„ნაციონალური მოძრაობის“ წევრი ზურაბ ჭიაბერაშვილი მიიჩნევს, რომ სსიპ-ების და ა(ა)იპ-ების გაუქმება აუცილებელია, _ ამის შესახებ ჭიაბერაშვილმა დღეს გამართულ პრესკონფერნციაზე განაცხადა.
ჭიაბერაშვილის თქმით, ეს არის ადგილობრივი ბიუროკრატია, რომლისთვისაც ხარჯი 2012 წელთან შედარებით 450-500 მილიონამდე ლარით არის გაზრდილი.
ჟურნალისტის კითხვაზე, სსიპ-ებისა და ა(ა)იპ-ების გაუქმება ხომ არ გამოიწვევს სამუშაო ადგილების დაკარგვას, ჭიაბერაშვილმა უპასუხა, რომ აქ არის ძალიან მარტივი სპირალი, ანუ თუ ბიუროკრატია იზრდება სამთავრობო აპარატში, სამუშაო ადგილები მცირდება და პირიქით.
”როცა ვსაუბრობთ ბიუროკრატიული ხარჯების შემცირებაზე, ეს ეხება, როგორც სამინისტროებს, ისე სსიპ-ებს და ა(ა)იპ-ებს. ასევე, ეხება რაიონებში დაფუძნებულ ა(ა)იპ-ებს, რომლებიც რაიონულ გამგეობებთან არსებობს და რომლებიც სოკოებივით მომრავლდა. ეს არის უზარმაზარი ხარჯი ყველა დონეზე. ანუ, ადგილობრივ და ცენტრალურ დონეზე მთლიანად არის გაზრდილი ბიუროკრატია და როცა ჩვენ 2012 წელს ვადარებთ, უნდა ითქვას, რომ ბიუროკრატიული ხარჯი 450-500-მდე მილიონი ლარით არის გაზრდილი”, _ განაცხადა ჭიაბერაშვილმა.
შეგახსენებთ, რომ მიმდინარე წლის 18 ოქტომბერს, სახელმწიფო აუდიტის სამსახურმა "საქართველოს 2017 წლის სახელმწიფო ბიუჯეტის კანონის შესახებ" კანონის პროექტზე დასკვნა გამოაქვეყნა, რომელიც საჯარო სამართლის იურიდიული პირებს (სსიპ) და არასამეწარმეო (არაკომერციული) იურიდიული პირებსაც (ა(ა)იპ) ეხება.
დასკვნის თანახმად, 2017 წლის ბიუჯეტის კანონის პროექტით, სსიპ-ების და ა(ა)იპ-ების დაგეგმილი შემოსულობების მოცულობა 2016 წლის შესაბამის მაჩვენებლებთან შედარებით 16% იზრდება და ერთი მილიარდ 700 მილიონს უტოლდება. კიდევ უფრო მეტს შეადგენს გადასახდელების მოცულობა, რომელიც 2016 წლის ანალოგიურ მაჩვენებლებთან მიმართებით 17% უნდა გაიზარდოს და ერთი მილიარდ 860 მილიონს მიაღწიოს.
საყურადღებოა ისიც, რომ სსიპ-სა და ა(ა)იპ-ებისათვის სახელმწიფო ბიუჯეტიდან გადასაცემი სახსრების საპროგნოზო მოცულობა 946 მლნ ლარს შეადგენს და აღნიშნული ციფრი 37%-ით აჭარბებს 2016 წლის ანალოგიურ მაჩვენებელს. სანაცვლოდ, 19 მილიონი ლარით მცირდება საქართველოს კანონმდებლობით ნებადართული წყაროებიდან მისაღები შემოსულობების გეგმიური მაჩვენებელი, რომელიც 2,3% ნაკლებია 2016 წლის შესაბამის მაჩვენებლებზე.
აუდიტის ამ დასკვნას გამოეხმაურა საქართველოს ახალგაზრდა იურისტთა ასოციაცია. ორგანიზაციას შემაშფოთებლად მიაჩნია სახელმწიფო აუდიტის დასკვნაში ასახული ის ინფორმაცია, რომელიც 2017 წლის სახელმწიფო ბიუჯეტის პროექტში სსიპ-სა და ა(ა)იპ-ებთან დაკავშირებით არის აღნიშნული:
" სსიპ-სა და ა(ა)იპ-ების გამჭვირვალობასა და ანგარიშვალდებულებასთან დაკავშირებული საკითხები დღემდე წარმოადგენს მნიშვნელოვან პრობლემას, რაც სახელმწიფო აუდიტის სამსახურის მხრიდან, 2017 წლის სახელმწიფო ბიუჯეტის პროექტში ასახული ინფორმაცითაც დასტურდება. ამ ფონზე დაფინანსების გაზრდა კიდევ უფრო აძლიერებს მოსაზრებას საჯარო ფინანსების შესაძლო არარაციონალური ხარჯვის თაობაზე;
– კვლავაც გამოწვევად რჩება სრულყოფილი ინფორმაცია სსიპ-სა და ა(ა)იპ-ებში დასაქმებულ პირთა რაოდენობის და აღნიშნული რაოდენობის საჭიროების შესახებ. შეუძლებელია იმის დადგენა, თუ რატომ დგება დღის წესრიგში თანამშრომელთა რაოდენობის გაზრდის აუცილებლობა და რას უკავშირდება შრომის ანაზღაურების ზრდის საჭიროება.
