“საქართველოს მწვანეთა მოძრაობის” თანათავმჯდომარე ნინო ჩხობაძე “გურია ნიუსთან” საუბრისას აცხადებს, რომ სინამდვილეში არც პრეზიდენტი და არც ენერგეტიკის მინისტრი ამას არ ამბობს, პირიქით, საუბარია იმაზე, რომ რაც კი იქნება გენერირებული ელექტროენერგია, გაიყიდება და ამისგან მივიღებთ შემოსავალს.
_ ეს იმიტომ კი არ შენდება, რომ გაიაფდეს ელექტროენერგია ქართველებისთვის. არსებობს სამ ნაწილად დაყოფილი ენერგეტიკა: ენერგოგენერაცია, ენერგო ბაზარი და დისტრიბუცია ანუ გაყიდვა, რასაც მოსახლეობა იღებს. აქედან გამომდინარე, საუბარია იმაზე, რომ ბახვზე მიდის ხუთი ჰესის მშენებლობა. ეს გამორიცხულია, კარგად უნდა ვიცოდეთ, რომ ენერგო ბაზარი არის სულ სხვა პრინციპებზე აწყობილი, ის ყიდულობს ენერგოგენერაციისგან და ყიდის. ასე რომ, ეს სქემა არ იმუშავებს. ჩემთან არსებობს ჰიდროელექტროსადგური და მე იაფიან ელექტროენერგიას მივიღებო, ასეთი რამ არ მოხდება არასოდეს.
_ და ეს მშენებლობები რა შედეგს გამოიღებს? გურიის რეგიონი, რომელიც ყველაზე პატარაა საქართველოს მასშტაბით, ამდენი ჰესის მშენებლობამ რა საფრთხის წინაშე შეიძლება დააყენოს?
_ რა საფრთხის წინაშე შეიძლება დაგვაყენოს ზოგადად, ამ კითხვაზე პასუხი გამიჭირდება. ის კარგია, რომ ჩვენ ელექტროენერგიის გენერაციას ვახორციელებთ ზოგადად, მაგრამ საქართველოს მწვანეთა მოძრაობა და დედამიწის მეგობრები გამოდიან დიდი ჰესების წინააღმდეგ. რომელიც იწვევს დიდი ტერიტორიების დატბორვას. მართალია, ის ქმნის უფრო დიდ გენერაციას, მაგრამ ეს იქნება იმის ხარჯზე, რომ უნიკალური ხეობები შეიძლება გაქრეს. მაგალითისთვის, ნამახვანის ჰესის აშენებამ შეიძლება გააქროს რაიონი ანუ ის დასახლება, ის ეთნოსი, რასაც ჰქვია ლეჩხუმი და ცაგერი. ახლა რომ გადმოვინაცვლოთ გურიაში, ბახვი არის პატარა მდინარე, კი არის წყალუხვი წლების განმავლობაში, მაგრამ რამდენად გაუძლებს ხუთი ჰესის მშენებლობას, რამდენად მოამარაგებს ეს წყლით, არის ცოტა სათუო. ჩვენი ინფორმაციით, გარკვეული პრობლემები შეიძლება შეექმნას. როცა შედარებით ანალიზს ვაკეთებდით, ბახვი 3-ზე ადრე იყო ნებართვა გაცემული, ვიდრე დანარჩენებზე ანუ დანარჩენები დამუშავების პროცესშია. რასაც ჩვენ ვუყურებთ, ჰიდროლოგია არ არის სწორად გათვლილი, ეყოფა თუ არა წყალი, ეს ძალიან მნიშვნელოვანია. ზოგადი ტენდენციით საქართველოში არის პრობლემა კლიმატის ცვლილებებზე. შეტყობინებაში, რომელიც დაიდო სახელმწიფოს მხრიდან და რომელიც ეცნობა კლიმატის ჩარჩო _ კონვენციის სამდივნოს, პირდაპირი დასკვნებით ჩანს, რომ მტკნარი წყლის რაოდენობა საქართველოში შემცირდება. ეს იმას ნიშნავს, რომ ჩამონადენი იქნება უფრო ნაკლები, ტენიანობა მატულობს. წყლის ჩამონადენი ნამდვილად შემცირდება, ეს არის სერიოზული პრობლემა. ისმის კითხვა, _ რისთვის ვაშენებთ, თუ წყალი არ გვექნება? რეალური პრობლემა ამ შემთხვევაში ისაა, რომ ფაქტობრივად შეიძლება წყალი არ გვექნეს. იმ პერიოდებისთვის, როდესაც ინვესტორი 20-30 წლების შემდეგ სამართავად გადმოგვცემს, სამწუხაროდ, მაშინ შეიძლება, წყალი არ გვქონდეს.
_ ბახვი 1 კაშხლის მშენებლობა თუ მოხერხდა, როგორც ამბობენ, კურორტ ბახმაროს კლიმატი შეიცვლება. რამდენად შეესაბამება ეს რეალობას?
_ რა თქმა უნდა, ტენიანობას მოუმატებს, გლობალული კლიმატური ცვლილებების ფონზე ტენიანობა ისედაც მომატებულია მთელ საქართველოში. ტენიანობას არავინ არ საზღვრავს ანუ არავინ არ სინჯავს, არ ხდება მისი დაფიქსირება. მაგრამ, ნებისმიერი ახალი საქმის გაჩენა უმატებს ტენიანობას. რით არის უნიკალური ბახმარო, როგორც კურორტი? იმიტომ, რომ იქ არის მშრალი ჰავა. როგორც კი რამე გაკეთდება ბახვის თავზე, ძალიან სერიოზულად დასაფიქრებლად გვექნება საქმე, იქნება თუ არა ბახმარო, როგორც კურორტი?
