80 წლის ვენერა მგელაძე, 45 წლის შვილთან _ ლეილა მგელაძესთან ერთად, ოზურგეთში, იაკობ შემოქმედელის ქუჩის #99-ში, ძველისძველ, კიბის გარეშე დარჩენილ სახლში ცხოვრობს.
როცა შინ ვეწვიეთ, მოხუცმა მეორე სართულიდან გადმოგვხედა და გვთხოვა, არ ავსულიყავით _ აქ ვერ ამოხვალთ, დამიცადეთ, როგორმე ჩამოვალო, და აივნის შიდა ჩამოსასვლელ სახელდახელო კიბეს ჩამოუყვა. ჩამოსულმა დასძინა: "დიდი ხანია, ჩვენს სახლზე კიბე მოიშალა და გამკეთებელი არავინაა. ავადმყოფობამ ჩვენი ოჯახის ყველა წევრისთვის მოიცალა, თორემ ჯანმრთელობა რომ გვქონდეს რომელიმეს, რატომ ვიწუწუნებთ? ცოცხალი კაცი გაინძრევი და ლუკმას იშოვი", _ გვითხრა მან.
ვენერა მგელაძეს ორი შვილი ჰყავს. ვაჟი _ დათო მგელაძე თბილისში ცხოვრობს. როგორც ქალბატონი ვენერა ამბობს, შვილს ფილტვის სიმსივნე აღმოაჩნდა და იქეთ დასჭირდა დახმარება. საპენსიო სესხიც ამიტომ გამოიტანა გასულ წელს, რომლის გადახდაც ძალიან გაუჭირდა და დღესაც არ დაუსრულებია. რაც შეეხება მეორე შვილს, ლეილა მგელაძეს, ისიც შეზღუდული შესაძლებლობის მქონე პირია. მართალია, პენსიის სახით 100 ლარს იღებს, მაგრამ ეს თანხა, ძირითადად, წამლებს სჭირდება. რაც შეეხება ლეილა მგელაძის 23 წლის შვილს, გედეონ მგელაძეს, ისიც ჯანმრთელობას უჩივის _ სასუნთქი გზების პრობლემები აქვს და წამლები ხშირად სჭირდება.
_ ასეთი საშინელი მდგომარეობა გვაქვს ჯანმრთელობის მხრივ და ამ დღეშიც, რა გასაჭირსაც აქ ხედავთ, ამიტომ ვართ. სოციალური დახმარება შარშან, ივლისში მოგვიხსნეს. მივედით, მაგრამ უარით გამოგვისტუმრეს _ მხოლოდ ერთი წლის შემდეგ უნდა დაწეროთ განცხადება თავიდანო. ჩემი შვილი, ლეილაც მძიმე ავადმყოფია. გამუდმებით ხელები უბუჟდება. რაიმეს შესრულება უჭირს და იმდენი ჭიქა-თეფში დამიტეხა, ვერ დათვლით. რა ქნას? თეფში ხომ უნდა გარეცხო ან ზედ საჭმელი დადო? უმეტესად, ყველაფერი ხელიდან უცვივა, _ გვიამბობს ვენერა მგელაძე.
სახლი, რომელშიც სულ სამი სული ცხოვრობს, ძველისძველი და სახურავმორყეულია. წვიმა, თითქმის, ყველა ოთახში ჩამოდის. როგორც ვთქვით, კიბე არ აქვს და სახელდახელოდ გაკეთებული, ხელნაკეთი, ხისსაფეხურებიანი კიბის საშუალებით ადიან მეორე სართულზე. პირველ სართულზე მიწის იატაკია, სადაც ჩამონგრეულ კედლებსა და ნახევრად დამტვრეულ ფანჯრებზე საშენი მასალის ნაფლეთები ჩანს.
მათი საკარმიდამო ნაკვეთი, მათივე თქმით, 1000 კვ. მეტრია. ჰყავთ რამდენიმე ქათამი. ესაა სულ მათი ქონება.
ვენერა მგელაძე ამბობს, რომ გასულ თვეში, მას და მის შვილს, ექიმმა 140 ლარის ღირებულების წამალი გამოუწერა.
_ 140 ლარის წამალი რომ ვიყიდო, თითქმის მთელი პენსია უნდა დავთმო. მერე რა ვჭამოთ? სული მწარეა… ამიტომ ხშირად ვყიდულობ ანალგინს და "კაპლს"! ანალგინი ტკივილს აყუჩებს. "კაპლი" ხან მასულიერებს, ხან _ არა! როგორც მხედავთ, ჯერ კიდევ კი ვარ ცოცხალი… ვახერხებ მოძრაობას. ჯანმრთელობა რომ გვქონდეს, ვინმეს შევაწუხებთ? მაგრამ, როცა ასეთ მდგომარეობაში გვხედავენ, როცა ოჯახში ყველა ავადმყოფია, ვერ ვიგებ, რატომ გვიჩერებენ დახმარებას? _ გვეკითხება მოხუცი.
კითხვაზე, ერთი წლის შემდეგ, ანუ ამ წლის ივლისში რატომ არ მიმართეს სოციალურ სამსახურს ხელახლა განცხადების დასაწერად, ამბობენ, იმედი აღარ ჰქონდა, რომ ვინმე ყურადღებას მიაქცევდა:
_ ქალბატონო ვენერა, თქვენ, როგორც გითხრეს, ერთი წლის გასვლის შემდეგ უნდა მიგემართათ სოციალური სამსახურისთვის!
_ ამბობდნენ, რომ კიდევ ბევრს უნდა მოეხსნას დახმარება, აზრი არ აქვსო და აღარ წავედით.
"გურია ნიუსი" გურიის სოციალური მომსახურების სამხარეო ცენტრის უფროსს თეა ლომჯარიას დაუკავშირდა:
_ აღნიშნულ პერიოდში, როცა ამ ქალბატონს სოციალური და ხმარება მოეხსნა, მე ცენტრში არ ვმუშაობდი. ახლა იმის თქმა შემიძლია, რომ ვენერა მგელაძემ უნდა მომართოს სოციალური დახმარების სამხარეო ცენტრს, რომ მოხდეს ოჯახის შეფასება და შემდეგ, სარეიტინგო ქულის მიხედვით, გაირკვევა, დაენიშნება თუ არა დახმარება, _ გვითხრა თეა ლომჯარიამ.
