. ხმას კი ითხოვენ ყოველ არჩევნებზე?! დაიბნა ხალხი. ვის დაუჯერონ, აღარ იციან. ყველამ უნდა გაიგოს, რომ ადამიანმა, შვილს თუ შვილიშვილს, შაქარი და პური ვერ აჭამა, მას ძალიან ადეკვატურ პასუხს და საარჩევნო სწორებას ვერ მოთხოვ.
აკაკი ღლონტი, აგრონომი, ფერმერი: _ მე თუ მკითხავთ, გეტყვით, რომ შაქარი უსაშველოდ გაძვირებული არაა. ბევრი წუწუნებს, ღვინისთვის მინდოდა შაქარი და ძალიან გაძვირდაო. რატომ უშვები შაქარს? მიწა გაქვს, ხელი გაანძრიე, ვენახს მიხედე და ნატურალური ღვინო დააყენე. ჩვენი მიწა-წყალი ყველაფრის საშუალებას იძლევა, მაგრამ სიზარმაცეა გამეფებული. აბა, ნახე, რამდენი მსხალი, ვაშლი, ტყემალი ცვივა. ბევრმა გააკეთა ნატურალური წვენი თუ ბევრი ჯაფა სჭირდება? ადამიანმა ან უნდა ისწავლოს, ან იშრომოს! ან ხელით იმუშავე, ან ტვინით! ორივე _ მთლად უკეთესი! თამბაქოს მოწევას მოვუკლოთ და "ბირჟაზე" დგომას. ბიზნესმენია თუ ვიღაც, ისე მოუქციე საქმე, რომ ვერ გაგიძვიროს შაქარი. რატომ დარდობენ შაქრიან ღვინოზე, მერე რომ ხშირად დათვრნენ ან მოიწამლონ? ვისაც მიწა აქვს და შრომა შეუძლია, უმრავლესობა არ შრომობს _ დღეში ოთხი საათი რომ იმუშაო წესიერად, წელში გაიმართები. მთავრობამ მაჭამოსო, ამბობენ. რანაირად _ ტახტზე წამოწოლა რომ უყვარს ბევრს და ამავე დროს ბევრი ლაპარაკი? ყველა მთავრობა ჩვენი არჩეულია. აირჩიე? ახლა აცალე! ღვთისგან კურთხეული მიწა-წყალი გვაქვს, რომლის ფასი ბევრმა არ იცის. თუ მუყაითად მივუდგებით საქმეს, ვერავინ დაგვიწესებს საკუთარ ფასს შაქარსა თუ პურზე. ბევრი უნდა ფიქრობდეს ასე, თუმცა, ეს დროც დადგება, დარწმუნებული ვარ!
რაც შეეხება მაღაზიების, სუპერმარკეტების თუ სხვადასხვა სავაჭრო-საბითუმო მაღაზიების გამყიდველებს, კითხვაზე, რატომ ძვირდება შაქარი, ამბობენ, რომ მიზეზის შესახებ არაფერი იციან.
