ნუგზარ წიკლაურის მიერ წარმოდგენილი კანონპროექტის თანახმად, “ავტორიზებული საკაბელო ტელევიზიები ვალდებულნი იქნებიან თავის პაკეტში განათავსონ საზოგადოებრივი მაუწყებელი, ყველა ლიცენზირებული საერთო მაუწყებელი, რომელიც მაუწყებლობას ეწევა თანამგზავრის მეშვეობით, აგრეთვე, საერთო მაუწყებელი, რომელიც საერთო მაუწყებლობას ეწევა შესაბამისი საკაბელო ტელევიზიის მომსახურების ზონაში. ეს ვალდებულება იმოქმედებს მხოლოდ არჩევნების დანიშვნის დღიდან არჩევნების დღემდე და მხოლოდ იმ შემთხვევაში, თუ საკაბელო ტელევიზიას აქვს მაუწყებლობის განთავსების ტექნიკური საშუალება და თავისუფალი რესურსი (ანუ თავისუფალი არხი)”.
წიკლაურთან ერთად, პავლე კუბლაშვილიც და მთელი მმართველი გუნდი იმ აზრზე არიან, რომ საზოგადოებისთვის უკვე კარგად ცნობილი “მასთ ქერი” მხოლოდ არჩევნების დღემდე უნდა მოქმედებდეს, არჩევნების დღიდან კი მოსახლეობა კვლავ ნაციონალური არხების ამარა დარჩება.
“გურია ნიუსი” ამ საკითხებთან დაკავშირებით, კოალიცია ”არჩევნის თავისუფლებისთვის” წარმომადგენელს, ირაკლი მელაშვილს ესაუბრა.
_ ბატონო ირაკლი, გუშინ გაიმართა საკომიტეტო მოსმენა აღნიშნულ კანონპროექტთან დაკავშირებით, თქვენი მხრიდან რა ძირითადი მოთხოვნები იყო დაყენებული, რაზე შეთანხმდით და რაზე _ ვერა?
_ ჩვენი მხრიდან იყო დაყენებული რამდენიმე ძირითადი საკითხი. 1. “მასთ ქერის” მოქმედების ვადა არჩევნების დასრულებამდე, რაც არჩევნების შედეგების შეჯამებას ნიშნავს. 2. “მასთ ქერის” შეუსრულებლობის პირობებზე სანქციების საკითხი, ანუ თუ ტელევიზიამ იკისრა ვალდებულება გააკეთოს “მასთ ქერი,” მაგრამ არ შეასრულებს, რა სანქციები იქნება გამოიყენებული მის მიმართ. 3. იქ წერია, რომ საკაბელო ტელევიზიებმა საკუთარ პაკეტებში უნდა ჩართოს, მაგრამ პაკეტები არის მრავალი სახის, შეიძლება იყოს იაფი, შეიძლება იყოს ძვირიანი. ამან შეიძლება დისკრიმინაციამდე მიგვიყვანოს. მოთხოვნა იყო, არადისკრიმინაციულ პირობებში მოხდეს ეს ყველაფერი.
საუბარი იყო ტელეკომპანია “კავკასიასთან” დაკავშირებით, მასზეც უნდა გავრცელდეს “მასთ ქერის” ვალდებულება. ეს იყო ძირითადი მოთხოვნები, რაც შეხვედრაზე იყო დაყენებული.
პრინციპში ყველა საკითხზე ამობობდნენ, დავაზუსტოთ და შესაძლებელია შეთანხმებაო, გარდა ერთისა, _ საკაბელო ტელევიზიებზე “მასთ ქერის” გავრცელების ვადებზე. მმართველი გუნდი, ჯერჯერობით, მყარად დგას იმ პოზიციაზე, რომ არჩევნების დღემდე გავრცელდეს “მასთ ქერის” ვალდებულება. რაც ჩემი აზრით არასწორია.
_ რა არგუმენტი აქვთ, როდესაც ამ მოთხოვნას აყენებენ?
_ საუბარია იმაზე, რომ მოსახლეობა იყოს ინფორმირებული. ეს საარჩევნო კამპანიაზე ვრცელდება. საარჩევნო განსაკუთრებული ვალდებულება ტელევიზიებს გააჩნიათ არჩევნების დღემდე. უფასო რეკლამა და ა.შ. აქედან გამომდინარე, “მასთ ქერის” ვადებულება მხოლოდ ამაზე გავრცელდესო. არჩევნების დღეს, მაუწყებლობების გათიშვა მცდარი პოზიციაა, რამაც შეიძლება პოლიტიკური ვითარების დაძაბვა გამოიწვიოს. არ მგონია, ეს ხელისუფლების ინტერესებში იყოს.
_ როდის გაიმართება მეორე მოსმენა?
_ როგორც ვიცი, პარასკევამდე იქნება საკომიტეტო მეორე მოსმენა, სადაც უნდა იყოს წარდგენილი ჩვენი, არასამთავრობო ორგანიზაციების ვარიანტები და წინადადებები.
_ ყველაზე მეტად ვინ გიწევდათ ოპონირებას. ვინ იყო წინააღმდეგი?
_ საკითხი გამოიტანა ნუგზარ წიკლაურმა. მოსაზრებებს გამოთქვამდა პავლე კუბლაშვილი. მათი ძირითადი ოპონიერება ის იყო, რომ ვალდებულება გავრცელდეს არჩევნების დღემდე. პირველ რიგში, ხელისუფლებას უნდა აწყობდეს არჩევნების დასრულებამდე გავრცელდეს “მასთ ქერის” ვალდებულება. ჩემი აზრით, დიდ შეცდომას უშვებენ.
_ თუ ღიად და დემოკრატიულად აპირებს ხელისუფლება არჩევნების ჩატარებას, რატომ ეშინიათ “მასთ ქერის” არჩევნების დღეს?
_ იცით, ეს უარესია, ხალხს ეუბნები, _ ინფორმაცია გექნებაო და უცებ, არჩევნების დღეს ჩაუხშობ ინფორმაციის წყაროებს. ბუნებრივია, ეს გამოიწვევს გაღიზიანებას და უნდობლობის ხარისხს არჩევნების მიმართ. კიდევ ერთხელ ვიმეორებ, ჩემი აზრით, დიდ შეცდომას უშვებენ.
