არასამთავრობო ორგანიზაციები ერთ-ერთი დამკვირვებლის მიერ ამომრჩევლისთვის თვალის ჩაკვრის ფაქტთან დაკავშირებით განმარტებებს აკეთებენ.
როგორც არასამთავრობო ორგანიზაციების, "საუნჯე", "სამოქალაქო საზოგადოების განვითარების ცენტრი (CSDC)", "ნაბიჯი სამოქალაქო ინტეგრაციისკენ" და "ჰელფინგ ჰენდი" გავრცელებულ განცხადებაშია აღნიშნაული, ერთ-ერთ უბანზე დაიწერა საჩივარი, რომელიც ხმის მიცემის ფარულობის დარღვევას ეხებოდა.
"მწუხარებას გამოვთქვამთ, რომ მედია საშუალებების და საარჩევნო ადმინისტრაციის მხრიდან აღნიშნული საჩივარი არასწორად იქნა გაგებული და ძალიან მძიმე სამართალდარღვევა იგნორირებულია.
განმეორებითი კენჭისყრის დროს ზუგდიდის ერთ-ერთ საარჩევნო უბანზე (სოფ. ჯიხაშკარის 66.67.79 უბანზე) ერთ-ერთი დამკვირველი ორგანიზაციის დამკვირვებელმა, გოჩა რაფავამ უხეშად დაარღვია ხმის მიცემის პროცედურა, შეიხედა კაბინაში, მაშინ, როდესაც ამომრჩეველი ხმას აძლევდა, რის შედეგადაც დაირღვა ფარულად ხმის მიცემის კონსტიტუციური უფლება. აღნიშნული ფაქტი მისიის დამკვირვებლის მიერ საჩივრის დაწერის შემდგომაც რამდენჯერმე განმეორდა, რის შემდეგაც ხსენებულმა დამკვირვებელმა მიიღო შენიშვნა და დატოვა შენობა.
სამწუხაროდ, მედია საშუალებებმა და საარჩევნო ადმინისტრაციამ ამ საჩივრის შესახებ საზოგადოებისათვის ინფორმაციის მიწოდებისას გაამახვილეს ყურადღება იმ გარემოებაზე, რომ დამკვირვებელმა გოჩა რაფავამ თვალი ჩაუკრა ქალბატონს. ახალგაზრდული სადამკვირვებლო მისიის დამკვირვებლმა (დამკვირვებელი ორგანზიაცია "საუნჯეს“ რეგისტრირებულმა წარმომადგენელმა უბანზე) საჩივარში დააფიქსირა, რომ კაბინაში შეხედვის შემდეგ გოჩა რაფავამ სხვა პირს ნამდვილად ჩაუკრა თვალი და უთხრა: “ის შემოხაზა, რაც ვუთხარი". ეს ფაქტი საჩივარში მოხვდა იმდენად, რამდენადაც მიუთითებს, რომ შესაძლოა, რაფავამ ამომრჩევლის ნების თავისუფალ გამოხატვაზეც ზეგავლენის მოხდენა სცადა. ორივე – კაბინაში შეხედვა და ზეგავლენა ამომრჩეველზე სისხლის სამართლის კოდექსით გათვალისწინებული დანაშაულია (162-ე და 164-ე მუხლები).
რამდენადაც 79-ე უბანზე მომხდარი ეს შემთხვევა საკმაოდ მძიმე სამართლებრივ გარემოებას მოიცავს და, შესაძლოა, სისხლის სამართლის პასუხისმგებლობასაც იწვევდეს, მიგვაჩნია, რომ ფაქტისაგან კომიკური სიტუაციის შექმნა მიუღებელია. თვალის ჩაკვრის ფაქტზე ყურადღების გამახვილება არასერიოზულია მედიის მხრიდანაც და, მითუმეტეს, საარჩევნო ადმინისტრაციის მხრიდან. სწორედ საარჩევნო ადმინისტრაციაა ვალდებული, უზრუნველყოს ხმის მიცემის ფარულად მიმდინარეობა და ეს ფაქტი მხოლოდ ზემოთმითითებული დამკვირვებლის მხრიდან დარღვევას არ წარმოადგენს და არც მხოლოდ მისი პასუხისმგებლობის საკითხს აყენებს.
ხმის მიცემის ფარულობა არჩევნების ჩატარების ერთ-ერთი უმთავრესი პრინციპია და ამომრჩევლის კონსტიტუციური უფლებაა. აუცილებელია, აღნიშნულ ფაქტზე დროული და სწრაფი რეაგირება მოხდეს. მოვუწოდებთ საარჩევნო ადმინისტრაციას, სრული სერიოზულობით მოეკიდოს ჩვენს საჩივარს და ყურადღება გაამახვილოს სამართლებრივ გარემოებებსა და ფაქტებზე.
აღსანიშნავია, რომ უბანზე მყოფი უფლებამოსილი პირები არ უარყოფდნენ ამ ფაქტს “საუნჯეს" დამკვირვებელთან და საჯაროდაც დაადასტურებენ ჩვენ მიერ მოყვანილ გარემოებებს. სწორედ ამის გამო მიიღო რაფავამ შენიშვნა და დატოვა უბანი, და არა – თვალის ჩაკვრის გამო, როგორც ეს რამდენიმე საინფორმაციო საშუალებამ გაავრცელა საჯაროდ.
აქვე უნდა აღინიშნოს, რომ უბნიდან გოჩა რაფავას გასვლა არ ნიშნავს, რომ დარღვევა არ მომხდარა და სახეზე არაა სისხლის სამართლის კოდექსით გათვალისწინებული დანაშაულის შემადგენლობა, აუცილებელია გარემოებების გამოკვლევა საგამოძიებო ორგანოების მხრიდან და შესაბამისი პირების პასუხისმგებლობის საკითხის დაყენება", _ ნათქვამია არასამთავრობოების განცხადებაში.
