ლანჩხუთის მუნიციპალიტეტის საკრებულოში თავის დროზე მიმდინარე წლის მთავარ საფინანსო დოკუმენტზე მსჯელობისას, დეპუტატებმა ზარ-ზეიმით დაუჭირეს მხარი ფრაქციების მიერ ინიცირებულ პროექტს, რომელიც სამება-ჯიხეთის სამონასტრო ზონაში არსებული შუა საუკუნეების მენელსაცხებლე დედათა სახელობის ყოფილი მონასტრის ინფრასტრუქტურული სამუშაოების დაფინანსებას ითვალისწინებდა და რისთვისაც ბიუჯეტში 55000 ლარი მიიმართა. თუმცა, ახლა, როცა განვლილი ცხრა თვის განმავლობაში ბიუჯეტის შესრულების მაჩვენებელი 65%-ია, ირკვევა, რომ ამ პროექტის გახორციელება კითხვის ნიშნის ქვეშ დგას.
საგულისხმოა, რომ თავის დროზე, ბიუჯეტის თავდაპირველ ვარიანტში, ამ პროექტისთვის საჭირო თანხა არ იყო ასახული, რაც მაშინ, უმრავლესობის რიგი დეპუტატების მხრიდან უკმაყოფილების საბაბი გახდა. იყო ალბათობა, რომ თუ ბიუჯეტის საბოლოო ვარიანტში ჯიხეთში ინფრასტრუქტურული სამუშაოების შესასრულებლად საჭირო თანხა არ იქნებოდა გათვალისწინებული, ოპოზიციონერი დეპუტატების მსგავსად, ბიუჯეტს მხარს არც უმრავლესობის ზოგიერთი წარმომადგენელი დაუჭერდა.
ერთ-ერთი, ვინც ჯიხეთში ტურისტულ-ინფრასტრუქტურული ობიექტის მოწყობისთვის ბიუჯეტიდან თანხის გამოყოფას ითხოვდა, პროექტის მთავარი ინიციატორი, საკრებულოს წევრი კახა გუჯაბიძე გახლდათ, რომელიც საკუთარი პოზიციის დასტურად ამბობდა, რომ "მონასტერი ლანჩხუთის მთავარ ღირსშესანიშნაობას წარმოადგენს და აქ მთელი წლის მანძილზე ათასობით მომლოცველი ჩამოდის. აქაურობა თავისი ლამაზი ბუნებითა და ანკარა წყაროებით იზიდავს ტურისტს. კომპლექსის კიდევ უფრო განვითარება და ინფრასტრუქტურული გაუმჯობესება კიდევ უფრო გაზრდის მისდამი ინტერესს, რაც, საბოლოო ჯამში, მრავალმხრივ სასარგებლო იქნება მუნიციპალიტეტისთვის".
პროექტის სამომავლო ბედით დაინტერესებული გუჯაბიძე ამ დრომდე მოლოდინის რეჟიმშია და ამბობს, რომ არ ფლობს პროექტის გადავადებასთან დაკავშირებით ინფორმაციას.
გამგეობის პრესასთან და საზოგადოებასთან ურთიერთობის განყოფილებიდან მიღებული ინფორმაციის თანახმად, ჯიხეთში ტურისტულ-ინფრასტრუქტურული ობიექტის მოსაწყობად თანხა სავარაუდოდ 2017 წლის ბიუჯეტში იქნება გათვალისწინებული.
საკითხთან დაკავშირებით უფრო კონკრეტული განმარტება გამგეობის საფინანსო სამსახურის უფროსს, როლანდ ლაშხიას ვთხოვეთ, რომელმაც აღიარა, რომ ამ პროექტის გახორციელება დიდი კითხვის ქვეშ დგას.
მისი თქმით, "წლევანდელ მთავარ საფინანსო დოკუმენტის პირველ ვარიანტში არ იყო გათვალისწინებული თანხა ფრაქციების მიერ ინიცირებული პროექტის სამუშაოების დასაფინანსებლად, თუმცა, ბიუჯეტის შესწორებულ, ანუ საბოლოო ვარიანტში ჯიხეთში ტურისტული ინფრასტრუქტურის მოსაწყობად თანხა ფინანსურ დოკუმენტში აისახა, თუმცა იმ პირობით, თუ მოხდებოდა თანხების მობილიზება ბუნებრივი რესურსების შემოსავლებიდან".
საფინანსო სამსახურის უფროსის თქმით, ვინაიდან, ჯერჯერობით, ამ კუთხით ბიუჯეტში თანხის მობილიზება არ მომხდარა, შესაბამისად, პროექტის გახორციელებაც ამ ეტაპზე ვერ ხერხდება.
მართალია, ლაშხიას საუბრიდან გამომდინარე, ძნელია ხაზგასმით რაიმეს მტკიცება, მაგრამ თუნდაც ამ პროექტის ვერგახორციელების ფონზე, ჩნდება კითხვა _ უნდა ველოდოთ თუ არა მიმდინარე წლის ბიუჯეტის სეკვესტრს? მით უმეტეს, რომ სწორედ ბუნებრივი რესურსების სარგებლობიდან მისაღები თანხები ამ ბიუჯეტში საპროგნოზოდ მილიონ ლარს აღემატებოდა და რადგან ამ კუთხით საბიუჯეტო გარღვევა ადვილად პროგნოზირებადია, დიდი შანსია, ამ პროექტის მსგავსად, სხვა დაგეგმილ პროექტებსაც იგივე ბედი ეწიოს.
ცნობისთვის, თავის დროზე ეს პროექტი ჯიხეთში ტურისტული ინფრასტრუქტურული ობიექტის მოწყობის შესახებ, ა(ა)იპ საგარეო-ეკონომიკური კავშირურთიერთობების, ინვესტიციების, ტრანსპორტის, ტურიზმისა და მეწარმეობის განვითარების ცენტრში მომზადდა, სადაც პროექტის წარდგენისას იმთავითვე აღნიშნავდნენ, რომ ამ პროექტის გახორციელების შემთხვევაში, კიდევ უფრო გაიზრდებოდა ინტერესი ჯიხეთისადმი და მოიმატებდა დამთვალიერებელთა რაოდენობა, რაც შემდგომ პირდაპირ ასახვას ჰპოვებდა მუნიციპალიტეტზე, როგორც სოციალური, ასევე, ეკონომიკური კუთხით.
